ពូសង្ហាវ័យ៥១ឆ្នាំលើកមុននោះ គាត់ទម្លាយអាថ៌កំបាំងសម្រស់ហើយ! បើចង់ក្មេងដូចគាត់សាករៀនតាមទៅមើល៍...

សឹង្ហបុរី៖  ថ្មីៗកន្លងទៅនេះ សារព័ត៌មានជាច្រើនបានចុះផ្សាយពី លោក Chuando Tan អាយុ៥១ឆ្នាំ ដែលមានរូបរាងឡូយ សង្ហា និងទាក់ទាញខ្លាំង មិនចាញ់យុវវ័យ។

លោក Chuando បានចាប់ផ្តើមអាជីពជាតារាម៉ូដែល តាំងពីអាយុ ១៦ឆ្នាំមកម្ល៉េះ។ រហូតដល់ពេលដែលលោកមានអាយុជាង២០ឆ្នាំ ទើបលោកបានឈានជើងចូលវិស័យចម្រៀង។ សព្វថ្ងៃ លោកថែមទាំងជាជាងថតរូបម្នាក់ផងដែរ។

អតីតតារាចម្រៀងកម្ពស់ ១.៨៥ម៉ែត្រ និងទម្ងន់៧៨គីឡូក្រាមរូបនេះ បានផ្តល់បទសម្ភាសន៍មួយ ជាមួយសារព័ត៌មាន The Straits Times ទាក់ទងនឹងអាថ៌កំបាំងដែលធ្វើឲ្យរូបរាងរបស់លោកស្អាតប្រៀបបីដូចអមតៈ។

អំឡុងពេលណាត់ជួប នាឱកាសហូបអាហារប៊ូហ្វេពេលថ្ងៃត្រង់​ គេឃើញលោក Chuando បានញ៉ាំនំប៉័ងចំនិត បន្លែខ្លះៗ និងស៊ុតស្ងោរ៦គ្រាប់។

លោកបានណែនាំថា៖

គ្រប់គ្នាគួរញ៉ាំអាហារដែលផ្តល់នូវសុខភាពល្អ ជាជាងការតមអាហារ

ក្រៅពីការញ៉ាំអាហារដែលមានជាតិប្រូតេអ៊ីនទាំងនោះ លោក Chuando តែងតែញ៉ាំទឹកសាប ប៉ុន្តែលោកមិនញ៉ាំកាហ្វេ តែ ស្រា និងមិនជក់បារីឡើយ។ សម្រាប់ការ៉េម និងផ្លែទុរេន គឺលោកនៅតែញ៉ាំម្តងម្កាល ព្រោះវាជាចំនូលចិត្តរបស់លោក។

ក្រៅពីរបបអាហារ ការហាត់ប្រាណក៏ចូលរួមចំនែកយ៉ាងសំខាន់ផងដែរ។ លោក Chuando តែងតែហាត់ប្រាណ ពី៣ ទៅ៥ដងក្នុងមួយសប្តាហ៍ ហើយក្នុងមួយដងប្រហែល៩០នាទី។ លើសពីនេះ លោក Chuando ក៏តែងតែទៅហែលទឹកផងដែរ។ ដោយសារជង្គង់របស់លោក Chuando មានបញ្ហា ដូច្នេះលោកមិនអាចរត់បានទេ ប៉ុន្តែ លោកអាចដើរហាត់ប្រាណលើម៉ាស៊ីនបាន។

លោក Chuando បានសារភាពដែរថា លោកធ្លាប់ព្យាយាមកែសម្ផស្សតាមរយៈការចាក់ Botox នៅរង្វង់ភ្នែក ប៉ុន្តែដោយសារលទ្ធផលមិនសូវល្អ ដូច្នេះលោកក៏បានសម្រេចចិត្តថាឈប់តែម្តងទៅ។

លោក Chuando បាននិយាយជាចុងក្រោយថា ទន្ទឹមនឹងភាពល្បីល្បាញនេះ ក៏មានអ្នកលេងបណ្តាញសង្គមមួយចំនួនបានរិះគន់លោកផងដែរ ប៉ុន្តែមានអ្នកខ្លះទៀតបានប្រាប់លោកថា លោកបានជួយជម្រុញចិត្តអ្នកដទៃឲ្យរស់នៅមានសុខភាពល្អ ដូច្នេះ លោកពិតជារីករាយខ្លាំងណាស់៕