ឃើញគេមានគូ កុំច្រណែនអី ព្រោះថាការគ្មានគូ ក៏មានអត្ថប្រយោជន៍ច្រើនណាស់ដែរ!

គេតែងតែនិយាយថាមនុស្សគ្រប់រូបមានដៃគូជីវិតដែលបានកំណត់តាំងពីជាតិមុនមកម្ល៉េះ។ តែបើសិនជាអ្នកមិនទាន់រកឃើញគូកុំអាលពិបាកចិត្តអី ព្រោះថាការគ្មានគូស្នេហ៍ក៏មានអត្ថប្រយោជន៍ផងដែរ។

អត្ថប្រយោជន៍នៃការគ្មានគូស្នេហ៍រួមមាន៖ 

១. អាចធ្វើដំណើរតាមចំណង់ចំណូលចិត្ត

អ្នកដែលមានដៃគូតែងតែសម្រេចចិត្តធ្វើដំណើរទៅកន្លែងកម្សាន្តណាដែលដៃគូរបស់ខ្លួនចូលចិត្ត។ ប៉ុន្តែសម្រាប់អ្នកនៅលីវវិញ ពួកគេមានសេរីភាពក្នុងការធ្វើដំណើរទៅកន្លែងណាដែលគេចូលចិត្តដោយគ្មានការស្ទាក់ស្ទើរដែរ។

២. សល់លុយច្រើន

ការណាត់ជួបដើម្បីញាំអាហារ ការដើរលេង និងការទិញអំណោយតម្រូវឲ្យអ្នកចំណាយប្រាក់យ៉ាងច្រើន។  ទោះបីជាអ្នកចេញរាល់ការចំណាយរៀងខ្លួនក៏ដោយ ក៏អ្នកដែលមានគូស្នេហ៍នៅតែចំណាយប្រាក់ច្រើនជាងអ្នកដែលនៅម្នាក់ឯងដែរ។  

៣. ជួយអ្នកក្នុងការរក្សាទម្ងន់

ការសិក្សាមួយនៅក្នុងចក្រភពអង់គ្លេសបានរកឃើញថា ដៃគូសង្សាចំនួន ៦២ភាគរយបានឡើងទម្ងន់បន្ទាប់ពីពួកគេមានស្នេហា។ ការឡើងទម្ងន់នេះកើតឡើងដោយសារការណាត់ជួបគ្នាដើម្បីញ៊ាំអាហារ។ ដូចនេះមានន័យថា អ្នកដែលគ្មានគូស្នេហ៍អាចផ្តោតទៅលើការទទួលទានចំណីអាហារបានល្អជាង។

៤. មានពេលទំនេរច្រើន

គូស្នេហ៍ជាច្រើនមានការព្រួយបារម្ភពីគ្នា ឬនឹកគ្នា ដូច្នេះបានជាពួកគេធ្វើការប្រាស្រ័យទាក់ទងគ្នាជានិច្ចក្នុងមួយថ្ងៃៗ  ហើយអ្នកដែលមានគូស្នេហ៍ភាគច្រើនបានចំណាយពេលយ៉ាងច្រើនក្នុងការនិយាយទូរស័ព្ទ ផ្ញើសារ ឬណាត់ជួបគ្នា។ ម្យ៉ាងទៀតវានឹងធ្វើឲ្យពួកគេបាត់បង់ពេលទំនេរសម្រាប់ខ្លួនឯងផងដែរ។ 

