ខេត្តក្រចេះ ៖ សពកម្មករខ្មែរ៨នាក់ ដែល ត្រូវស្លាប់ដោយការលិចទឹកកប់នៅក្នុងអណ្តូងរ៉ែ មាសដែលមានជម្រៅជាង៣រយម៉ែត្រ ត្រូវបានរុករក និងស្រង់មកដល់លើវិញបានជាបន្តបន្ទាប់ ក្រោយពីជួបឧបទ្ទវហេតុក្នុងរយៈពេលបីថ្ងៃរួចមកនោះ ។
គួររំលឹកថា កាលពីវេលាម៉ោង១១ និង៣០នាទីថ្ងៃត្រង់ថ្ងៃទី២៣ ធ្នូ ក្រោយពីមានហេតុការណ៍បំផ្ទុះយកថ្មរ៉ែក្នុងអណ្តូងរ៉ែមាសប៉ះចំខ្សែទឹកធំក្នុងដី បណ្តាលឲ្យទឹកលិចអណ្តូងរ៉ែមាសនោះ ខណៈដែលកម្មករច្រើនជាង៨នាក់ស្ថិតនៅក្នុងអណ្តូងដ៏ជ្រៅនោះភ្លាមៗ មានតែកម្មករ២នាក់ទេ ដែលរួចជីវិតឡើងមកលើវិញបានគឺកម្មករខ្មែរម្នាក់ និងចិនម្នាក់ ។ ចំណែក៨ដាក់ទៀតជាកម្មករខ្មែរត្រូវបានលិចកប់ក្នុងអណ្តូងរ៉ែនោះ ។ អណ្តូងរ៉ែនេះជារបស់ក្រុមហ៊ុនចិនវិនិយោគអាជីវកម្មរ៉ែមាសឈ្មោះសឹង យិងគង័យិក នៅអូរត្រូន ក្នុងឃុំក្បាលដំរី ស្រុកសំបូរ ដែលក្រុមហ៊ុននេះបានចាប់ផ្តើមធ្វើសកម្មភាពជីករុករករ៉ែមាស តាំងពីពាក់កណ្តាលឆ្នាំ២០១១នេះមក ។
ក្រោយពីហេតុការណ៍នេះបានកើតឡើង អាជ្ញាធរដឹកនាំដោយលោកឧត្តមសេនីយជួង ស៊ាងហាក់ ស្នងការនគរបាលខេត្ត និងមន្រ្តីក្រោមឱវាទជាច្រើនរូបទៀត ចុះប្រតិបត្តិការយ៉ាងក្តៅគគុក សហការជាមួយនិងមន្រ្តីរបស់ក្រសួង និងមន្ទីរឧស្សាហកម្មរ៉ែនិងថាមពល ជាមួយក្រុមការងាររបស់ក្រុមហ៊ុនចិន បានរិះរកវិធានការស្រង់យកស្រង់សពទាំង៨នាក់នេះពីបាតអណ្តូង ។
តាមប្រភពពត៌មានពីកន្លែងកើតហេតុបានឲ្យដឹងថា នៅក្នុងហេតុការណ៍បំផ្ទុះគ្រឿងផ្ទុះនាព្រឹក នោះគឺមានកម្មករខ្មែរចំនួន៩នាក់ និងកម្មករចិនម្នាក់ទាំងអស់មានចំនួន១០នាក់ កំពុងតែធ្វើការ នៅក្នុងអណ្តូងទី២ ដែលមានជម្រៅរាប់រយមែ៉ត្រ ។ លុះដល់វេលាម៉ោង១១.៣០នាទី ក្រុមកាងារកម្មករបច្ចេកទេសចិនបានបំផ្ទុះគ្រឿងផ្ទុះនៅអណ្តូងទី១ ប៉ះចំផ្លូវចរន្តទឹកធំ ធ្វើឱ្យទឹកហូរមានសន្ឋឹកខ្មួលខ្មាញ់លាយឡំជាមួយនិងកំទេចថ្មតូចធំហូរបុកទៅអណ្តូងទី២ ដែលកម្មករខ្មែររងគ្រោះកំពុងតែធ្វើការនៅទីនោះ ធ្វើឱ្យបិទច្រកអណ្តូងមិនអាចឡើងមកលើរួច ។
