ស្ថាបនិកហ្វេសប៊ុក Mark Zuckerberg គ្រោងសម្រាកមួយរយៈពេលខ្លី ព្រោះតែ…

អាមេរិក៖ លោក Mark Zuckerberg ដែលជាស្ថាបនិក និងនាយកប្រតិបត្តិក្រុមហ៊ុនហ្វេសប៊ុក បានប្រកាសថា គាត់មានគម្រោងសម្រាកមួយរយៈពេលខ្លី ពីការងារ នៅពេលដែលភរិយារបស់គាត់ ធ្វើការសម្រាលកូនទី២។

នេះបើតាមសារ ដែលបង្ហោះឡើងនៅលើទំព័រហ្វេសប៊ុកផ្លូវការរបស់លោក Mark Zuckerberg បានឲ្យដឹងថា កូនស្រីទី២របស់ពួកគាត់ នឹងមកដល់ឆាប់ៗនេះហើយ ដូច្នេះគាត់ក៏គ្រោងនឹងឈប់សម្រាករយៈពេល ២ខែ ដែលគាត់នឹងចំណាយពេលមួយខែដំបូង កំឡុងពេលដែលភរិយាគាត់ធ្វើការសម្រាលកូន ហើយបន្ទាប់មកពួកគាត់ នឹងចំណាយពេលពេញមួយខែធ្នូ ដើម្បីនៅជាមួយគ្នា។

គួរឲ្យដឹងថា លោក Mark Zuckerberg ធ្លាប់បានឈប់សម្រាករយៈពេល ២ខែម្ដងរួចមកហើយ ដើម្បីចំណាយពេលនៅជាមួយក្រុមគ្រួសារ នៅពេលដែលភរិយាគាត់ សម្រាលកូនដំបូង។ 

ជាធម្មតាក្រុមហ៊ុនហ្វេសប៊ុក នឹងផ្តល់ជូនការសំរាកលំហែមាតុភាពរយៈពេល ៤ខែ ដោយសារតែមានការសិក្សាជាច្រើន បានបង្ហាញឲ្យដឹងថា វានឹងមានអត្ថប្រយោជន៍យ៉ាងច្រើន សម្រាប់ក្រុមគ្រួសារទាំងមូល នៅពេលដែលឪពុកម្តាយអាចចំណាយពេលវេលា ដើម្បីនៅជាមួយទារកទើបនឹងកើតនោះ។ លោក Mark ក៏បន្ថែមទៀតថា គាត់ដឹងច្បាស់ណាស់ថា ក្រុមហ៊ុនហ្វេសប៊ុកនឹងនៅតែឈរយ៉ាងរឹងមាំនៅពេលដែលពេលដែលគាត់ត្រលប់មកវិញ។

គួរបញ្ជាក់ផងដែរថា លោក Mark Zuckerberg និងអ្នកស្រី Priscilla Chan បានរៀបការជាមួយគ្នានៅក្នុងថ្ងៃទី ១៩ ខែឧសភា ឆ្នាំ ២០១២ ហើយសេចក្ដីស្នេហារបស់អ្នកទាំង ២ ក៏បានធ្វើឲ្យមនុស្សជាច្រើនមានក្ដីច្រណែនផងដែរ ព្រោះតែគាត់ទាំង ២ គឺជាគូស្នេហ៍តាំងពីពួកគេនៅរៀន រហូតមកដល់ពេលនេះ៕

• គ្រួសារ
• ផ្ទៃពោះ