(កូឡាឡាំពួរ)៖ នៅរសៀលថ្ងៃទី២០ ខែសីហានេះ ក្រុមអត្តពលិកកម្ពុជាដណ្ដើមមេដាយសំរឹទ្ធ ១គ្រឿងទៀតហើយ ដែលដណ្ដើមបានដោយក្រុមកីឡាជិះសេះលើវិញ្ញាសាជាក្រុម ENDURANCE(ជិះចម្ងាយ ៨០គីឡូម៉ែត្រ) នៅក្នុងព្រឹត្តិការណ៍កីឡាស៊ីហ្គេម(SEA Games 2017) លើកទី២៩ នៅម៉ាឡេស៊ី។ នេះបើយោងតាមការបង្ហោះលើ Page ផ្លូវការរបស់គណៈកម្មាធិការជាតិអូឡាំពិកកម្ពុជាមុននេះបន្ដិច។
សូមបញ្ជាក់ថា វិញ្ញាសាជិះសេះ ENDURANCE គឺជាប្រភេទវិញ្ញាសាថ្មី ដែលសហព័ន្ធកីឡាជិះសេះកម្ពុជា ទើបបង្កើត និងបញ្ជូនកីឡាករចូលរួមការប្រកួតលើកដំបូង នៅក្នុងមហាព្រឹត្តិការណ៍កីឡាប្រចាំតំបន់អាស៊ាន ឆ្នាំ២០១៧នេះ ហើយវាក៏ជាមេដាយប្រវត្តិសាស្ដ្រ ដែលកម្ពុជាដណ្ដើមបានមេដាយលើប្រភេទកីឡាជិះសេះនេះផងដែរ បើទោះបីកន្លងមកកម្ពុជាមានក្រុមកីឡាជិះសេះលើវិញ្ញាសាផ្សេងៗ ធ្លាប់បានចូលរួមក៏ដោយ។
ជាបណ្ដោះអាសន្នពេលនេះ កម្ពុជាដណ្ដើមបានមេដាយសរុប ៣គ្រឿងហើយ ដែលសុទ្ធសឹងជាមេដាយសំរឹទ្ធ ខណៈមេដាយសំរឹទ្ធ ២គ្រឿងទៀត គឺដណ្ដើមបានដោយក្រុមកីឡាសីឈីនឡូនកាលពីថ្ងៃទី១៧ ខែសីហាកន្លងទៅ ។ ប៉ុន្ដែយ៉ាងណាកម្ពុជា នៅមានប្រភេទកីឡាមានសក្ដានុពលជាច្រើនទៀត កំពុងធ្វើការប្រកួត និងមិនទាន់បានប្រកួត ។ ដូច្នេះថ្នាក់ដឹកនាំកីឡាកម្ពុជា នៅតែរក្សាក្ដីរំពឹងឈ្នះមេដាយជាបន្ដបន្ទាប់បន្ថែមទៀត នៅក្នុងការប្រកួតដែលគ្រោងនឹងបញ្ចប់នាថ្ងៃទី៣០ ខែសីហា ឆ្នាំ២០១៧ខាងមុខ៕
ប្រភព៖ Freshnews
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]