រាជធានីភ្នំពេញ ៖ បុរសម្នាក់កំពុងតែជិះម៉ូតូធ្វើដំណើរតាមផ្លូវក៏ស្រាប់តែមានបុរសបីនាក់ទៀតដែលជាជនជាតិវៀតណាមបានជិះម៉ូតូមួយគ្រឿងធ្វើដំណើរបញ្ច្រាសទិសដៅចរាចរណ៍គ្នាបានជ្រុលទៅបុកចំពីមុខពេញហឹង បណ្តាលឱ្យស្លាប់ម្នាក់ និងរងរបួសធ្ងន់បីនាក់ ហេតុការណ៍នេះបានកើតឡើងនៅវេលាម៉ោង៩យប់ ថ្ងៃទី៦ ខែកញ្ញា ឆ្នាំ២០១៧ ទុលមុខអតីតរោងចក្រតាក់ហ្វាន់ ផ្លូវជាតិលេខ២ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
សពជនរងគ្រោះមានឈ្មោះ យី សំអឿន ភេទប្រុស អាយុ៣២ឆ្នាំ មុខរបរកម្មករសំណង់ ស្នាក់នៅផ្ទះជួលសង្កាត់ចាក់អង្រែលើ ខណ្ឌមានជ័យ មានស្រុកកំណើតនៅភូមិត្រពាំងកំប្លេ ឃុំត្រពាំងកំប្លេ ស្រុកអង្គរជ័យ ខេត្តកំពត ជិះម៉ូតូម៉ាកស្មាសវី ពណ៌ខ្មៅ ពាក់ស្លាកលេខ តាកែវ ១E-៦៤១៤ ។
ចំណែកបុរសបីនាក់ទៀតដែលជនជាតិវៀតណាមរងរបួសធ្ងន់មិនទាន់ស្គាល់អត្តសញ្ញាណនៅឡើយទេគ្រាន់តែដឹងថា ជិះម៉ូតូម៉ាក YAMAHA ស៊ីរុស ពណ៌ក្រហម បិទស្កុតពណ៌ខ្មៅ ពាក់ស្លាកលេខ ភ្នំពេញ ១BI-៦២១៥ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូម៉ាក ស្មាសវី ពណ៌ខ្មៅ បានធ្វើដំណើរតាមផ្លូវជាតិលេខ២ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏ស្រាប់តែមានបុរសបីនាក់ដែលជាជនជាតិវៀតណាមមិនដឹងចេញពីផឹកស៊ីនៅកន្លែងណានោះទេ គឺបានជិះម៉ូតូម៉ាក YAMAHA ស៊ីរ៉ុស ក្នុងទិសដៅពីជើងទៅត្បូងតែដោយសារតែផ្លូវដែលពួកគេកំពុងតែធ្វើដំណើរត្រូវគេហាមឃាត់មិនឱ្យឆ្លងកាត់ព្រោះផ្លូវកំពុងជួសជុលទើបពួកគេសម្រេចចិត្តជិះទៅផ្លូវម្ខាងទៀតបញ្ច្រាសទិសដៅចរាចរណ៍ក្នុងល្បឿនលឿនព្រមទាំងស្រវឹងផងនោះបានជ្រុលទៅបុកនឹងម៉ូតូដែលជិះដោយបុរសម្នាក់ចំពីមុខពេញទំហឹងបណ្តាលឱ្យអ្នកជិះម៉ូតូម្នាក់ឯងរងរបួសបែកក្បាលបាក់.កស្លាប់នៅនឹងកន្លែងកើតហេតុ ចំណែកម៉ូតូរងការខូចខាត បាក់ខ្នងខាងមុខ ។
ដោយឡែកខាងម៉ូតូដែលជិះគ្នាបីនាក់វិញរងរបួសធ្ងន់សន្លប់ស្តូកស្តឹងត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យកាល់ម៉ែតម្នាក់ និងគ្លិនិកឯកជន២នាក់ ។
ក្រោយពេលកើតហេតុកម្លាំងសមត្ថកិច្ចមូលដ្ឋាន និងជំនាញបានចុះទៅដល់កន្លែងកើតហេតុ និងបានធ្វើការវាស់វែងយកម៉ូតូទាំងពីរគ្រឿងទៅរក្សារទុកនៅការិយាល័យចរាចរណ៍ជើងគោកដើម្បីធ្វើការដោះស្រាយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]