រាជធានីភ្នំពេញ ៖ ក្រុមគ្រួសាររបស់កុមារពេជ្រ ថៃ នៅមិនទាន់បានទទួលដំណឹង ឬការទាក់ទងពីផ្នែកពាក់ព័ន្ធណាមួយពីការផ្សាយថា បានទទួលអាហារូបករណ៍១០០ភាគរយពីសាកលវិទ្យាល័យឯកជនមួយនៅរាជធានីភ្នំពេញនៅឡើយទេ ។
ដំណឹងពីការទទួលបានអាហារូបករណ៍សម្រាប់កុមារពេជ្រ ថៃ នាពេលនេះត្រូវក្រុមគ្រួសារអះអាងថា បានដឹងត្រឹមព័ត៌មានដែលផ្សាយតាមហ្វេសប៊ុកប៉ុណ្ណោះ។
ឪពុករបស់កុមារពេជ្រ ថៃ ប្រាប់កោះសន្តិភាពតាមទូរស័ព្ទនៅថ្ងៃទី៣ ខែសីហា ២០១៧ថា រហូតមកដល់ពេលនេះក្រុមគ្រួសាររបស់លោកមិនទាន់បានដំណឹង ឬមានការទាក់ទងណាមួយពាក់ព័ន្ធទៅនឹងការបានអាហារូបករណ៍សម្រាប់កូនរបស់លោកនៅឡើយទេ ។ បានឃើញព័ត៌មាននោះតែតាមហ្វេសប៊ុកប៉ុណ្ណោះ។
បុរសជាឳពុកនិយាយថា «ខ្ញុំមានចិត្តសប្បាយរីករាយយ៉ាងខ្លាំងនៅពេលដែលបានទទួលដំណឹងមួយនេះ ព្រោះខ្ញុំក៏មានបំណងចង់ឲ្យពេជ្រ ថៃ រៀនឲ្យបានខ្ពស់ដោយមិនមានចេតនាឲ្យកូនចាប់យកតែផ្នែកសិល្បៈនេះមួយមុខឡើយ» ។
បើតាមឪពុកពេជ្រ ថៃ ថា ព័ត៌មានដែលថាបានជំនួយពីឧកញ៉ាម្នាក់ទៀតនោះក៏មិនទាន់បានទទួលដែរ ។
ពេជ្រ ថៃ បានទទួលការជួយឧបត្ថម្ភតែចំនួន២០០ដុល្លារប៉ុណ្ណោះ ពីជនរួមជាតិខ្មែរនៅអាមេរិក និងនៅប្រទសកូរ៉េខាងត្បូង ។
ឪពុករបស់ពេជ្រ ថៃ ថា ប្រសិនបើក្រុមគ្រួសាររបស់លោកនៅតែខ្វះខាតខាងផ្នែកជីវភាព ក៏ដូចជាការផ្គត់ផ្គង់ការសិក្សាដល់កូននោះ លោកនៅតែបង្ខំចិត្តចាកចោលកូនទៅធ្វើការនៅប្រទេសថៃដដែល ដោយគ្មានជម្រើសទេ ។
ព័ត៌មានពីការផ្តល់អាហារូបករណ៍សម្រាប់ពេជ្រ ថៃ បានធ្លាយចេញតាមការបញ្ជាក់របស់ព្រះសង្ឈមួយអង្គព្រះនាម Chhouk (ឈ្មោះដាក់ក្នុងហ្វេសប៊ុក) ហើយព័ត៌មាននេះត្រូវចុះផ្សាយតាមសារព័ត៌មាន និងមានការចែកចាយតៗគ្នាតាមហ្វេសប៊ុក ។
ព្រះសង្ឈនាម Chhouk សរសេរបង្ហោះតាមហ្វេសប៊ុករបស់ព្រះអង្គថា «នៅពេលដែលខ្ញុំផុសថានឹងជួយផ្ដល់សម្លៀកបំពាក់ដល់ប្អូនពេជ្រ ថៃ មានអ្នកសួរខ្ញុំថា ហេតុអីមិនជួយគាត់ផ្នែកសម្ភារសិក្សាវិញ ដូចជាកាតាប សៀវភៅ និងកង់ជិះជាដើម ? ខ្ញុំក៏មិនបានសន្យាអីដែរទៅលើការសិក្សារបស់គាត់ ព្រោះវាហួសលទ្ធភាពរបស់ខ្ញុំ ។
បន្ទាប់មកខ្ញុំបានពាំនាំដំណឹងនេះជូនលោកតាបណ្ឌិតកុល ផេង ដោយលោកមានចិត្តមេត្តា ករុណាចំពោះអ្នកខ្សត់ លោកតាក៏សន្តោសផ្ដល់អាហារូបករណ៍ដល់ប្អូនប្រុសតូចពេជ្រ ថៃ ពេញតែម្ដង ទាំងថ្នាក់ភាសាអង់គ្លេស (IEAP) ទាំងថ្នាក់បរិញ្ញាបត្រ(BA) នៅសាកលវិទ្យាល័យបញ្ញាសាស្ដ្រ ដែលជាសាលាដ៏ល្បីល្បាញមួយប្រចាំប្រទេសកម្ពុជាយើង ទោះបីគាត់ប្រឡង The Voice Kids Cambodia ធ្លាក់ឬជាប់ក៏ដោយ ។
លោកតាក៏មានបណ្ដាំខ្លះដល់ប្អូនប្រុសពេជ្រ ថៃ ដែរគឺ «ចៅពូកែសិល្បៈហើយ តែចៅកុំភ្លេចប្រឹងប្រែងរៀនសូត្រឲ្យចប់ថ្នាក់ទី១២ សាលាបញ្ញាសាស្ត្រត្រៀមកៅអីអាហារូបករណ៍ជូនចៅ១០០ភាគរយ »។
រហូតមកដល់ពេលនេះ ខ្ញុំនៅមិនទាន់ទទួលបានការទាក់ទងផ្ទាល់ពីប្អូនប្រុសតូចនៅឡើយទេ ។ បើបងប្អូនណាដឹង សូមជួយផ្ដល់ដំណឹងនេះដល់គាត់ ឬអ្នកជិតស្និទ្ធគាត់ឲ្យទាក់ទងមកអាត្មាផង »។
ជាអ្នកស្រុកបាត់ដំបង បេក្ខជន The Voice Kid Cambodia រដូវកាលទីមួយ ពេជ្រ ថៃ បានឡើងសម្តែងយ៉ាងល្អ ហើយទទួលបានការគោះប៊ូតុងបង្វិលកៅអីពីគណៈកម្មការទាំង៣នាក់ ។ ជាមួយនឹងទឹកដមសំឡេងល្អហើយនោះ កុមារដែលមានវ័យ១២ឆ្នាំរូបនេះថែមទាំងមានវោហារលែបខាយ និងកំប្លុកកំប្លែង ធ្វើឲ្យគណៈកម្មការ និងទស្សនិកជនដែលបានចូលរួមផ្ទាល់ និងទស្សនាតាមកញ្ចក់ទូរទស្សន៍សម្តែងការហួសចិត្ត និងសប្បាយរីករាយពេញឆាក ។
យូធូបស្តីពីការប្រឡងរបស់កុមារពេជ្រ ថៃ ត្រូវគេចូលមើល និង Share រាប់ម៉ឺនរាប់សែននាក់ បន្ទាប់ពីបានបង្ហោះចេញត្រឹមតែរយៈពេលមួយថ្ងៃប៉ុណ្ណោះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]