បរទេស៖ វាគឺជារឿងធម្មតាហើយដែលអ្នកប្រើប្រាស់បណ្ដាញសង្គមហ្វេសប៊ុកធ្លាប់បានធ្វើនោះ គឺការចុចទៅលើការផ្សាយពាណិជ្ជកម្មមួយចំនួនដោយចៃដន្យ។ អ្នកដែលដាក់ផ្សព្វផ្សាយផលិតផល ឬសេវាកម្មរបស់ខ្លួននៅលើកម្មវិធីហ្វេសប៊ុក ត្រូវបង់ប្រាក់ទៅតាមចំនួនដែលអ្នកប្រើប្រាស់ចុច នៅលើពាណិជ្ជកម្មទាំងនោះ។ ហើយការចុចដោយចៃដន្យនេះ គឺជារឿងធម្មតាសម្រាប់អ្នកប្រើប្រាស់ទូទៅ ប៉ុន្តែសម្រាប់អ្នកដែលដាក់ផ្សាយពាណិជ្ជកម្មវិញ វាមិនមែនជារឿងល្អនោះទេ បើសិនអ្នកប្រើប្រាស់ចុចចូលហើយតែប៉ុន្មានវិនាទីរួចចេញមកវិញនោះ។
ក្នុងពេលថ្មីៗនេះលោក Brett Vogel ដែលជាប្រធានផ្នែកទីផ្សាររបស់ក្រុមហ៊ុនហ្វេសប៊ុកបាននិយាយថា កម្មវិធីហ្វេសប៊ុកនឹងមិនបូកបញ្ចូលទិន្នន័យទាំងឡាយណាដែលជាការចុចដោយអចេតនារបស់អ្នកប្រើប្រាស់ទេ។ ការចុចដោយអចេតនានេះអាចកំណត់បាន បើសិនជាអ្នកប្រើប្រាស់ធ្វើការចេញមកក្រៅវិញពីការផ្សាយពាណិជ្ជកម្មទាំងនោះក្នុងរយៈពេល ២វិនាទីឬក៏លឿនជាងនេះ។
លោក Vogel បានបន្ថែមថា ការធ្វើបែបនេះនឹងមិនធ្វើឲ្យមានផលប៉ះពាល់ដល់ក្រុមហ៊ុនរបស់ខ្លួនឡើយ ពីព្រោះការផ្សាយពាណិជ្ជកម្មរបស់ពួកគេ មិនមែនពឹងផ្អែកទៅលើការចូលមើលពាណិជ្ជកម្មដោយចៃដន្យទេ។ គាត់បានប្រាប់ទៀតថា ការធ្វើបែបនេះគឺដើម្បីរក្សាផលប្រយោជន៍ដល់ភាគីទាំងសងខាង។ ហើយក្រុមហ៊ុនហ្វេសប៊ុកក៏កំពុងធ្វើការកែលម្អ និងបន្ថែមលក្ខណៈពិសេសមួយចំនួនទៀត ទៅលើការផ្សាយពាណិជ្ជកម្ម្មនៅលើកម្មវិធីរបស់ខ្លួន។
ការប្រកាសរបស់ក្រុមហ៊ុនហ្វេសប៊ុក បានធ្វើឲ្យអ្នកផ្សព្វផ្សាយពាណិជ្ជកម្ម លែងមានការព្រួយបារម្ភពីការបង់ប្រាក់ សម្រាប់ការចុចទៅលើការផ្សាយពាណិជ្ជកម្មរបស់គេដោយចៃដន្យទៀតហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
