ជំងឺមហារីកជាជំងឺមួយដ៏កាចសាហាវដែលធ្វើឱ្យមនុស្សគ្រប់គ្នាខ្លាចរអារ ថែមទាំងបំផ្លាញជីវិតមនុស្សទូទាំងពិភពលោកអស់ជាច្រើនក្នុងមួយឆ្នាំៗ។
ចំណែកជំងឺមហារីកក្រពះ គឺជាជំងឺមហារីកមួយក្នុងចំណោមជំងឺមហារីកជាច្រើនទៀត ដែលកំពុងគំរាមកំហែងអាយុជីវិតមនុស្សផងដែរ។ មានមនុស្សជាច្រើនតែងតែយល់ច្រលំរវាងរោគសញ្ញាជំងឺមហារីកក្រពះជាមួយជំងឺក្រពះពោះវៀនធម្មតា។ ហើយការមិនអើពើនេះបណ្តាលឱ្យជំងឺនេះ កាន់តែរីកដុះដាល់ដល់ដំណាក់ធ្ងន់ធ្ងរបានផងដែរ។
ជំងឺមហារីកក្រពះប្រើរយៈពេលយូរគួរសម ដើម្បីវិវឌ្ឍទៅជាដំណាក់កាលកាចសាហាវ។ តែបើសិនជាអ្នកបានដឹងទាន់ពេលវេលា អាចមានវិធីព្យាបាល និងពន្យារការលូតលាស់នៃជំងឺនេះបាន។ អ្នកអាចព្យាបាលដោយប្រើគីមី ព្យាបាលដោយកាំរស្មីមានច្រើនដំណាក់កាល មុននិងក្រោយពេលវះកាត់ដើម្បីយកដុំសាច់ចេញពីក្រពះ។
ខាងក្រោមនេះជារោគសញ្ញាក្រើនរម្លឹក និងមូលហេតុចម្បងនៃជំងឺមហារីកក្រពះ ដែលអ្នកគួរតែយល់ដឹង ៖
រោគសញ្ញាទូទៅ
- រូបរាងកាយស្រកទម្ងន់ខុសពីធម្មតា
- សុខភាពកាន់តែធ្លាក់ចុះ
- ក្អួតចេញឈាម
- អស់កម្លាំង ល្ហៃល្ហៃ រាងកាយកាន់តែទន់ខ្សោយ
- បាត់បង់ចំណង់នៃការញ៉ាំអាហារដោយលែងចង់បរិភោគអ្វីទាំងអស់
- មានអាការចេះតែចង់ក្អួតចង្អោរមិនឈប់
- មានអារម្មណ៍ថាឈឺពោះ ហើមពោះ ឬឈឺចាប់ពេញផ្នែកពោះតែម្តង
- អាការភើខ្លាំងចេញពីក្នុងក្រពះ
- លាមកមានពណ៌ខ្មៅ ឬមានឈាម
- ស្បែក និងគ្រាប់ភ្នែកឡើងលឿង
- មានការឈឺចាប់ពេលលេបទឹកមាត់ ឬពិបាកក្នុងការបរិភោគអាហារផ្សេងៗ
នៅក្នុងស្ថានភាពជំងឺមួយនេះអ្នកគួរតែចៀសវាងអាហារដែលមានជាតិប្រៃ អាហារដែលកែច្នៃ និងអាហារដែលត្រូវផ្សែងភ្លើងដូចជាសាច់អាំងជាដើម។ បរិភោគអាហារដែលមានជាតិវីតាមីនឱ្យបានច្រើនដូចជា ផ្លែឈើ បន្លែ និងបញ្ឈប់ការជក់បារីជាបន្ទាន់។ អ្វីដែលសំខាន់បំផុតក្នុងស្ថានភាពនេះ អ្នកត្រូវតែយកចិត្តទុកដាក់ចំពោះសញ្ញា និងការវិវឌ្ឍផ្សេងៗទៀតនៃរាងកាយបង្ហាញ ដូច្នេះចៀសវាងបញ្ហាសុខភាពសំខាន់ៗ។
កត្តាដែលនាំឱ្យកើតជំងឺមហារីកក្រពះ
- ជំងឺ lymphoma (ក្រុមឈាមដែលកើតជំងឺមហារីក)
- ការកើត និងឆ្លងមេរោគក្រពះ H.Pylori ហើយមិនបានទទួលការព្យាបាលត្រឹមត្រូវ ( ដែលអាចបណ្តាលឱ្យមានជំងឺដំបៅក្រពះ )
- ការកើតសាច់ដុំនៅផ្នែកមួយចំនួននៃរាងកាយខាងក្នុង
- ដុះសាច់ក្នុងក្រពះដែលហៅថា Stomach polyps ជាការលូតលាស់មិនធម្មតានៃជាលិកាដែលបង្កើតជាដុំសាច់នៅលើស្រទាប់ក្រពះ
- មនុស្សដែលស្ថិតនៅក្នុងវ័យចំណាស់ចាប់ពីអាយុ ៥០ឆ្នាំឡើងទៅជាពិសេសមនុស្សប្រុស
- អ្នកដែលជក់បារី និងផឹកស្រាច្រើនហួសហេតុពេក
- មនុស្សដែលស្ថិតនៅក្នុងគ្រួសារដែលមានប្រវត្តិនៃការកើតជំងឺមហារីក
- ការបរិភោគអាហារដែលប្រៃខ្លាំងពេក និងអាហារ ឬ ភេសជ្ជៈដែលកែច្នៃ
- មិនដែលធ្វើការហាត់ប្រាណទាល់តែសោះ
- ការចំអិន និងទុកដាក់អាហារមិនបានត្រឹមត្រូវជាដើម៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]