លទ្ធផលជំងឺរបស់ ទ្រី សក្កដា បានចេញជាផ្លូវការហើយ ថាលោកមានជំងឺ...

ថៃ៖ បន្ទាប់ពីពិនិត្យ និងសម្រាកព្យាបាលនៅមន្ទីរពេទ្យនាប្រទេសថៃ ស្ថានភាពជំងឺរបស់ លោក ទ្រី សក្កដា ទទួលបានលទ្ធផលជាផ្លូវការហើយ។

មុននេះបន្តិច តារាចម្រៀងប្រុសដែលនិយមច្រៀងបទនិពន្ធថ្មី លោក សក្កដាបានបង្ហោះសារក្នុងបណ្ដាញសង្គមថា លោក មានជំងឺរលាកសាច់ដុំធ្ងន់ធ្ងរ។

ក្នុងអត្ថន័យសារទាំងមូលបានរៀបរាប់ថា៖«លទ្ធផលគឺរលាកសាច់ដុំធ្ងន់ធ្ងរ អរគុណម៉ាក់ ប្អូនប្រុស បងប្រុស ក្រុមគ្រួសារទាំងមូលដែលបានមើលថែយ៉ាងយកចិត្តទុកដាក់ ។ អរគុណនូវសារជូនពរយ៉ាងច្រើនពីមិត្តភក្តិ បងប្អូនប្រុសស្រីល្អៗទាំងអស់ដែលធ្វើឲ្យខ្ញុំមានកម្លាំងយកឈ្នះចង្កូមមជ្ជុរាជ បើទុកនៅខ្មែរមួយថ្ងៃទៀត ខ្ញុំប្រហែលគ្មានជីវិតទេ ពេលនេះខ្ញុំអាចឈរ និងដើរតិចៗបានហើយ ! មួយជីវិតមិនដែលឈឺដល់ថ្នាក់ហ្នឹងទេ ដូចនេះហើយបានត្រឹមតែដេកយំស្រណោះខ្លួនឯង វាហាក់ដូចជាដុនដាបលឿនពេក ! តាមពិតទៅខ្ញុំនៅមានមនុស្សល្អៗរាប់អានច្រើនណាស់ !សុំទោសដែលខ្ញុំមិនបានតបសារ ព្រោះមិនសូវបានកាន់ទូរស័ព្ទទេ អរគុណខ្លាំងមែនទែន»។

យ៉ាងណាមិញ ទោះបី ស្ថានភាពជំងឺរបស់លោក ហាក់គ្រាន់បើបន្តិចមែន តែ សក្កដានៅមិនទាន់បញ្ជាក់ច្បាស់ពីពេលវេលា ដែលរូបលោកត្រូវមកមាតុភូមិវិញនោះទេ។

គួររលឹកដែរថា ក្រោយពីទទួលបានព័ត៌មានមួយនេះ ក៏មានតារាជាច្រើនរូប បារម្ភពីសុខភាពរបស់សក្កដា ហើយម្នាក់ៗសុទ្ធតែបាន ផ្ញើសារគាំទ្រ និងលើកទឹកចិត្តជូនតារារូបនេះ ផងដែរ៕ 

• ទ្រី សក្កដា
• ជំរុញទឹកចិត្ត