រាជធានីភ្នំពេញ ៖ នារីវ័យក្មេងម្នាក់ បើករថយន្តមួយគ្រឿង បោះពួយយ៉ាងលឿន វ៉ាជែងខ្វះការប្រុងប្រយ័ត្ន ក៏ជ្រុលទៅបុកក្បាលនាគពុះចែកទ្រូងផ្លូវ ហើយជ្រុលទៅបុកម៉ូតូមួយគ្រឿងទៀត ដែលជិះបញ្ច្រាសទិសគ្នា បណ្តាលឲ្យម្ចាស់ម៉ូតូរបួសស្រាល ចំណែករថយន្តខ្ទេចមួយកំណាត់មុខ ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោង០៩និង១០នាទីយប់ ថ្ងៃទី០៤ ខែសីហា ឆ្នាំ២០១៧ ត្រង់ចំណុចមុខភោជនីយដ្ឋាន រតនា ស្រីទូច តាមបណ្តោយផ្លូវ២៨៩ ស្ថិតក្នុងសង្កាត់បឹងកក់១ ខណ្ឌទួលគោក ។
រថយន្តបង្ក ពណ៌ស ពាក់ស្លាកលេខ ភ្នំពេញ ២AO-៥៣៧៩ បើកបរដោយនារីវ័យក្មេងម្នាក់ មិនស្គាល់ឈ្មោះ វ័យ២០ឆ្នាំ ចំណែកម៉ូតូរងគ្រោះ ពណ៌ផ្កាឈូក ពាក់ស្លាកលេខ ភ្នំពេញ ១FH-៩៧៩៤ ដែលបើកបរដោយបុរសម្នាក់ មិនស្គាល់ឈ្មោះ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ៖ មុនពេលកើតហេតុ គេឃើញបុរសរងគ្រោះជិះម៉ូតូមួយគ្រឿងខាងលើ ទើបតែចេញមកពីកន្លែងធ្វើការ នៅក្បែរកន្លែងកើតហេតុ បំណងជិះត្រលប់ទៅផ្ទះវិញ នៅម្តុំផ្សារសុវណ្ណា ដោយធ្វើដំណើរតាមបណ្តោយផ្លូវ២៨៩ ក្នុងទិសដៅពីជើងទៅត្បូង ។ លុះមកដល់ចំណុចកើតហេតុ ក៏ស្រាប់មានរថយន្តបង្កដែលបើកបរដោយនារីវ័យក្មេងម្នាក់ ក្នុងល្បឿនយ៉ាងលឿន ទិសដៅបញ្ច្រាសគ្នា ព្យាយាមបើកវ៉ាជែងខាងឆ្វេងរថយន្តមួយគ្រឿងទៀត មិនចាំម៉ាក ដោយខ្វះការប្រុងប្រយ័ត្ន ក៏ទៅបុកក្បាលនាគពុះចែកទ្រូងផ្លូវចំហៀងខាងស្តាំពេញទំហឹង បណ្តាលឲ្យរថយន្តរេទៅទទឹងផ្លូវទៅ ប៉ះនឹងម៉ូតូរងគ្រោះខាងលើ ដួលរងការខូចខាតបន្តិចបន្តួច រីឯអ្នកបើកម៉ូតូរងរបួសរលាត់ថ្ពាល់ និងស្មាខាងស្តាំ ។
ចំណែករថយន្តបង្កខ្ទេចផ្នែកមុខ និងដាច់កាឡេកង់ខាងស្តាំ ភ្លាមៗនេះ នារីវ័យក្មែង ដែលជាអ្នកបើករថយន្តបង្ក បានចុះពីលើរថយន្ត ហើយគិតតែពីស្រែកយំ មិននិយាយស្តីអ្វីទាំងអស់ មួយសន្ទុះក្រោយមក ក៏ត្រូវបានសាច់ញាតិដឹកចេញពីកន្លែងកើតហេតុទៅបាត់ ។
ក្រោយកើតហេតុ សមត្ថកិច្ចមូលដ្ឋាន បានមកសម្រួលចរាចរណ៍ និងបានទាក់ទងទៅសមត្ថកិច្ចជំនាញចរាចរណ៍រាជធានី ឲ្យចុះមកធ្វើកាវាស់វែង ស្ទួចរថយន្តបង្ក និងម៉ូតូទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយគ្នានៅពេលក្រោយ ៕
ប្រភព៖ កោះសន្ដិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
