ខេត្តបាត់ដំបង ៖ សេចក្តីរាយការណ៍ឱ្យដឹងនាព្រឹកថ្ងៃទី២១ កក្កដា ពាក់ព័ន្ធករណីរូបសំណាក២ គឺរូបព្រះនាងគង់ស៊ីអ៊ីម និងរូបតាកំប៉ោង ដែលត្រូវបានផ្ទុះការររិះគន់ពីមហាជនយ៉ាងខ្លាំង ខណៈដែលឃើញកម្មករកំពុងសាងសង់ព្រះវិហារត្រង់ចង្កេះភ្នំសំពៅ ដើម្បីដាក់តម្កល់រូបទាំង២នេះ ត្រូវបានប្រភពឱ្យកោះសន្តិភាពដឹងថា ខាងក្រសួងធម្មការ និងសាសនា បានបញ្ជាឱ្យខាងមន្ទីរធម្មការ និងសាសនាខេត្តត្រូវចុះទៅពិនិត្យនៅទីតាំងកំពុងសាងសង់នោះជាបន្ទាន់ កាលពីរសៀលថ្ងៃទី២០ កក្កដា ។
សេចក្តីរាយការណ៍បន្តថា ការចុះទៅពិនិត្យរួចហើយ ត្រូវបានមន្ទីរធម្មការនិងសាសនាខេត្ត ឱ្យក្រុមកម្មករទាំងនោះបញ្ឈប់ការសាងសង់សិន ។ ទោះបីជាយ៉ាងណា កោះសន្តិភាពនៅមិនទាន់មានប្រភពច្បាស់ណាមួយថា តើមានចំណាត់ការបែបណាបន្តទៀតនោះទេ ។
គួររំលឹកថា មានការលើកឡើង និងរិះគន់យ៉ាងខ្លាំងពីសំណាក់ភ្ញៀវទេសចរជាច្រើននាក់ ខណៈដែលពួកគាត់បានអញ្ជើញទៅទស្សនាចរកម្សាន្តទៅកាន់ភ្នំសំពៅ ដែលស្ថិតក្នុងទឹកដីខេត្តបាត់ដំបង បានប្រទះឃើញនៅត្រង់ចង្កេះភ្នំមួយកន្លែង (ពាក់កណ្តាលផ្លូវឡើងលើភ្នំ) មានកម្មករកំពុងសាងសង់ព្រះវិហារ សម្រាប់ដាក់តាំងរូបសំណាកព្រះនាងគង់ស៊ីអ៊ីម និងរូបតាកំប៉ោង ដែលនេះមិនមែនជារូបតំណាងព្រះពុទ្ធសាសនាខ្មែរយើងទេ ជារូបតំណាងសាសនារបស់បរទេសនោះ ។
ជាក់ស្តែង ការរិះគន់ពីសំណាក់ភ្ញៀវទេសចរនេះ គឺកើតឡើងនៅព្រឹកថ្ងៃទី២០ កក្កដា នេះ បន្ទាប់ពីពួកគាត់បានឃើញរូបសំណាក២ធំៗ (រូបព្រះនាងគង់ស៊ីអ៊ីម និងរូបតាកំប៉ោង) ដែលគេបម្រុងរៀបដាក់តម្កល់សម្រាប់គោរពបូជានៅកន្លែងសាងសង់នោះ ។ ពួកគាត់ជាភ្ញៀវទេសចរបានសុំទាមទារថា គួរតែដករូបទាំង២នេះចេញវិញ ព្រោះមិនមែនជារូបព្រះពុទ្ធសាសនាខ្មែរយើងទេ ។ គាត់បន្តថា គួរណាស់តែយករូបសំណាកព្រះពុទ្ធរូបមកដាក់ ដើម្បីពេលធ្វើដំណើរចេញ-ចូល សុំសេចក្តីសុខវិញទៅ ។ ដូច្នេះ សូមឱ្យអាជ្ញាធរមានសមត្ថកិច្ចពាក់ព័ន្ធទាំងអស់ គួរតែចុះពិនិត្យជាបន្ទាន់នៅក្នុងទីតាំងដែលគេកំពុងសាងសង់នេះផង ។
ទាក់ទិននឹងរូបសំណាកព្រះនាងគង់ ស៊ីអ៊ីម និងរូបតាកំប៉ោងខាងលើនេះ ត្រូវបានព្រះសង្ឃរួមទាំងអ្នកស្រុក ឱ្យកោះសន្តិភាពដឹងថា ការពិតរូបសំណាកទាំង២នេះគឺមានប្រវត្តិដោយដំបូងគេនោះ បានដឹករូបនេះមកពីខេត្តព្រះវិហារ មកដាក់លើភ្នំគូលែង តែត្រូវគេមិនអនុញ្ញាត ក៏បន្តមកដាក់នៅលើភ្នំសំពៅនេះ ដែលមានរយៈពេលយូរណាស់មកហើយ ។ ក្រោយមក ចេះតែមានព្រះសង្ឃដែលគង់លើភ្នំសំពៅ ចេះតែអាពាធ(ឈឺ)ទើបព្រះអង្គសម្រេចដករូបទាំង២នេះចេញពីលើភ្នំសំពៅវិញ ដោយសារជំនឿ ។
គាត់បន្តថា កាលណោះ ពេលដករូបទាំង២ចេញ គឺបានប្រើប្រាស់រថយន្តមួយគ្រឿងដឹក លុះពេលជិះចុះលើភ្នំសំពៅ ស្រាប់តែជួបគ្រោះថ្នាក់ចរាចរណ៍ក្រឡាប់ ក៏ដួលរូបសំណាក២នេះនៅត្រង់ចំណុចចង្កេះភ្នំ ។ ពេលនោះ ក៏មានជំនឿខាងរូបសំណាកទាំង២នេះថា សុំឱ្យដាក់នៅទីនេះតែម្តង ។ ដោយហេតុដូច្នេះ ខាងអ្នកកសាងបានធ្វើការស្នើសុំទៅខាងលោកអភិបាលស្រុកបាណន់រួច ទើបមានការសាងសង់នេះឡើង ខណៈដែលខាងមន្ត្រីទេសចរណ៍និងមន្ត្រីប៉ូលិស អត់បានដឹងរឿងនេះទេ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]