ចិន៖ កីឡាករវ័យក្មេង Robert Kenedy ដែលលេងក្នុងក្លិបតោខៀវ Chelsea បានរងការរិះគន់ និងខឹងសម្បាយ៉ាងខ្លាំងពីប្រជាជនចិន ដោយសារតែប្រើពាក្យសម្តីមិនសមរម្យ ដែលខ្លួនបានសរសេរបង្ហោះនៅលើបណ្តាញសង្គម។
រឿងនេះបានកើតឡើងមុនការប្រកួតមិត្តភាពរវាងក្រុមតោខៀវ Chelsea និងក្រុមកាំភ្លើងធំ Arsenal កាលពីថ្ងៃសៅរ៍ ដោយកីឡាករវ័យក្មេងសញ្ជាតិប្រេស៊ីលរូបនេះ បានបង្ហោះរូបភាពជាច្រើនភ្ជាប់ជាមួយសារ ដែលសរសេរជាភាសាព័រទុយហ្គាល់ ដោយក្នុងនោះមានន័យថា «F**k China» «Wake up China, Id*ot» ដែលអត្ថន័យទាំងនេះ គឺកីឡាករ Kenedy ចង់សំដៅលើប្រព័ន្ធសន្តិសុខនៅក្នុងប្រទេសចិន។
ការបង្ហោះរូបភាពនិងអត្ថន័យទាំងនេះ ក៏ត្រូវបានលុបចោលវិញភ្លាមៗផងដែរ ដោយសារតែ កីឡាកររូបនេះ ទទួលបានប្រតិកម្មខឹងសម្បាពីមហាជនដែលប្រើប្រាស់បណ្តាញសង្គម។ បើទោះជាយ៉ាងណាក៏ដោយ Kenedy ដែលជាខ្សែបម្រើស្លាបរបស់ Chelsea ក៏បានបង្ហោះសារសុំទោសអ្នកគាំទ្រវិញផងដែរ ក្រោយពីមានរឿងនេះកើតឡើង។
បន្ថែមពីការសុំអធ្យាស្រ័យជាលក្ខណៈបុគ្គល ក្លិបតោខៀវ Chelsea ផ្ទាល់ក៏បានចេញសារសុំទោសទៅកាន់ប្រជាជនចិនផងដែរ តាមរយៈបណ្តាញសង្គម Weibo។
ក្លិប Chelsea បានពន្យល់ឲ្យដឹងថា ការបង្ហោះរបស់កីឡាករ Kenedy ពិតជាមិនអាចទទួលយកបាន ដូច្នេះគេសាកសមនឹងទទួលការិះគន់ចំពោះទង្វើរបស់គេ។
ដោយឡែកចំពោះអ្នកប្រើប្រាស់បណ្តាញសង្គមវិញ ក៏បានស្នើរឲ្យ Chelsea ដាក់ពិន័យទៅលើកីឡាកររូបនេះផងដែរ៕
ប្រភព៖ Shanghaiist
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]