មនុស្សរាល់គ្នាប្រាកដជាដឹងច្បាស់ថាការឡើងសម្ពាធឈាមខ្ពស់អាចបង្កគ្រោះថ្នាក់ជាច្រើនដល់សុខភាពរបស់អ្នកដូចជាជំងឺដាច់សសៃឈាមខួរក្បាល គាំងបេះដូង និងខ្សោយតម្រងនោមជាដើម ហើយករណីធ្ងន់ធ្ងរអាចមានគ្រោះថ្នាក់ដល់អាយុជីវិតទៀតផង។
តែអ្នកប្រហែលជាមិនធ្លាប់ដឹងទេថា ការដែលសម្ពាធឈាមអ្នកចុះខ្សោយពេក ក៏វាអាចបង្កជាគ្រោះថ្នាក់ដល់សុខភាពរាងកាយបានដែរ ដោយវានឹងធ្វើឲ្យអ្នកមិនទទួលបានអុកស៊ីហ្សែនគ្រប់គ្រាន់ដើម្បីបំពេញមុខងាររបស់វា ហើយអាចបណ្តាលឱ្យខូចមុខងារនៃបេះដូង និងខួរក្បាលក៏ដូចជាធ្វើឱ្យពិបាកដកដង្ហើមជាដើម។
ខាងក្រោមនេះជាមូលហេតុ និងរោគសញ្ញា ដែលធ្វើឱ្យសម្ពាធឈាមចុះខ្សោយ
មូលហេតុនៃសម្ពាធឈាមខ្សោយ៖
- ការមានផ្ទៃពោះ
- ការបាត់បង់ឈាមយ៉ាងច្រើនដោយសារការរងរបួស
- ឈាមខ្សោយបណ្តាលមកពីជំងឺខ្សោយបេះដូង និងជំងឺគាំងបេះដូង
- ការខ្វះជាតិទឹក
- ការបញ្ចុះទម្ងន់
- ជំងឺក្រពេញដូចជាជំងឺទឹកនោមផ្អែម និងជំងឺក្រពេញទីរ៉ូអ៊ីត
- ការប្រើប្រាស់ថ្នាំមួយចំនួនដូចជាថ្នាំបេតាប្លុក, ថ្នាំបញ្ចុះទឹកនោម, ថ្នាំប្រឆាំងនឹងជំងឺធ្លាក់ទឹកចិត្ត ជាដើម
- កង្វះវីតាមីន B12 និងអាស៊ីតហ្វូលិក ដែលអាចបណ្តាលឱ្យមានភាពស្លេកស្លាំង
រោគសញ្ញា និងគ្រោះថ្នាក់ ដែលបញ្ជាក់ប្រាប់ថាអ្នកកំពុងប្រឈមនឹងបញ្ហាសម្ពាធឈាមខ្សោយ
១.ឈឺក្បាលវិលមុខ
ពេលដែលសម្ពាធឈាមទាបបណ្តាលឱ្យលំហូរឈាមទៅកាន់ខួរក្បាលហូរយឺតៗ និងខ្សោយ។ ហើយវាថែមទាំងកាត់បន្ថយការផ្គត់ផ្គង់អុកស៊ីសែនទៅកាន់ខួរក្បាល ដែលវាបណ្តាលធ្វើឱ្យអ្នកមានអារម្មណ៍ថា វិលមុខ និងឈឺក្បាល។
អាការនេះជាញឹកញាប់អាចកើតឡើងជាធម្មតា នៅពេលដែលអ្នកធ្វើការផ្លាស់ប្តូរ ចលនា និងទីតាំងភ្លាមៗពេក ដូចជាការងើបក្រោកលឿនពេកពេលភ្ញាក់ពីព្រលឹមជាដើម។
២.អស់កម្លាំង
លំហូរឈាមដើរតួនាទីសំខាន់ខ្លាំងណាស់ក្នុងការផលិតថាមពលដោយវាជាអ្នកផ្តល់អុកស៊ីហ្សែន និងសារធាតុចិញ្ចឹមចាំបាច់ជាច្រើនទៅកាន់រាងកាយទាំងមូល។ហើយនៅពេលដែលលំហូរនៃសម្ពាធឈាមធ្លាក់ចុះ វានឹងបង្អាក់ដំណើរការបង្កើតថាមពលដែលបណ្តាលឱ្យអស់កម្លាំង និងល្ហិតល្ហៃ។
ប៉ុន្តែអាការនេះក៏អាចបណ្តាលមកពីការមិនបានសម្រាកគ្រប់គ្រាន់ ឬ ខ្វះជាតិស្ករផងដែរ។
៣.បេះដូងលោតញាប់
នៅពេលដែលលំហូរឈាមខ្សោយ វានឹងធ្វើឈាមធ្វើដំណើរទៅកាន់បេះដូងយឺត ហើយធ្វើឱ្យចង្វាក់បេះដូងចុះខ្សោយ។ ប្រសិនបើបេះដូងមិនត្រូវបានបំពេញដោយបរិមាណឈាមដែលសមស្របនោះទេ វានឹងធ្វើឱ្យបេះដូងលោតញាប់ ជីពចរខ្សោយ និងចង្វាក់នៃការដកដង្ហើមរបស់អ្នកកើនឡើងថែមទៀតផង។
