រាជធានីភ្នំពេញ ៖ នារីវ័យក្មេងរូបស្រស់ម្នាក់ បើករថយន្តទាំងស្រវឹងធ្លាក់ភ្នែក បោះពួយលឿនពេលរេចង្កូតទៅបុកចូលកន្លែងលក់ផ្កា និងដើមឈើ បណ្តាលឲ្យបុកបាក់ដើមផ្កាតូចៗជាច្រើនផើងហើយ ជ្រុលទៅបុកដើមឈើធំៗដែលមានតម្លៃថ្លៃៗជាច្រើនដើមទៀត បណ្តាលឲ្យរថយន្តក្រឡាប់ប៉ះជើងទ្រមេឃ ចំណែកនារីជាអ្នកបើកបររងរបួសស្រាល បង្កឲ្យមានការភ្ញាក់ផ្អើលកាលពីវេលាម៉ោង០២រំលងអធ្រាត្រ ឈានចូលថ្ងៃទី២១ ខែកក្កដា ឆ្នាំ២០១៧ ត្រង់កន្លែងលក់ដើមផ្កាដែលនៅទល់មុខផ្ទះលោក ជា សុភារ៉ា តាមបណ្តោយផ្លូវ៥៩៨ ស្ថិតក្នុងសង្កាត់ទួលសង្កែ ខណ្ឌឬស្សីកែវ ។
រថយន្តបង្កម៉ាកតូយ៉ូតាព្រូស ពណ៌ស ពាក់ស្លាកលេខ ភ្នំពេញ ១AL-៨៦២៥ បើកបរដោយនារីវ័យក្មេងរូបស្រស់ម្នាក់ មិនស្គាល់ឈ្មោះ ស្ថិតក្នុងស្ថានភាពស្រវឹងជោកជាំ ។ តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តខាងលើ បើកបរតាមបណ្តោយផ្លូវ៥៩៨ បោះពួយយ៉ាងលឿនដូចហោះ ទិសដៅពីត្បូងទៅជើង លុះមកដល់ចំណុចកើតហេតុ បានរេចង្កូតទៅខាងស្តាំទៅបុករះដើមឈើ និងដើមផ្កាតូចៗ ដែលគេដាក់លក់នៅតាមចិញ្ចើមផ្លូវអស់ជាច្រើនផើង ហើយរថយន្តមិនទាន់អស់ល្បឿនបានជ្រុលទៅបុកដើមឈើធំៗ ដូចជាដើមល្មើមួយដើម បណ្តាលដាច់ជាពីរកំណាត់ ហើយរថយន្តហោះផ្លោងទៅបុកនឹងដើមឈើបេងមួយដើម និងបុកបាក់ដើមស្វាយ៤ទៅ៥ដើមទៀត ទើបធ្វើឲ្យរថយន្តក្រឡាប់ផ្ងារជើងទ្រមេឃ ។ ភ្លាមៗនោះឃើញនារីវ័យក្មេងជាអ្នកបើករថយន្តបានលូនចេញពីក្នុងរថយន្តរងរបួសរលាត់ដៃជើងតិចតួចបានស្រែកយំរកទូរស័ព្ទដៃអត់ឃើញ ។
បើកតាមសម្តីពីអ្នកលក់ដើមផ្កាបានបញ្ជាក់ឲ្យដឹងថា ដើមដែលខូចខាតខាងលើនោះ បើគិតជាតម្លៃទឹកប្រាក់អស់ជាង៧០០០ដុល្លារ សុទ្ធសឹងជាដើមឈើមានតម្លៃថ្លៃៗ គ្រាន់តែដើមល្មើមួយដើមមានតម្លៃជាង១០០០ដុល្លារទៅហើយ ។
ក្រោយពេលកើតហេតុ នារីដែលជាអ្នកបើកបររថយន្តបង្ក ត្រូវប្រជាពលរដ្ឋដឹកតាមម៉ូតូទៅផ្ទះបាត់ទៅ ដោយឡែករថយន្តបង្ក ត្រូវបានសមត្ថកិច្ចជំនាញធ្វើការស្ទូចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរងចាំម្ចាស់រថយន្តចូលខ្លួនមកធ្វើការដោះស្រាយនៅពេលក្រោយ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]