រាជធានីភ្នំពេញ ៖ ស្ត្រីមេម៉ាយកូនបីម្នាក់ត្រូវបានសមត្ថកិច្ចសង្ស័យថា មានជម្ងឺសសៃប្រសាទ និងបានប្រទះឃើញនាងបានស្រែកយំឡាំប៉ាយ៉ាងខ្លាំងនៅនៅតាមផ្លូវក្បែរចំណតរថយន្តចោមចៅ ។ ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី១៧ ខែកញ្ញា ឆ្នាំ២០១៧ នៅចំណុចរង្វង់មូលថ្នល់បំបែកចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
នាងក្រមុំខាងលើនោះបានប្រាប់ថា នាងឈ្មោះ ស.ច.ស.ព អាយុ២៦ឆ្នាំ មានទីលំនៅក្នុងស្រុកភ្នំស្រួច ខេត្តកំពង់ស្ពឺ ។ ស្ត្រីខាងលើបានប្រាប់នគរបាលថា នាងជាស្រីមេម៉ាយលែងលះគ្នាជាមួយប្ដី ហើយមានកូនចំនួន៣នាក់នៅក្នុងបន្ទុកគ្រួសារ ដោយសារតែជីវភាពខ្វះខាតនាងបានចេញពីផ្ទះដើររកការងារធ្វើនៅភ្នំពេញច្រើនថ្ងៃមកហើយ ដោយនាងបានទៅដល់ផ្សារដើមគរ ខណ្ឌទួលគោក ហើយបានឃើញហាងលក់បាយ និងគុយទាវមួយនៅទីនោះមានជ្រើសរើសកម្មករលាងចាននាងក៏បានសុំគេធ្វើការជាអ្នកលាងចាននៅទីនោះ ។ បន្ទាប់មកម្ចាស់ហាងបានទទួលយកនាងឲ្យធ្វើការ ហើយនាងបានខិតខំធ្វើការដើម្បីសន្សំលុយទៅផ្ទះក្នុងថ្ងៃភ្ជុំបិណ្ឌលុះដល់ថ្ងៃកើតហេតុខាងលើនាងបានសម្ចាស់ហាងបើកលុយដើម្បីទៅផ្ទះប៉ុន្តែម្ចាស់ហាងមិនបើកលុយឲ្យឡើយដែលជាហេតុធ្វើឲ្យនាងគ្មានលុយសូម្បី១រៀលជាប់ខ្លួនទេ ក៏សម្រេចចិត្តដើរតាំងពីផ្សារដើមគរទៅកាន់ចំណតរថយន្តចោមចៅក្នុងបំណងជិះរថយន្តឈ្នួលពីទីនោះទៅផ្ទះ ។ ប៉ុន្តែពេលទៅដល់ចំណតរថយន្តខាងលើនាងបានឡើងជិះរថយន្តឈ្នួល ប៉ុន្តែដោយគ្មានលុយឲ្យគេក៏ត្រូវគេដេញឲ្យចុះចេញពីរថយន្តមិនឲ្យជិះឡើយដោយសារតែបែបនេះទើបបានជានាងយំឡាំប៉ា ព្រោះនាងខឹងនឹងម្ចាស់រថយន្តនោះខ្លាំងណាស់ ។ មិនតែប៉ុណ្ណោះនាងបានសុំរថយន្តកុងតឺន័រ១គ្រឿងជិះ ប៉ុន្តែអ្នកបើកបររថយន្តនោះចិត្តកំណាញ់អត់ឲ្យជិះទៀត ទើបនាងរត់ឡើងទៅលើដំបូលរថយន្តកុងតឺន័រដោយមិនដឹងខ្លួនឡើយ ហើយក៏ចង់តែលោតចុះមកសម្លាប់ខ្លួនទៀតផង ព្រោះតូចចិត្តទៅជិះរថយន្តមួយណាក៏ត្រូវបានគេដេញឲ្យចុះចេញដែរ ។
នគរបាលបាននិយាយថា សង្ស័យស្ត្រីខាងលើនោះមានជម្ងឺសសៃប្រសាទ ព្រោះមើលទៅនាងហាក់មានសភាពមិនសូវប្រក្រតីនោះទេនាងនិយាយបែបរវើរវាយមិនសូវប្រាកដប្រជានោះឡើយ នៅក្នុងខណៈដែលនាងឡើងទៅលើដំបូលរថយន្តកុងតឺន័រ ហើយមានកម្លាំងសមត្ថមិច្ចម្រុះចុះទៅអន្តរាគមន៍នោះ នាងបានថ្វាយបង្គំនិងនិយាយថា «ពូអើយខ្ញុំសុំទោស ខ្ញុំខុសហើយៗ» ដោយមិនដឹងថានាងមានកំហុសអ្វីនោះឡើយ ។ លុះក្រោយពេលកម្លាំងលួងលោមឲ្យចុះមកវិញរួចបាននាំទៅសាលាសង្កាត់ចោមចៅនោះនាងបានលុតជង្គង់ថ្វាយបង្គំមន្ត្រីសាលាសង្កាត់ និងនគរបាលនៅទីនោះទៀត និងនិយាយនូវពាក្យដដែលៗបែបនេះទៀត លោក អ៊ឹម វណ្ណា ចៅសង្កាត់រងសង្កាត់ចោមចៅបានឲ្យលុយចំនួន១០ដុល្លារដល់នាង និងឲ្យនាងរង់ចាំក្រុមគ្រួសារទៅទទួលយក តែនាងមិនព្រមបានលួចរត់ចេញពីសាលាសង្កាត់ឡើងជិះរថយន្តឈ្នួលទៅផ្ទះបាត់ស្រមោល ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]