៥. ចេះពឹងផ្អែកលើខ្លួនឯង

អ្នកដែលមានគូស្នេហ៍តែងតែពឹងផ្អែកយ៉ាងខ្លាំងទៅលើដៃគូរបស់ពួកគេ មិនថាពេលដែលពួកគេពិបាកចិត្ត  ឬក៏ពេលដែលត្រូវការជំនួយនោះទេ។ ដូច្នេះវាអាចក្លាយជាទម្លាប់មួយដ៏អាក្រក់  ព្រោះពេលពួកគេចែកផ្លូវគ្នា ពួកគេនឹងពិបាករស់នៅម្នាក់ឯងដោយសារគ្មានអ្នកសម្រាប់ពឹងពាក់មិនខាន។  ដោយឡែកសម្រាប់អ្នកដែលគ្មានគូ ពួកគេមានសមត្ថភាពការដោះស្រាយបញ្ហា  ឬធ្វើអ្វីៗដោយពឹងលើខ្លួនឯងស្រាប់ ដូច្នេះពួកគេអាចធ្វើអ្វីៗដោយខ្លួនឯងបាន ទោះបីជាមិនមានជំនួយក៏ដោយ។ 

៦. មានពេលវេលាសម្រាប់ក្រុមគ្រួសារនិងមិត្តភក្តិ

នៅពេលដែលអ្នកមានគូស្នេហ៍ អ្នកមិនសូវជាមានពេលសម្រាប់ក្រុមគ្រួសារ និងមិត្តភក្តិទេ ព្រោះចំណាយពេលយ៉ាងច្រើនជាមួយមនុស្សដែលខ្លួនស្រលាញ់។ ហើយបើសិនជាបានរៀបការជាមួយគ្នា និងមានកូនទៀតនោះ  ឱកាស និងពេលវេលាសម្រាប់ជួបជុំក្រុមគ្រួសារ ឬមិត្តភក្តិ រឹតតែតិចទៀតហើយ។ 

៧. អាចជៀសផុតពីបញ្ហាខូចចិត្ត

មានគូស្នេហ៍ និងគូស្វាមីភរិយាជាច្រើនបានធ្វើការចែកផ្លូវគ្នា  ហើយបើទោះបីជាការបែកគ្នានេះមានរយៈពេលយូរយ៉ាងណាក៏ដោយ  ក៏របួសបេះដូង  និងបញ្ហាផ្លូវចិត្តនៅតែដក់ជាប់ជានិច្ច។  ប៉ុន្តែបើសិនជាអ្នកគ្មានដៃគូស្នេហ៍ស្រាប់់់តែម្តង នោះអ្នកមិនបាច់បារម្ភថាអ្នកនឹងជួបបញ្ហាស្នេហានោះទេ។ 

៨. មានសេរីភាព

គូស្នេហ៍តែងតែធ្វើការសម្រេចចិត្តជាមួយគ្នា  ដូច្នេះហើយទើបអ្នកដែលមានដៃគូមិនសូវជាមានសេរីភាពធ្វើអ្វីដែលខ្លួនចង់ធ្វើនោះទេ។ ឧទាហរណ៍ដូចជាការដើរលេងយប់អ៊ីចឹង  នៅពេលអ្នកមានគូ  គឺមិនអាចដើរលេងយប់បានច្រើនទេ ព្រោះខ្លាចគូស្នេហ៍មានការខឹង ឬអន់ចិត្ត។ ដោយឡែកសម្រាប់អ្នកនៅតែឯង គេអាចធ្វើអ្វីក៏បានដែរ ឲ្យតែខ្លួនគេចង់ ព្រោះគ្មាននរណាមកគ្រប់គ្រងគេនោះទេ ដូច្នេះគេមានសេរីភាពយ៉ាងខ្លាំង។ 

៩. មិនសូវមានអារម្មណ៍ពិបាកចិត្ត

អ្នកដែលមានស្នេហាតែងតែមានអារម្មណ៍ពិបាកចិត្ត ព្រោះជួនកាលគេមានជម្លោះ ឬក៏ការមិនយល់ចិត្តគ្នា។  ហើយការពិបាកចិត្តនេះនឹងកើតមានឡើងជានិច្ចកាលផងដែរ  ដូច្នេះហើយទើបអ្នកដែលមានគូប្រឈមមុខនឹងការពិបាកចិត្តច្រើនជាងអ្នកដែលគ្មានគូនោះ៕