បុរសជាកម្មករខ្មែរម្នាក់ឈ្មោះជា ជឿន អាយុ២២ឆ្នាំមានទីលំនៅភូមិព្រៃជ្រុំ ឃុំព្រៃទទឹង ស្រុកមេសាង ខេត្តព្រៃវែង ដែលបានជួបហេតុការណ៍ជាមួយ និងកម្មករខ្មែរដែលស្លាប់ទាំង៨នាក់ បាននិយាយថា នៅពេលកើតហេតុខណៈពេលដែលគេកំពុងតែពាក់ខ្សែយោងធុងថ្មស្រាបតែឃើញទឹកហូរពីអណ្តូងទី១មកយ៉ាងខ្លាំងលាយឡំជាមួយនិងកម្ទេចថ្មតូចធំ ។ ភ្លាមៗនោះដែររូបគេក៏បានស្រវ៉េស្រវ៉ាតោងទុយយោទឹកឡើងមកលើជាមួយនិងបុរសជាកម្មករចិនម្នាក់ទៀត ទាំងត្រដាបត្រដួស ទើបរួចផុតពីសេចក្តីស្លាប់ តែត្រូវរងរបួសធ្ងន់លើដងខ្លួនដោយអំណាចកម្ទេចថ្ម និងទឹកធ្លាក់មកពីលើ ។ កម្មករអណ្តូងរ៉ែរូបនេះ បានអោយដឹងទៀតថា រូបគេមានមុខងារជាអ្នកពាក់ខ្សែ ដូច្នេះមិនចុះ ជ្រៅដូចកម្មករទាំង៨នាក់នោះទេ ។ហើយនៅពេលកើតហេតុភ្លាមៗ គឺចរន្ឋអគ្គិសនីជាមួយនិងបំពង់ខ្យល់អុកស៊ីសែន ដែលបានតចុះទៅក្នុងអណ្តូង គឺត្រូវកាត់ផ្តាច់ដោយចរន្តទឹកហូបុកដាច់ ។
ក្រោយហេតុការណ៍កើតឡើងការរុករកសពកម្មករទាំង៨នាក់បានធ្វើឡើងទាំងយប់ទាំងថ្ងៃ ដោយក្រុមការងារសង្គ្រោះ បានប្រើប្រាស់ម៉ាស៊ីនបូមទឹកតូចធំចំនួនជាង១០គ្រឿង ក្នុងការបូមរំដោះទឹកចេញពីអណ្តូងដែលមានទឹកដក់លិចក្នុងជម្រៅ១៥០ម៉ែត្រ ពីបាតអណ្តូងរហូតដល់ព្រឹកថ្ងៃទី២៥ ធ្នូ ទើបក្រុមអ្នករុករកស្រង់បានសពកម្មកររងគ្រោះទាំង៨នាក់ចេញពីបាតអណ្តូងបានជាបន្តបន្ទាប់ ។
តាមប្រភពព័ត៌មានជុំវិញកន្លែងកើតហេតុបានឱ្យដឹងទៀតថា កន្លងមកនៅក្នុងអណ្តូងទី១នេះ ការបំផ្ទុះគ្រឿងផ្ទុះបានប៉ះចំចរន្តទឹកធ្វើឲ្យមានទឹកហូរចេញមកតិចៗ ហើយក្រុមការងារ បានផ្អាកសកម្មភាពរយៈពេលបួនថ្ងៃ មុនថ្ងៃកើតហេតុ ។ ប្រភពដដែលបានអោយដឹងទៀតថា ការបំផ្ទុះដើម្បីយកថ្មរ៉ែរបស់ក្រុមការងារគឺតែងតែផ្តល់ដំណឹងដល់កម្មករមួយចំនួនឱ្យចូលទៅក្នុង បន្ទប់សុវត្ថិភាពនៅក្នុងអណ្តូង ហើយនៅថ្ងៃកើតហេតុ គឺគ្មាននរណាផ្តល់ដំណឹងនោះទេមុនពេលបំផ្ទុះ ។
