Zidane អះអាងថា ការពិន័យ៥ប្រកួតទៅលើ Ronaldo គឺជារឿងមិនសាកសមឡើយ

អេស្ប៉ាញ៖ ក្នុងសន្និសីទសារព័ត៌មានមុនជំនួបជើងទី២ ពានរង្វាន់ Spanish Super Cup រវាងក្រុម Real Madrid ទល់នឹងក្រុម Barcelona គ្រូបង្វឹកលោក Zinedine Zidane បាននិយាយថា ការដែលពិន័យទៅលើ Ronaldo មិនឲ្យចូលលេង៥ប្រកួត គឺជារឿងមិនសមហេតុផលឡើយ។

ខែ្សប្រយុទ្ធជម្រើសជាតិព័រទុយហ្គាល់នេះ ត្រូវបានអាជ្ញាកណ្ដាលផ្ដល់កាតលឿងចំនួន២ដង ដែលស្មើនឹងកាតក្រហមក្នុងជំនួបដែល Real Madrid យកឈ្នះដល់ដី Barcelona ៣-១ កាលពីយប់ថៃ្ងអាទិត្យកន្លងទៅ ក្នុងនោះផងដែរ ក្រោយពីការសម្រេចចិត្តឲ្យកាតលឿងលើកទីពីរហើយ  Ronaldo ក៏មិនសប្បាយចិត្ត រួចបានរុញអាជ្ញាកណ្ដាល ដែលធើ្វឲ្យសហព័ន្ធបាល់ទាត់អេស្ប៉ាញសម្រេចពិន័យរូបគេមិនឲ្យប្រកួតចំនួន៥ប្រកួត។

Zidane និយាយអំឡុងសន្និសីទសារព័ត៌មានថា៖ «ការពិន័យនេះពិតជារំខានដល់ខ្ញុំ និងក្រុមទាំងមូលណាស់។ ខ្ញុំមិនចង់ជ្រៀតជ្រែកជាមួយអាជ្ញាកណ្ដាលទេ ប៉ុន្ដែនៅពេលដែលយើងក្រឡេកទៅមើលរឿងដែលកើតឡើង Cristiano នឹងមិនបានលេងចំនួន៥ប្រកួត។ ៥ប្រកួត គឺច្រើនណាស់»។

គ្រូបង្វឹកសញ្ជាតិបារាំងបន្ដថា៖ «យើងនឹងរង់ចាំគណៈកម្មាធិការជួបប្រជុំនៅថៃ្ងសែ្អក ហើយបន្ទាប់មកយើងនឹងចាប់ផ្ដើមដោះស្រាយ»។  

គួរបញ្ជាក់ផងដែរថា Ronaldo នឹងត្រូវអវត្ដមានក្នុងការប្រកួតជើងទី២ ទល់នឹង Barcelona ហើយនឹងបន្ដអវត្ដមានចំនួន៤ប្រកួតទៀត ក្នុងលីកកំពូលអេស្ប៉ាញ La Liga តែទោះយ៉ាងណាក្លឹបមានសិទ្ធិក្នុងការតវ៉ាចំពោះការពិន័យនេះ រយៈពេល១០ថ្ងៃ ហើយបើគ្មានសកម្មភាពណាមួយទេ នោះនឹងត្រូវបានអនុវត្តតែម្ដង៕