ខេត្តកំពង់ចាម ៖ ទំនាស់ពាក្យសម្តីបានក្លាយទៅជាហិង្សាដ៏សាហាវ ដោយបុរសម្នាក់វាយទៅលើស្ត្រីអាជីវករលក់ដូរនៅផ្សារបឹងកុកម្នាក់ បណ្តាលឱ្យរងរបួសស្ទើរសន្លប់ កាលពីវេលាម៉ោង៣និង១៥នាទីរសៀលថ្ងៃទី៣ មីនា ២០១២ ស្ថិតក្នុងផ្សារបឹងកុក ក្រុងកំពង់ចាម ។
ស្ត្រីរងគ្រោះឈ្មោះវួច ហ៊ាង ជាអាជីវករបានប្រាប់ឱ្យដឹងថា មុនពេលកើតហេតុខ្លួនកំពុងអង្គុយលក់ដូរក្រណាត់ប៉ាក់ជាច្រើនប្រភេទ ស្រាប់តែមានអ្នកកាន់កញ្ឆេរ១ ដើរកាត់តាមមុខតូបខ្លួនជាហេតុធ្វើឱ្យក្រណាត់ប៉ាក់១ផ្ទាំង ជាប់តាមកញ្ឆេរទៅជាមួយ តែភ្លាមៗនោះមិនបានចាប់អារម្មណ៍ទេ ក៏ត្រូវអ្នកលក់ដូរក្បែរនោះស្រែកសួរ តើមានបាត់ក្រណាត់ប៉ាក់ដែរទេ ។ ស្ត្រីរងគ្រោះប្រាប់បន្តថា នៅពេលនោះត្រូវបានអ្នកលក់ដូរក្បែរគ្នាឈ្មោះសេង ហួរ បានទាញយកមកទុកនៅតូបរបស់គេទៅវិញ ក៏កើតទៅជាមានការជជែកគ្នា ។ ខណៈកំពុងតែប្រកែកគ្នា ស្រាប់តែឈ្មោះសេង ហួរ ស្ទុះទៅទាញ យកកៅអីមកវាយស្ត្រីរងគ្រោះត្រូវកញ្ចឹង.ក តែសំណាងបានលើកដៃខាងឆ្វេងរងទាន់ ។ ប្រភពបានបញ្ជាក់ថា ក្រោយពីកើតហេតុជនដៃដល់ថែមទាំងបោះសម្តីថា «ចង់ទៅប្តឹង អញមិនខ្លាចទេ ច្បាប់ឥឡូវឥតបានការនោះទេ» ។
លោកអនុសេនីយ៍ឯក តេង រ៉ូហ្សា នាយការិយាល័យស្រាវជ្រាវប្រឆាំងការជួញដូរមនុស្ស និងការពារអនីតិជននៃកងរាជអាវុធហត្ថខេត្ត ប្រាប់ឱ្យដឹងថា លោកបានទទួលពាក្យបណ្តឹងពីស្ត្រីរងគ្រោះ ហើយបានប្រមូលយកភស្តុតាង ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត និងមានការណែនាំពីសំណាក់លោកឧត្តមសេនីយ៍ត្រី វ៉ា សារិទ្ធ មេបញ្ជាការកងរាជអាវុធហត្ថខេត្តត្រូវតែតាមចាប់ជនដៃដល់ខាងលើ មកផ្តន្ទាទោសតាមច្បាប់ឱ្យខាងតែបាន៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]