៤.ត្រជាក់ចុងដៃចុងជើង និងស្លេកស្លាំង
នៅពេលដែលសីតុណ្ហភាពរាងកាយផ្លាស់ប្តូរធ្វើឱ្យរាងកាយអ្នកប្រែជាត្រជាក់ និងមានអាការស្លេកស្លាំង នោះវាក៏ជារោគសញ្ញាមួយនៃសម្ពាធឈាមខ្សោយផងដែរ ព្រោះថាវាបណ្តាលមកពីលំហូរឈាមរបស់អ្នកមិនបានបំពេញតួនាទីគ្រប់គ្រាន់សម្រាប់ផ្គត់ផ្គង់រាងកាយទាំងមូល។
៥.ពិបាកក្នុងផ្តោតអារម្មណ៍
ប្រសិនបើអ្នកចាប់ផ្តើមមានអារម្មណ៍មិនសូវស្រួល ហើយមិនអាចផ្តោតអារម្មណ៍លើអ្វីដែលអ្នកកំពុងធ្វើ ទោះបីជាអ្នកព្យាយាមខ្លាំងក៏ដោយនោះ គឺអាចបណ្តាលមកពីសម្ពាធឈាមរបស់អ្នកខុះខ្សោយ ព្រោះថាសម្ពាធឈាមមិនបានបំពេញតួនាទីរបស់ខ្លួនឱ្យបានពេញលេញទៅកាន់ខួរក្បាលនោះទេ។ នេះមានន័យថា កោសិកាខួរក្បាលមិនបានទទួលអុកស៊ីសែន និងអាហារបំប៉នចាំបាច់គ្រប់គ្រាន់ដើម្បីដំណើរការល្អឡើយ ដូច្នេះវានឹងបណ្តាលឱ្យមានការលំបាកក្នុងការប្រមូលផ្តុំអារម្មណ៍ទៅលើមនុស្សភាគច្រើនដែលមានបញ្ហាសម្ពាធឈាមទាប។
៦.ស្រេកទឹកខ្លាំងខុសពីធម្មតា
ការស្រេកទឹកខ្លាំងហើយផឹកទឹកច្រើនខុសពីធម្មតា ជួនកាលវាមិនមែនបណ្តាលមកពីរាងកាយរបស់អ្នកខ្វះជាតិទឹកនោះទេ វាជារោគសញ្ញាដែលបញ្ជាក់ប្រាប់ថា សម្ពាធឈាមរបស់អ្នកចុះទាប ហើយត្រូវការបន្ថែមជាតិទឹកនៅក្នុងឈាមដើម្បីបង្កើនសម្ពាធឈាមឡើងវិញ។
៧. ព្រិល ឬស្រវាំងភ្នែក
អាការស្រវាំងភ្នែក ព្រិលភ្នែក ដែលមើលអ្វីមិនសូវឃើញច្បាស់ នោះវាអាចជារោគសញ្ញាមួយនៃសម្ពាធឈាមទាបផងដែរ។ ការខ្វះខាតអុកស៊ីសែននៅក្នុងឈាមដែលបណ្តាលមកពីការធ្លាក់ចុះនៃសម្ពាធឈាម អាចប៉ះពាល់ដល់ចលនាភ្នែកយ៉ាងខ្លាំង។
៨. រោគសញ្ញាតិចតួចផ្សេងទៀត
សម្ពាធឈាមទាប អាចបណ្តាលអោយមានរោគសញ្ញាផ្សេងៗមួយចំនួន ដូចជាអាការ ក្អួត ចង្អោរ ការធ្លាក់ទឹកចិត្ត ការបាត់បង់ស្មារតី ឈឺក្បាល ឈឺក ក្អករ៉ាំរ៉ៃ ឈឺខ្នង និងប្រព័ន្ធរំលាយអាហារធ្វើការមិនល្អជាដើម។
### ចំណាំ ###
ចូរចាំថាមានតែគ្រូពេទ្យជំនាញតែប៉ុណ្ណោះ ដែលអាចបញ្ជាក់ប្រាប់បានថា អ្នកពិតជាមានបញ្ហាសម្ពាធឈាមចុះខ្សោយមែនឬក៏អត់ ដោយការធ្វើតេស្តដោយប្រដាប់វាស់សម្ពាធឈាម។ ដូច្នេះគ្រូពេទ្យនឹងអាចព្យាបាល និងផ្តល់ការប្រឹក្សាបន្ថែមសម្រាប់សុខភាពរាងកាយរបស់អ្នក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]