រាជធានីភ្នំពេញ ៖ តារាចម្រៀងមួយចំនួនដែលនិយមច្រៀងបទជំនាន់លោកស៊ីន ស៊ីសាមុត ទាក់ទាញបានការចាប់អារម្មណ៍សម្រាប់ជនរួមជាតិខ្មែរនៅក្រៅប្រទេស ។
កញ្ញាទៀង មុំសុធាវី ជាតារាចម្រៀងមានទឹកដមសំឡេងពីរោះ ហើយមានឱកាសទៅសម្តែងនៅក្រៅប្រទេសជារឿយៗ ។ ទៀង មុំសុធាវី ជាអ្នកចម្រៀងចេញពីសាលាវិចិត្រសិល្បៈ ហើយក្រៅពីនោះនាងជាតារាចម្រៀងមានឱកាសច្រៀងក្នុងព្រះបរមរាជវាំងផងដែរ ។
បទចម្រៀងជាច្រើនជំនាន់អ្នកស្រីរស់ សេរីសុទ្ធា ត្រូវទៀង មុំសុធាវី ចេះចាំច្រើន ហើយតែងតែយកទៅច្រៀងនៅក្រៅប្រទេស ។ ប្រទេសដែលសុធាវី ធ្លាប់ចេញទៅបំពេអារម្មណ៍ជនរួមជាតិខ្មែររួមមានអាមេរិក បារាំង អូស្ត្រាលីព្រមទាំងបណ្តាប្រទេសក្នុងតំបន់អាស៊ាន ។ ថ្មីៗនេះទៀង មុំសុធាវី ទើបតែត្រឡប់មកពីសម្តែងនៅអាមេរិក ។
កញ្ញាស៊ូ ដាណេ ជាតារាចម្រៀងបែបមនោសញ្ចេតនាដែលចេញពីក្រុមសិល្បៈរាជធានីភ្នំពេញ មានទឹកដមសំឡេងពីរោះស្រដៀងអ្នកស្រីប៉ែន រ៉ន ។ ដាណេចេះបទចម្រៀងអ្នកស្រីប៉ែន រ៉ន និងរស់ សេរីសុទ្ធា ច្រើនបទ ។
ស៊ូ ដាណេ អាចសម្តែងរបាំ និងចេះស្មូត្រកំណាព្យយ៉ាងពីរោះធ្លាប់ទៅច្រៀងនៅអាមេរិកច្រើនដងមកហើយ ដូច្នេះពេលសម្ភាសន៍វិញនៅស្ថានទូតអាមេរិកប្រចាំនៅកម្ពុជាបានជាប់លឿន ។
ស៊ូ ដាណេ កំពុងតែហាត់ច្រៀងបទពីដើម និងបទមហោរី ប្រពៃណីឱ្យបានច្រើនថែមទៀត ។
អ្នកនាងមាស អាលីស ជាអ្នកចម្រៀងទើបតែលេចធ្លោមួយរយៈកន្លងមកនេះ ក្រោយពីធ្វើឱ្យមានការចាប់អារម្មណ៍ចំពោះទឹកដមសំឡេងស្រដៀងអ្នកស្រីហួយ មាស ។ មាស អាលីស អាចច្រៀងបទពីដើមបានពីរោះ ហើយមានឱកាសសម្តែងតាមទូរទស្សន៍ជាបន្តបន្ទាប់ដូចជាទូរទស្សន៍បាយ័ន និងស៊ីធីអិនជាដើម ។
មាស អាលីស កំពុងមានតម្រុយចាកចេញទៅច្រៀងនៅប្រទេសកាណាដាដោយជនរួមជាតិខ្មែរនៅទីនោះចាប់អារម្មណ៍ទឹកដមសំឡេងរបស់នាងស្រដៀងអ្នកស្រីហួយ មាស។ អាលីសកំពុងតែខំហាត់បទចម្រៀង ល្បីៗរបស់អ្នកស្រីហួយ មាស ដើម្បីបំពេអារម្មណ៍ទស្សនិកជន ។
អ្នកនាងមាស លក្ខិណា ជាអ្នកចម្រៀងនិយមច្រៀងបទពីដើមបានយ៉ាងពីរោះ ហើយឧស្សាហ៍បង្ហាញមុខក្នុងកម្មវិធី«ប្រជុំតារាតន្ត្រី», «តន្ត្រីស្រុកស្រែ», «មន្តស្នេហ៍សំនៀង» និងកម្មវិធីមួយចំនួនទៀតរបស់ស្ថានីយទូរទស្សន៍អប្សរា ។
អ្នកនាងមាស លក្ខិណា មានទឹកដមសំឡេងស្រដៀងអ្នកស្រីរស់ សេរីសុទ្ធា និងចេះចាំស្ទាត់ ជាច្រើនបទ ។
អ្នកនាងមាស លក្ខិណា ទទួលបានការចាប់អារម្មណ៍ពីមហាជនចំពោះទឹកដមសំឡេងលំនាំអ្នកស្រីរស់ សេរីសុទ្ធានេះ ។
លោកចាន់ វិបុល ច្រៀងបទពីដើមបានល្អ ពិសេសបទចម្រៀងលោកស៊ីន ស៊ីសាមុត។ មហាជនពេញចិត្តទឹកដមសំឡេងរបស់លោកវិបុល ។
លោករ័ត្ន មករា ជាអ្នកចម្រៀងនិយមបទពីដើមត្រូវស្ថានីយទូរទស្សន៍ផ្តល់ឱកាសឱ្យឡើងច្រៀងជាបន្តបន្ទាប់ ។
លោករ័ត្ន មករា ធ្លាប់ចេញទៅច្រៀងនៅក្រៅប្រទេសច្រើនដងដែរ ពិសេសទៅច្រៀងនៅប្រទេសអាមេរិក ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]