រាជធានីភ្នំពេញ ៖ យុវជនម្នាក់បានជាប់ចោទពីបទរំលោភសេពសន្ថវៈនារីម្នាក់រហូតបានសម្រេច ឯម្នាក់ទៀតបានចូលទៅបម្រុងចាប់រំលោភបន្ត ប៉ុន្តែត្រូវនាងស្រែកបង្កឱ្យមានការភ្ញាក់ផ្អើលទាំងយប់បន្ទាប់មកស្ត្រីរូបនោះក៏បានប្តឹងនគរបាលប៉ុស្តិ៍កាកាបឱ្យចាប់ខ្លួន ។ ហេតុការណ៍នោះបានកើតឡើងកាលពីវេលាម៉ោង១០និង៥០នាទីយប់ថ្ងៃទី៥ មីនា ២០១២ នៅក្នុងបន្ទប់ផ្ទះជួលមួយក្នុងសង្កាត់កាកាប ខណ្ឌពោធិ៍សែនជ័យ ។
ជនសង្ស័យដែលជាប់ចោទថា រំលោភបានសម្រេចនោះឈ្មោះហៀង ឡូញ អាយុ២២ឆ្នាំ ស្នាក់នៅផ្ទះជួលក្បែរនារីរងគ្រោះដែរ និងម្នាក់ទៀតដែលចូលទៅបម្រុងចាប់រំលោភដែរ តែ ត្រូវនាងស្រែកនោះឈ្មោះភឹម លីន អាយុ៣០ឆ្នាំ មានទីលំនៅផ្ទះលេខ១៥៤Eo ផ្លូវលេខ១៦៩ សង្កាត់វាលវង់ ខណ្ឌ៧មករា ត្រូវចោទប្រកាន់ពីបទប្រទូស្តកេរ្តិ៍ខ្មាស ។ ដោយឡែកនារីរងគ្រោះដែលអះអាងថា ត្រូវគេចាប់រំលោភនោះអាយុ២៨ឆ្នាំ ជាកម្មការិនីរោងចក្រកាត់ដេរមានទីលំនៅផ្ទះជួលត្រង់ចំណុចកើតហេតុខាងលើ ។ នារីរងគ្រោះបានរៀបរាប់ប្រាប់នគរបាលថា នៅមុនពេលកើតហេតុជនសង្ស័យទាំងពីរនាក់នោះបាននាំគ្នាផឹកស៊ីនៅមុខបន្ទប់របស់នាង លុះចប់ការផឹកស៊ីជនសង្ស័យឈ្មោះហៀង ឡូញ បានចូលក្នុងបន្ទប់ ដោយសួររកខ្ចីភួយ ហើយនាងប្រាប់ថា អត់មានភួយទេ ជននោះក៏ផ្តួលខ្លួនទ្រោបលើនាងរួចធ្វើសកម្មភាពរំលោភរហូតបានសម្រេច ។ បន្ទាប់មកជននោះក៏បានក្រោកដើរចេញពីបន្ទប់ ហើយប្រាប់ឱ្យបក្សពួកម្នាក់ទៀតឈ្មោះភឹម លីន ដែលកំពុងដេកចាំនៅខាងក្រៅឱ្យចូលទៅចាប់រំលោភនាងទៀត ។ ពេលចូលទៅដល់ជនទី២ នេះបានចាប់ឱបថើបនាងបម្រុងរំលោភទៀត ប៉ុន្តែនាងខំរើបម្រះ ហើយរត់ចេញក្រៅបន្ទប់ស្រែកឱ្យគេជួយនិងប្តឹងឱ្យសមត្ថកិច្ចចាប់ខ្លួនជនទាំងពីរនាក់នោះតែម្តង ។
ប៉ុន្តែនៅព្រឹកថ្ងៃទី៦ មីនា នារីរងគ្រោះបានស្នើសុំដកពាក្យបណ្តឹងវិញ ដោយយល់ព្រមទទួលយកជនសង្ស័យឈ្មោះហៀង ឡូញ ជាប្តី។ ដោយឡែកជនសង្ស័យរូបនេះបានបដិសេធន៍ថា ការរំលោភនេះគេមិនបានធ្វើសកម្មភាពតែម្នាក់ឯងនោះទេ ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
