(ភ្នំពេញ)៖ មុនចាប់ផ្ដើមការប្រកួតរវាងក្រុមម្ចាស់ផ្ទះ U-23 កម្ពុជា និងក្រុមខ្លាំងចិនកាលពីយប់មិញ អ្នកគាំទ្រចិន ដែលចូលរួមទស្សនាផ្ទាល់នៅពហុកីឡដ្ឋានជាតិ បានសម្ដែងការភ្ញាក់ផ្អើល និងស្រែកហ៊ោជាខ្លាំង បន្ទាប់ពីមានបុរសខ្លាំងម្នាក់ បានបង្ហាញវត្តមានក្នុងឱកាសនោះ ដែលពួកគេស្គាល់ថា គឺជាលោក Marcello Romeo Lippi គ្រូបង្វឹកក្រុមជម្រើសជាតិចិនបច្ចុប្បន្ន ហើយក៏ជាអតីតគ្រូបង្វឹកជម្រើសជាតិអ៊ីតាលី ដោយធ្លាប់ដឹកនាំក្រុមនេះលើកពាន World Cup កាលពីឆ្នាំ២០០៦ នៅអាល្លឺម៉ង់។
ប្រភពព័ត៌មានពីមន្ដ្រីសហព័ន្ធកីឡាបាល់ទាត់កម្ពុជាបានបង្ហើបថា លោក Marcello Romeo Lippi បានធ្វើដំណើរមកប្រទេសកម្ពុជា ដើម្បីតាមដានការប្រកួតរវាងក្រុម U-23 ចិន ក្នុងយុទ្ធនាការប្រកួតជម្រុះពូល J នៃពានរង្វាន់ 2018 AFC U-23 Championship ដែលកម្ពុជាធ្វើជាម្ចាស់ផ្ទះជាលក្ខណៈសំងាត់។
ប៉ុន្ដែក្រោយបង្ហាញខ្លួនលើកៅអីកិត្តិយសនៅពហុកីឡដ្ឋានជាតិភ្លាម អ្នកគាំទ្រចិន ក៏នាំគ្នាស្រែកហ៊ោ និងអបអរសាទរវត្តមានរបស់បុរសខ្លាំងរូបនេះ ហើយថែមទាំងនាំគ្នាថតរូប Selfie រហូតបង្កការចាប់អារម្មណ៍ដល់អ្នកសារព័ត៌មានជាតិ និងអន្ដរជាតិ ដើម្បីផ្ដិតយករូបភាពរបស់លោក Lippi ទៀតផង។
យ៉ាងណាគេពុំទាន់ដឹងថា លោក Lippi នឹងបន្ដស្នាក់នៅកម្ពុជា រហូតដល់ពេលណានោះទេ ខណៈការប្រកួតបើកឆាកពូល J របស់ក្រុម U-23 ចិនកាលពីយប់មិញ បានត្រឹមស្មើក្រុមម្ចាស់ផ្ទះ U-23 កម្ពុជា ដោយលទ្ធផល ០-០ ខណៈការប្រកួតបន្ទាប់ក្រុម U-23 ចិន ត្រូវជួបក្រុមយុវជន U-23 ហ្វីលីពីន នៅថ្ងៃទី២១ ខែកក្កដា ឆ្នាំ២០១៧ ស្អែកនេះ។
គួរបញ្ជាក់ថា មុនដឹកនាំក្រុមជម្រើសជាតិអ៊ីតាលីទទួលបានជោគជ័យជាប្រវត្តិសាស្ដ្រខាងលើ ហើយផ្លាស់មកដឹកនាំក្រុមជម្រើសជាតិចិនបច្ចុប្បន្ន លោក Marcello Romeo Lippi ក៏ធ្លាប់ដឹកនាំក្លឹបធំៗជាច្រើន នៅតំបន់អឺរ៉ុប និងអាស៊ីផងដែរ ដូចជាក្លឹប Guangzhou Evergrande របស់ចិន, ក្លឹប Napoli, Juventus និងក្លឹប Inter Milan របស់អ៊ីតាលីជាដើម៕
ប្រភព៖ Khmertalking
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
