រាជធានីភ្នំពេញ ៖ នៅទីបំផុតអ្នកនាង ចន ច័ន្ទលក្ខិណា បានបញ្ចេញប្រតិកម្មតបទៅកាន់លោក ម៉ៃ សុគន្ធ វិញ បន្ទាប់ពីទទួលការរិះគន់យ៉ាងធ្ងន់ធ្ងរមកលើរូបនាង។ អ្នកនាង ចន ច័ន្ទលក្ខិណា បានឆ្លើយតបទៅលោក ម៉ៃ សុគន្ធ ឱ្យមានការនិយាយដឹងខុសត្រូវ និងស្គាល់ចាស់ ស្គាល់ធំ និងកុំឱ្យប៉ះពាល់ដល់សមាគមសិល្បករខ្មែរ។
អ្នកនាង ចន ច័ន្ទលក្ខិណា បានបង្ហោះសារយ៉ាងវែងមួយតាមហ្វេសប៊ុកឆ្លើយតបទៅកាន់លោក ម៉ៃ សុគន្ធវិញថា «ខ្ញុំចង់ប្រាប់ថា ខ្ញុំមិនដែលបង្ហោះឆ្លើយតបទៅគាត់នោះទេ តែនិយាយអ្វីឱ្យស្គាល់ខុស ស្គាល់ត្រូវ និងគិតឱ្យបានវែង ដៃមួយចង្អុលគេ កុំភ្លេចម្រាមដៃបីចង្អុលខ្លួនឯង ។ រឿងប្អូនប្រុសខ្ញុំគឺជារឿងគាត់ សមាគមគឺសមាគម ហើយសមាគមក៏មិនមានសិទ្ធិស្តីប្រដៅអ្នកសិល្បៈដែលប្រើសម្ដីអសុរោះ ឬធ្វើទង្វើមិនល្អដែរ អ្នកសិល្បៈចាស់ទុំជាងខ្ញុំមានច្រើនណាស់ ដូច្នេះខ្ញុំមិនអាចថ្លើមធំអាងអំណាចឋានៈ និងតួនាទីទៅប្រដៅមនុស្សចាស់ទេ មានតែគោរពពួកគាត់ ហើយបើប្អូនឱ្យសិទ្ធិបងជាប្រធានសមាគមទៅប្រដៅអ្នកសិល្បៈ គឺបងសុំប្រដៅប្អូនដូចគ្នា ព្រោះសម្ដីប្អូនជេរស្រី និងមហាជនសាហាវជាងអ្វីទាំងអស់ ហើយបើប្អូននិយាយថា ប្រហែលក្នុងគ្រួសារបងប្រើសម្ដីបែបនោះ បងក៏អាចនិយាយថា គ្រួសារ ឬពុកម្តាយប្អូនក៏ជាប្រភេទដូចប្អូនដែរ ហើយបងមានអំណះអំណាងដើម្បីបញ្ជាក់ តែបងមិនបង្ហាញ ព្រោះយល់ថា ជាអ្នកសិល្បៈដូចគ្នា បងសុខចិត្តឱ្យប្អូនឈ្នះបងចុះ ដោយបងមិនត មិននិយាយអ្វីជាសាធារណៈឡើយ» ។
អ្នកនាងបន្តថា «បងសុខចិត្តឆាតទៅប្អូនផ្ទាល់ខ្លួន តែប្អូនវិញបង្ហោះជាសាធារណៈ តើកន្លែងណាដែលប្អូននិយាយថា ប្រធានត្រូវយករឿងរ៉ាវមកដាក់លើតុ ហើយជជែកគ្នា តែក្នុងនាមប្អូនជាកូនចៅសិល្បៈ គឺត្រូវតែនិយាយវាយប្រហារប្រធានជាសាធារណៈ? ប្អូនរិះគន់បង បងទទួល ហើយក៏បានកែតម្រូវ តែក៏សូមប្អូនកែតម្រូវខ្លួនឯងផង មានគេមកប្តឹងបងក្នុងនាមជាប្រធានសមាគមសិល្បៈរឿងទង្វើប្អូនច្រើនគួរសម តែបងសំរួលពួកគេ តែប្អូនត្រូវពិចារណាកំហុសខ្លួនឯងផង បង្ករឿងម្តងហើយម្តងទៀត ម្នាក់ហើយម្នាក់ទៀត រហូតតាមសន្សំរឿងជាមួយប្រធានសមាគមដែលតែងសំរួលមនុស្សដែលខឹងប្អូនជាច្រើនលើកទៀត ។ ខ្លួនប្អូន Share ព័ត៌មានបងហើយ សរសេរវាយប្រហារប្រធានសមាគមយ៉ាងចាស់ដៃ គ្រាន់តែបង Share ព័ត៌មានដែលគេនិយាយអាក្រក់ពីប្អូន បែរជាប្អូនដើរនិយាយថា បងជាប្រធានសមាគមមិនសម និង Share ព័ត៌មាននោះទេ គឺចាត់ក្នុងបទដ្ឋានផ្សំគំនិត និងជននោះ»។
