គ្រូ U23 ហ្វីលីពីន សរសើរ ច្រឹង ពលរដ្ឋ ទោះស៊ុតប៉េណាល់ទីមិនចូល

ភ្នំពេញ៖ ការប្រកួតជម្រុះពានរង្វាន់ AFC Championship ក្រោមអាយុ២៣ឆ្នាំ ក្នុងពូលJ បានបញ្ចប់ទៅដោយ U-23 កម្ពុជា យកឈ្នះ ហ្វីលីពីន ក្នុងលទ្ធផល ១-០ តែសោកស្តាយក្រុមដែលមានរហស្សនាមគោព្រៃ មិនអាចឡើងទៅលេងវគ្គបន្ត ស្របពេល U-23 ចិន និងជប៉ុន ជាក្រុមខ្លាំង មានឱកាសឡើងទៅវគ្គបន្ត។

ក្រុម U-23 កម្ពុជាមានឱកាសច្រើន ក្នុងការប្រកួត តែស៊ុតបានតែមួយគ្រាប់ ខណៈ ច្រឹង ពលរដ្ឋ មានឱកាសរកមួយគ្រាប់ទៀតជូនក្រុមជម្រើសជាតិ តែសំណាងមិនល្អ ស៊ុតប៉េណាល់ទីមិនចូល ធ្វើឲ្យលទ្ធផល ១-០ រក្សាដល់ចប់ការប្រកួត។

៣ប្រកួត របស់ U-23 ហ្វីលីពីន គឺចាញ់ទាំង៣ប្រកួត ហើយចំពោះការប្រកួតចុងក្រោយដែលចាញ់កម្ពុជាកាលពីយប់មិញនេះ លោក Marlon Maro ដែលជាគ្រូបង្វឹករបស់ហ្វីលីពីន បានលើកសរសើរកីឡាករ ច្រឹង ពលរដ្ឋ អំពីទម្រង់លេងរបស់គេ បើទោះជាក្នុងការប្រកួត ខ្សែបម្រើរូបនេះ ស៊ុតបាល់ប៉េណាលទីមិនចូលក៏ដោយ។

ច្រឹង ពលរដ្ឋ ត្រូវបានគ្រូបង្វឹក U-23 ហ្វីលីពីនសរសើរថា កីឡាកររូបនេះបានបង្ហាញទម្រង់លេងល្អជាងគេ ដោយសារតែគាត់បម្រើបានល្អ និងថែមទាំងជួយចុះមកការពារខាងក្រោមទៀត។

គួរបញ្ជាក់ថា ឆ្លងកាត់៣ប្រកួតកន្លងមក កម្ពុជា មាន៤ពិន្ទុ ដោយប្រកួតស្មើ១ ចាញ់១ និងឈ្នះ១ ឈរលេខរៀងទី៣ ក្នុងពួល J ត្រូវធ្លាក់ចេញពីការប្រកួតជម្រុះនេះជាមួយហ្វីលីពីន ដែលឈរនៅបាតតារាង ស្របពេលដែលចិនស្ថិតនៅកំពូលតារាង និងជប៉ុនលេខ២ មានសិទ្ធជាប់ទៅវគ្គបន្ទាប់៕