រ៉េត ស៊ូហ្សាណា ចេញមុខបកស្រាយ ទាក់ទងរឿងគេល្បីថា នាងចេញពីហង្សមាស!

ភ្នំពេញ៖ ម្សិលមិញនេះ ផ្ទុះរឿងតារាចម្រៀងស្រីវ័យក្មេងរបស់ផលិតកម្មរស្មីហង្សមាសកញ្ញា រ៉េត ស៊ូហ្សាណា ដោយមានបណ្តាសារព័ត៌មាននៅក្នុងស្រុក ព្រោងព្រាតបានចុះផ្សាយថានាងនឹងធ្វើការចាកចេញពីផលិតកម្មរស្មីហង្សមាស។

ប៉ុន្តែភ្លាមៗនោះ កញ្ញា រ៉េត ស៊ូហ្សាណា ក៏បានចេញមកច្រានចោលដំណឹងនេះទាំងស្រុង ព្រមជាមួយនឹងការបកស្រាយ នៅលើបណ្តាញសង្គមហ្វេសប៊ុកផ្ទាល់របស់ខ្លួនទាំងស្រុងដូច្នេះថា៖

«នាងខ្ញុំសូមជំរាបសួរ ពុកម៉ែ បងប្អូនទូទាំងប្រទេសទាំងអស់ ជាពិសេសបងៗអ្នកបណ្តាសារព័ត៌មានទាំងអស់ដែលបានចុះផ្សាយថា នាងខ្ញុំនឹងចាកចេញពីក្រុមហ៊ុនហង្សមាស ដែលមិនបានសម្ភាសន៍ នាងខ្ញុំ និងក្រុមគ្រួសារខ្ញុំ។ ខ្ញុំចង់ជំរាបបងប្អូនថា ព័ត៌មាននេះគ្រាន់តែជាព័ត៌មាន ក្លែងក្លាយ មិនពិតទេ សង្ឃឹមថាបងប្អូនកុំយល់ច្រឡំ។ នាងខ្ញុំនៅមានចម្រៀងជាច្រើនទៀតនឹងចេញក្នុងពេលឆាប់ៗនេះ ហើយនាងខ្ញុំក៏មានការសម្តែងក្នុងរឿងភាគរបស់ទូរទស្សន៍ហង្សមាស នាងខ្ញុំនៅតែបន្តលើវិថីសិល្បៈមួយនេះក្នុងក្រុមហ៊ុនហង្សមាស។ អរគុណចំពោះការស្រលាញ់គាំទ្ររូបនាងខ្ញុំ»។

ដូច្នេះកញ្ញា រ៉េត ស៊ូហ្សាណា សង្ឃឹមថាអ្នកគាំទ្រ ក៏ដូចជាមហាជនទូទៅកុំមានការយល់ច្រឡំចំពោះរូបនាងបន្តទៅទៀត។ ចំពោះព័ត៌មានយ៉ាងណា ខ្មែរឡូត នឹងធ្វើការចុះផ្សាយជាបន្តបន្ទាប់៕

• រ៉េត ស៊ូហ្សាណា