ក្រុមកម្មករបានឱ្យដឹងទៀតថា កម្មករខ្មែរដែលស្លាប់និងរបួសនេះ គឺមានមុខងារកាយថ្ម និងពាក់រ៉ៃដោយទទួលបានប្រាក់កម្រៃក្នុងមួយធុង៩ពាន់រៀល ហើយក្រុមកម្មករ រងគ្រោះទាំងនេះ បានចុះធ្វើការកាយថ្មក្នុងបាតអណ្តូងរ៉ែ តាំងពីយប់ថ្ងៃទី២២ ធ្នូ រហូតដល់ម៉ោង១១ និង៣០នាទីព្រឹកថ្ងៃទី២៣ ធ្នូ ក៏ជួបហេតុការណ៍អាក្រក់នេះតែម្តង ។
នៅក្នុងហេតុការណ៍នេះត្រូវបានគេសន្និដ្ឋានបណ្តាលមកពីបញ្ហាខុសលក្ខណៈបច្ចេកទេស បានធ្វើឲ្យកើតមានគ្រោះថ្នាក់នេះ ។លោកវរសេនីយឯកច្រឹង ផល្លី ស្នងការរងទទូលបន្ទុកស្ថិតិ និងអគ្គិភ័យបានមានប្រសាសន៍ថា កម្មករខ្មែរទាំង៨នាក់ ដែលបានស្លាប់បាត់បង់ជីវិតយ៉ាងអណោចអធ័មនៅក្នុងបាតអណ្តូងដ៏ជ្រៅនេះមាន១-ឈ្មោះឡៃ ផាន់ណា អាយុ៣៥ឆ្នាំ ២-ឈ្មោះឡៃ ផាន់នី អាយុ៣២ឆ្នាំ ៣-ឈ្មោះ ឡៃ ពីសី ១៩ឆ្នាំបុរសរងគ្រោះទាំងបីនាក់ នេះជាបងប្អូនបង្កើតនឹងគ្នា មានទីលំនៅភូមិតាម៉ៅឃុំតាម៉ៅ ស្រុកព្រែកប្រសព្វ ខេត្តក្រចេះ ទី៤-ឈ្មោះប៉ាវ អឿន អាយុ២៣ឆ្នាំ ៥-ឈ្មោះ ប៉ាវ អឿង អាយុ២០ឆ្នាំ បុរសរងគ្រោះទាំង២ជាបងប្អូនបង្កើតនឹងគ្នា និងទី៦-ឈ្មោះទូច រ៉ង អាយុ៣៥ឆ្នាំ បុរសរងគ្រោះទាំងមានទីលំនៅភូមិព្រៃជ្រុំ ឃុំព្រៃទទឹង ស្រុកមេសាង ខេត្តព្រៃវែង ទី៧.ឈ្មោះប្រាក់ យ័ន ហៅចិត្រ អាយុ៣៨ឆ្នាំ មានទីលំនៅ ស្រុកបារ៉ាយ ខេត្តកំពង់ធំ ទី៨-ឈ្មោះម៉ៅ ម៉ាក់អាយុ២២ឆ្នាំ មានទីលំនៅភូមិព្រៃជ្រុំ ឃុំព្រៃទទឹង ស្រុកមេសាង ខេត្តព្រៃវែង ។ បុរសជាកម្មករទាំង៨នាក់ នេះត្រូវស្លាប់បាត់បង់ជីវិតក្នុងបាតអណ្តូង ព្រោះតែរត់មិនរួចពេលទឹកបុកចូលជាមួយកម្ទេចថ្មយ៉ាងខ្លាំងនោះ ។ ចំណែកអ្នករងរបួស ៩-ឈ្មោះជា ជឿន អាយុ៣១ឆ្នាំ មានទីលំនៅភូមិព្រៃជ្រុំ ឃុំព្រៃទទឹង ស្រុកមេស៉ាង ខេត្តព្រៃវែង រងរបួសធ្ងន់ និងទី១០-ឈ្មោះជ យិនសាន ហៅឡោតាង អាយុ៤១ឆ្នាំ ជនជាតិចិន(មេការ)រងរបួសស្រាល ។
