ខេត្តកំពង់ស្ពឺ ៖ ស្ត្រីម្នាក់ និងប្តី រួមទាំងម្តាយបានដង្ហោយរកយុត្តិធម៌ក្រោយរងការវាយដំពីសំណាក់មន្ត្រីឧទ្យាអនុរ័ក្ស៣នាក់ ដែលប្រចាំការនៅចំណុចអូរស្រីចាំ ព្រោះតែរឿងបង់លុយថ្លៃដឹកអុសឱ្យតិចពេក។ មកដល់ពេលនេះស្ត្រីរងគ្រោះដោយការវាយដំបានស្នើសុំដល់លោកអភិបាលខេត្ត និងលោករដ្ឋមន្ត្រីក្រសួងបរិស្ថាន សូមជួយអន្តរាគមន៍ផ្តល់យុត្តិធម៌ដល់រូបគាត់ជាជនរងគ្រោះផង។
ជួបជាមួយអ្នកយកព័ត៌មានកោះសន្តិភាពនៅមន្ទីរពេទ្យខេត្តកំពង់ស្ពឺកាលព្រឹកថ្ងៃទី១៧ កញ្ញា ស្ត្រីឈ្មោះ ប៉ែន ហ៊ុល អាយុ៦១ឆ្នាំ រស់នៅភូមិជាំ ឃុំតាសាល ស្រុកឱរ៉ាល់ ។ ស្ត្រីជាម្តាយបន្តថា កូនគាត់រាល់ថ្ងៃនេះមានជីវភាពក្រីក្រជាខ្លាំង ហើយពេលនេះត្រូវមកដេកព្យាបាលជំងឺ ដោយមិនមានលុយជាប់ខ្លួនសូម្បី១០.០០០រៀល។ ដំបូងឡើយគាត់មិនបានដឹងថា កូនត្រូវមន្ត្រីបរិស្ថានព្រួតវាយរហូតសន្លប់ជិតបីម៉ោង ព្រោះរឿងបង់លុយថ្លៃដឹកអុសនោះទេ ទាល់តែកូនត្រូវបានប្តីនាំមកកាន់មន្ទីរពេទ្យធ្វើការសង្គ្រោះ ទើបគាត់ជាម្តាយដឹងការពិត។ ក្នុងនាមគាត់ជាម្តាយមានការអាណិតអាសូរកូនពន់ពេក គាត់ដឹងថា របររកស៊ីដឹកអុសលក់នេះខុសច្បាប់ដែរ តែដោយជីវភាព ទើបគាត់ឱ្យកូនដឹកលក់នឹងគេឯងទៅ។
ស្ត្រីជាម្តាយបានរៀបរាប់បន្តថា មុនពេលទៅដឹកអុសនេះ គាត់បានឃាត់ដែរថា កុំឱ្យទៅ ព្រោះជិតដល់ថ្ងៃភ្ជុំហើយ តែកូនបានតបមកវិញថា ព្រោះតែជិតដល់ថ្ងៃភ្ជុំណឹងហើយ ទើបសុខចិត្តចូលព្រៃកាប់អុសយកមកលក់ ដើម្បីបានប្រាក់យកមកផ្គត់ផ្គង់ការចំណាយទិញម្ហូបអាហារសម្រាប់ទៅវត្ត។ និយាយបណ្តើរ ទឹកភ្នែកហូរបណ្តើរស្ត្រីជាម្តាយបន្តថា ពេលនេះមិនត្រឹមតែមិនមានលុយទិញម្ហូបធ្វើចង្ហាន់ប្រគេនព្រះសង្ឃនោះទេ សូម្បីតែចៅៗរបស់គាត់ក៏ដាច់បាយម្តងៗដែរ ហើយការចំណាយវិញក៏កាន់តែច្រើនដែរ។ គាត់មិនចង់ឱ្យកូនមានរឿងវែងឆ្ងាយនោះទេ គ្រាន់តែចង់សុំឱ្យមានយុត្តិធម៌ដល់កូនគាត់ផង ជាពិសេសក្នុងនាមជាម្តាយសូមសំណូមពរដល់លោកស្នងការនគរបាលខេត្ត សូមជួយចាប់ជនបង្កអំពើហិង្សាលើកូនស្រីគាត់ចាត់ការតាមច្បាប់ផង ដើម្បីកុំឱ្យពួកគេចេះតែធ្វើអ្វីតាមអំពើចិត្តបែបនេះ។ បើទោះជាមានជីវភាពក្រីក្រ តែពួកគាត់ក៏មានសិទ្ធិទទួលបានមកវិញនូវភាពយុត្តិធម៌ដូចពលរដ្ឋដទៃទៀតដែលរស់នៅក្នុងសង្គមនេះដែរ ។ ឬមួយយុត្តិធម៌មានចំពោះតែអ្នកមានលុយ និងអំណាច? ហើយអ្នកក្រីក្ររង់ចាំតែភាពអយុត្តិធម៌ដូចគ្រួសារគាត់បែបនេះឬ?
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
