ភ្នំពេញ៖ គ្រូបង្វឹកក្រុម U23 ជម្រើសជាតិកម្ពុជា លោក Leonardo Vitorino បាននិយាយថា ការប្រកួតខ្លះទោះជាកីឡាកររបស់លោកចាញ់ ក៏លោកសប្បាយចិត្ដដែរដោយសារតែទម្រង់លេងល្អ ប៉ុន្ដែការឈ្នះហ្វីលីពីន ១-០ យប់មិញនេះ គឺរូបលោកមិនសប្បាយចិត្ដឡើយ។
ក្រុមកម្ពុជា បានធ្លាក់ចេញពីការប្រកួតជម្រុះ AFC U23 Championship ជាមួយក្រុមហ្វីលីពីន ក្រោយក្រុមចិន យកឈ្នះក្រុមជប៉ុន ២-១ កាលពីរសៀលម្សិលមិញ ពោលគឺមុនការប្រកួតរវាងកម្ពុជា ទល់នឹងហ្វីលីពីន។
ក្រោយចប់ការប្រកួតដែលក្រុមជម្រើសជាតិ U23 កម្ពុជា យកឈ្នះក្រុមជម្រើសជាតិ U23 ហ្វីលីពីន ដោយលទ្ធផល ១-០ លោក Leonardo បាននិយាយថា៖ «ពេលខ្លះយើងចាញ់ការប្រកួត តែខ្ញុំសប្បាយចិត្ដ ហើយពេលខ្លះយើងឈ្នះការប្រកួត តែខ្ញុំមិនសប្បាយចិត្ដ។ ខ្ញុំដឹងថាកីឡាករមានការហត់នឿយ ព្រោះពូកគេលេងប្រកួតមុនៗទល់នឹងក្រុមដ៏លំបាក តែពួកគេខំប្រឹងណាស់ សូម្បីតែខ្ញុំក៏ខំដែរ។ ក្នុងតង់ទី១ ពួកគេលេងល្អ តែក្នុងតង់ទី២ ពួកគេមានការនឿយហត់ ដោយសារពួកគេខិតខំខ្លាំងពេក។ ចុងក្រោយខ្ញុំមានតែសុំទោសដល់អ្នកគាំទ្រ ពួកយើងនឹងខិតខំសម្រាប់ថៃ្ងអនាគត»។
ឆ្លងកាត់៣ប្រកួតកន្លងមក កម្ពុជា មាន៤ពិន្ទុ ដោយប្រកួតស្មើ១ ចាញ់១ និងឈ្នះ១ ឈរលេខរៀងទី៣ ក្នុងពួល J ត្រូវធ្លាក់ចេញពីការប្រកួតជម្រុះនេះជាមួយហ្វីលីពីន ដែលឈរនៅបាតតារាង ស្របពេលដែលចិនស្ថិតនៅកំពូលតារាង និងជប៉ុនលេខ២ មានសិទ្ធជាប់ទៅវគ្គបន្ទាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]