លោកសេង យូហៃ នាយការិយាល័យស្វែងរុករកនៃនាយកដ្ឋានធន់ធានរ៉ែ បានមាន ប្រសាសន៍ថា ជនរងគ្រោះទាំង៨នាក់ ត្រូវបានរាជរដ្ឋាភិបាល បានកំណត់ឱ្យក្រុមហ៊ុនសឹងយិនគង័យិក ឧបត្ថមទៅលើ គ្រួសារសពទាំង៨នាក់ ដោយក្នុងម្នាក់ៗចំនួន១ម៉ឺនដុល្លារ និងបើកប្រាក់ខែឲ្យពេញមួយឆ្នាំស្មើនឹង៣ពាន់ដុល្លារ បន្ថែមសរុបក្នុងម្នាក់ទទួលបានប្រាក់ឧបត្ថមចំនួន១៣.០០០ ដុល្លារសហរដ្ឋអាមេរិក។ មន្រ្តីរូបនេះបានបញ្ជាក់ទៀតថា រាល់ការដឹកជញ្ជូនសព និងការរៀបចំតាមប្រពីណៃ រួមជាមួយនឹងសេវាផ្សេងៗទៀត គឺក្រុមហ៊ុនជាអ្នកចេញថ្លៃចាយវាយទាំងអស់ ។
លោកឧត្តមសេនីយ៍ត្រីជួង ស៊ាងហាក់ ស្នងការនគរបាលខេត្ត បានមានប្រសាសន៍ថា ក្រុមការងារសង្គ្រោះមានកម្មករខ្មែរ១០នាក់បានចុះធ្វើការបូមទឹកទាំងយប់ទាំងថ្ងៃមានរយៈពេលបីថ្ងៃជាប់ៗគ្នាដើម្បីរុករកសព រហូតមកដល់វេលាម៉ោង៣និង៣០នាទីព្រឹកទី២៥ ធ្នូ ក្រុមការងារបានទាញសពកម្មករទាំង៨នាក់ទើបស្រង់ឡើងមកលើជាបន្តបន្ទាប់។
លោកឧត្តមសេនីយ៏ស្នងការបានបញ្ជាក់ថា សពជនរងគ្រោះត្រូវបានប្រគល់ទៅអោយ គ្រួសារសពរៀងៗខ្លួននៅព្រឹកថ្ងៃដដែល ដោយក្រុមអាជ្ញាធរបានរៀបចំទុកដាក់តាមទំនៀមទម្លាប់ប្រពៃណី និងដឹកជញ្ជូនទៅដល់លំនៅឋាន។
ក្រុមគ្រួសារសពជនរងគ្រោះទាំង៨នាក់ បានថ្លែងអំណរគុណដល់លោកឧត្តសេនីយ៍ ស្នងការនគរបាលខេត្ត ដែលបានខិតខំប្រឹងប្រែងយ៉ាងយកចិត្តទុកដាក់ទាំងយប់ទាំងថ្ងៃ រហូតដល់រុករកឃើញសពមកប្រគល់អោយពួកគាត់ជាសាច់ញាតិក្រុមគ្រួសារយកទៅធ្វើបុណ្យ ៕
ដកស្រង់ពីគេហរទំព័រកោះសន្តិភាព
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