អ្នកនាងបន្តទៀតថា «ឱ! ប្រធានសមាគម ហេតុអ្វីក៏គ្មានអ្នកផ្តល់សិទ្ធិ និងយុត្តិធម៌យ៉ាងដូច្នេះ? ខ្លួនឯងធ្វើអ្វីក៏បាន ខ្ញុំធ្វើមិនបាន តើយុត្តិធម៌សម្រាប់ខ្ញុំនៅឯណា? គួរបញ្ឈប់ទង្វើបែបនោះទៅ ក្រែងថ្ងៃណាមួយប្អូន និងត្រូវពឹងពាក់ប្រធានសមាគមដែលជាមនុស្សស្រី ដែលប្អូនកំពុងមើលងាយរាល់ថ្ងៃនេះ ។ កុំអាងតែរិះគន់គេ ហើយគេធ្វើតាមប្អូនបានចិត្តពេក ខ្លួនយើងរាល់ថ្ងៃជាអ្វីបានដើរតែរិះគន់គេ ? តើប្អូនមានចំណេះដឹងដល់កំរិតណាដែលហ៊ានកំណត់ថា អ្នកនេះខុស អ្នកនោះត្រូវស្រេចតែចិត្ត ? ហើយមានដែលកំណត់ថា ខ្លួនឯងខុសឬអត់? ឬក៏ប្អូនធ្វើអ្វីមិនចេះខុស ? បើប្អូនមិនសប្បាយចិត្ត និងបុគ្គលណានិយាយ សូមប្អូននិយាយត្រឹមបុគ្គលនោះទៅ កុំយកសមាគម និងគ្រួសារមកពាក់ព័ន្ធ សង្ឃឹមថា ប្អូននឹងជៀសឱ្យផុតពីការពឹងពាក់មកសមាគមសិល្បករខ្មែរ ព្រោះប្អូនក៏មិនប្រាកដថា ប្អូនជាអ្នកបោះឆ្នោតឱ្យបងដែរ ព្រោះប្អូនមើលងាយបងដែលជាស្រី ព្រមទាំងក្រុមគ្រួសារបង ហើយនឹងក្រុមប្រឹក្សាភិបាលក៏ដូចជា សិល្បករ សិល្បការិនីដែលគេបានបោះឆ្នោតឱ្យបងដោយក្តីពេញចិត្ត ជាពិសេសប្អូនកំពុងមើលងាយគណៈធិបតីដែលបានចូលរួមក្នុងថ្ងៃបោះឆ្នោត ។ តើខ្ញុំគួរធ្វើយ៉ាងម៉េចជាមួយអ្នកសិល្បៈរូបនេះ ? សូមជួយផ្តល់ជាយោបល់ផង ភាពស្ងប់ស្ងាត់របស់ខ្ញុំ គឺធ្វើឱ្យបុគ្គលសិល្បៈរូបនេះកាន់តែជាន់ និងមើលងាយការដឹកនាំរបស់មនុស្សស្រី។ បងមានអារម្មណ៍ថា ប្អូនព្យាយាមបង្កើតរឿងមកលើបង និងក្រុមគ្រួសារបងក្នុងន័យមិនសប្បាយចិត្តរឿងបុគ្គលច្រើនជាង ឬក៏ប្អូនចង់ឱ្យបងចុះចេញពីតំណែង ហើយប្អូនចង់ឱ្យអ្នកផ្សេងឡើងជំនួស ? ឬក៏ប្អូនចង់ឱ្យបុរសដូចប្អូនឡើងកាន់តំណែងនេះ ? មើលងាយមនុស្សស្រីពេកហើយ»។
គួបញ្ជាក់ថា ជម្លោះរវាងអ្នកទាំងពីរបានកើតឡើង បន្ទាប់ពីលោក ម៉ៃ សុគន្ធ បានធ្វើការរិះគន់ដោយមិនសម្ចៃមាត់មកលើអ្នកនាង ចន ច័ន្ទលក្ខិណា បន្ទាប់លោកបានកើតជម្លោះជាមួយប្អូនប្រុសរបស់អ្នកនាង ចន្ទលក្ខិណា។ ជម្លោះនេះបានរាលដាលមកដល់រូបនាង ក្រោយពីប្អូនប្រុសរបស់នាងបានប្រើពាក្យសម្តីមកលើ ម៉ៃ សុគន្ធ ថា «ជា MR សំរាម»៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
