រាជធានីភ្នំពេញ ៖ បន្ទាប់ពីលោកខេមរៈ សិរីមន្ត មិនបន្តកិច្ចសន្យានៅផលិតកម្មសាន់ដេ មានរឿងគួរឱ្យចាប់អារម្មណ៍ជាច្រើនក្នុងពិភពសិល្បៈ ។ ពិសេសលោកឆាយ វីរៈយុទ្ធ នៅតែឈរតំណែងកំពូល ឬយ៉ាងណានៅផលិតកម្មសាន់ដេ ក្រោយពេលផលិតកម្មមួយនេះអះអាងថា មានអ្នកចម្រៀងថ្មីៗមួយចំនួនជួយឱ្យរឹងមាំ ។
តារាចម្រៀងល្បីឈ្មោះលោកឆាយ វីរៈយុទ្ធ ហាក់បង្ហាញពីភាពស្ងៀមស្ងាត់ និងមិននិយាយអ្វីច្រើនទេពាក់ព័ន្ធថា តើលោកអាចនឹងក្លាយជាតារាឈានមុខគេនៅផលិតកម្មសាន់ដេ ឬយ៉ាងណាក្រោយពីលោកខេមរៈ សិរីមន្ត ចេញទៅផលិតកម្មរស្មីហង្សមាស ។ បើតាមអ្នកចាត់ការទូទៅរបស់ផលិតកម្មសាន់ដេ អះអាងថា ផលិតកម្មបានត្រៀមមនុស្សរួចរាល់អស់ហើយ ដើម្បីស្នងតំណែងសិរីមន្ត ដែលទើបចាកចេញកាលពីពេលថ្មីៗកន្លងមក ។
លោកឡាយ សុកចំរើន ជាអ្នកចាត់ការទូទៅនិយាយថា ផលិតកម្មបានរៀបចំជើងព្រួលរួចជាស្រេច បន្ទាប់ពីលោកខេមរៈ សិរីមន្ត មិនបន្តកិច្ចសន្យា ហើយចាកចេញទៅកាន់ផលិតកម្មផ្សេង ។ លោកសុខ ចំរើន បញ្ជាក់ថា៖ «និយាយទៅទាក់ទងរឿងនេះយើងមានគម្រោងរួចស្រេចហើយ ថាតើនរណាជាអ្នកជំនួសគាត់ ពេលគាត់ចេញទៅ ប៉ុន្តែរឿងនេះខ្ញុំសុំលាក់សិន បន្តិចទៀតទស្សនិកជននឹងដឹងច្បាស់មិនខាន ។
តារាចម្រៀងទាំងថ្មី និងចាស់ក្នុងផលិតកម្មរបស់ខ្ញុំ គឺមានសមត្ថភាពគ្រប់គ្រាន់ដើម្បីស្នងតំណែងតារាល្បីឈ្មោះខេមរៈ សិរីមន្តបាន ។ ក៏ប៉ុន្តែខ្ញុំមិនបកស្រាយនោះទេ នៅពេលចោទសួរថាតើអាចជាឆាយ វីរៈយុទ្ធ ឬយ៉ាងណា» ។
លោកឡាយ សុកចំរើន ទទួលស្គាល់ថាមានតារាចម្រៀងថ្មីជាច្រើន និងអ្នកចាស់ក្នុងផលិតកម្មអាចធ្វើជាតារាជួរមុខ មិនចាញ់ខេមរៈ សិរីមន្តទេ ។
បដិសេធចំពោះការលើកឡើងថា សាន់ដេអាចនឹងធ្លាក់ប្រជាប្រិយភាព ក្រោយពីខេមរៈ សិរីមន្ត ចាកចេញទៅផលិតកម្មគូប្រជែងរបស់ខ្លួននោះ លោកឡាយ សុខចំរើន អះអាងថា «សាន់ដេ នៅតែមានភាពរឹងមាំដដែល បើទោះជាតារាល្បីម្នាក់របស់ខ្លួនចាកចេញក៏ដោយ ។ ម្យ៉ាងទៀតនាពេលដ៏ខ្លីខាងមុខ សាន់ដេ ត្រៀមនឹងបញ្ចេញរូបប្លែក ថ្មីជាច្រើនដល់ទស្សនិកជន» ។
ទស្សនិកជនកំពុងរង់ចាំមើលថាតើឆាយ វីរៈយុទ្ធ អាចនឹងក្លាយជាតារាឈានមុខប្រចាំផលិតកម្មសាន់ដេ ឬយ៉ាងណា ក្រោយពីលោកខេមរៈ សិរីមន្ត ចាកចេញទៅផលិតកម្មរស្មីហង្សមាស ។ ម្យ៉ាងទៀតទស្សនិកជនកំពុងរង់ចាំមើលដែរថា អ្នកស្នងតំណែងសិរីមន្ត ជាតារាចាស់ក្នុងផលិតកម្ម ឬអ្នកថ្មីដែលមានសមត្ថភាពមិនចាញ់ខេមរៈ សិរីមន្ត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]