បរទេស៖ ឡានដែលអាចហោះបានជាអ្វីដែលមនុស្សភាគច្រើន ធ្លាប់តែស្រមើស្រមៃ។ យើងធ្លាប់ឃើញប្រភេទឡានហោះនៅក្នុងភាពយន្តប៉ុណ្ណោះ ប៉ុន្តែក្នុងពេលនេះ ក្រុមហ៊ុនមួយកំពុងធ្វើការផលិតឡានដែលអាចហោះបានឲ្យក្លាយជាការពិតមែនទែនហើយ។
ប្រភេទឡានដែលអាចហោះបានកំពុងត្រូវបានផលិតដោយក្រុមហ៊ុន DeLorean ដែលជាក្រុមហ៊ុនមួយផ្តោតយ៉ាងខ្លាំងលើបច្ចេកវិទ្យា និងឧស្សាហកម្មខាងអាកាសចរណ៍និងជើងហោះហើរអវកាស។ លោក Paul DeLorean ដែលជានាយកប្រតិបត្តិក្រុមហ៊ុន DeLorean និងជាអ្នករចនាម៉ូដរថយន្ត មានគម្រោងសាងសង់យានយន្តដែលអាចហោះបានជាលក្ខណៈឯកជនមាន២កៅអី។
រថយន្តដែលអាចហោះបាននេះ មានឈ្មោះថា DR-7។ រថយន្តនេះមានស្លាបមួយគូនៅខាងមុខ មួយគូទៀតនៅខាងក្រោយ និងស្លាបមួយចំនួនទៀតនៅពីក្រោម។ឡានហោះនេះមានប្រវែង ៦,០៩ម៉ែត្រ និងទទឹង ៥,៦៣ម៉ែត្រ។
ទោះបីីជាយ៉ាងណា ការបង្កើតនេះជួបបញ្ហាធំៗចំនួន២ដែរគឺ បញ្ហាសុវត្ថិភាព និងបញ្ហាគ្រប់គ្រងចរាចរផ្លូវអាកាស។ លោក DeLorean ចង់ឲ្យឡានដែលប្រើថាមពលអគ្គិសនីនេះអាចហោះហើរបានចម្ងាយយ៉ាងហោចណាស់ក៏ ១៩៣គីឡូម៉ែត្រដែរនៅពេលដែលថាមពលថ្មសាកមួយពេញ។
មកដល់ពេលនេះ ទោះបីជាក្រុមហ៊ុន DeLorean កំពុងស្ថិតនៅក្នុងដំណាក់កាលសាកល្បងនៅឡើយក៏ដោយ ក៏គេបានបង្កើតរថយន្តហោះហើរខ្នាតតូចចំនួន២គ្រឿងសម្រាប់ធ្វើការសាកល្បងរួចហើយដែរ។ គេក៏មានគម្រោងសាកល្បងធ្វើតេស្តទៅលើឡានគំរូដែលមានទំហំធំជាងនេះទៀតនៅឆ្នាំក្រោយ។
លោក DeLorean បានបន្ថែមទៀតថា វាជាវិធីមួយសម្រាប់ដោះស្រាយ បញ្ហាដឹកជញ្ជូន ការបំពុលបរិស្ថាន និងបញ្ហាកកស្ទះចរាចរណ៍ផងដែរ។ ក្រុមអ្នកជំនាញដែលធ្វើការក្នុងវិស័យនេះ បាននិយាយថា ចក្ខុវិស័យក្នុងការផលិតរថយន្តបែបនេះ អាចនឹងទទួលបានជោគជ័យដោយសារការជួយពីបច្ចេកវិទ្យាដ៏ទំនើបក្នុងយុគសម័យនេះ។ ដូច្នេះបានសេចក្ដីថានាពេលខាងមុខ យើងនឹងអាចឃើញការហោះហើរដោយរថយន្តជាមិនខាននោះទេ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]