ភ្នំពេញ៖ ការប្រកូតវគ្គជម្រុះបើកឆាកពានរង្វាន់ AFC Championship អាយុក្រោម២៣ឆ្នាំ បានចាប់ផ្តើម កាលពីម្សិលមិញ នៅក្នុងពូលJ ដោយក្រុមជម្រើសជាតិកម្ពុជា គឺជាម្ចាស់ផ្ទះនៃការប្រកួត។
ក្នុងពូលJ មានក្រុមខ្លាំងៗដូចជា U-23 ជប៉ុន ចិន ហ្វីលីពីន និងកម្ពុជា ហើយការប្រកួតពីម្សិលមិញនេះ U-23 របស់ប្រទេសជប៉ុន លត់ U-23 របស់ហ្វីលីពីន យ៉ាងចាស់ដៃក្នុងលទ្ធផល ៨-០ ស្របពេលដែល U-23 កម្ពុជា និងចិន បានត្រឹមស្មើគ្នា ០-០ ។
ទាក់ទងនឹងការប្រកួតរបស់ U23 កម្ពុជា និងចិន ចាប់ផ្តើមដោយការវាយសម្រុកគ្នាទៅវិញទៅមក ដោយតង់ទីមួយ កម្ពុជាមានឱកាសច្រើនជាង ចំនែកតង់ទីពីរ U-23 ចិន ធ្វើការវាយសម្រុកច្រើនជាងវិញ តែបើទោះជាយ៉ាងណាក៏ដោយ ក្រុមទាំងពីរសុទ្ធតែគ្មានសំណាងស៊ុតបញ្ចូលទីគ្នា ធ្វើឲ្យលទ្ធផល ០-០ រក្សារហូតដល់បញ្ចប់ការប្រកួត ចែកគ្នាបានត្រឹមម្នាក់មួយពិន្ទុនៅក្នុងពូលJ។
ក្រោយចប់ការប្រកួត គ្រូបង្វឹកកម្ពុជា លោក Leonardo Vitorino បានមានប្រសាសន៍ឲ្យដឹងថា ក្រុមលោកធ្វើបានល្អហើយ ចំនែកឯកីឡាករដែលល្អជាងគេវិញនោះ គឺក្រុមទាំងមូល ដែលបានសហការគ្នាបានយ៉ាងល្អ។
«សម្រាប់ខ្ញុំ គិតថា កីឡាករទាំងអស់ដែលនៅក្នុងក្រុម គឺជាកីឡាករដែលល្អ ឧទាហរណ៍ដូចជា កីឡាករ ច្រឹង ពលរដ្ឋ ដែលមានវត្តមាននៅក្នុងសន្និសីទនេះ គាត់ជាខ្សែបម្រើ តែគាត់ជួយមិត្តរួមក្រុមបានច្រើន គាត់ជួយចុះបិទផង និងឡើងប្រយុទ្ធផង ពោលគឺគាត់ជួយគ្រប់តួនាទីទាំងអស់ ដូច្នេះខ្ញុំហ៊ាននិយាយថា កីឡាករទាំងអស់សុទ្ធតែល្អ សម្រាប់ការប្រកួតជាមួយចិន» ៕ នេះបើតាមសម្តីរបស់ លោក Leonardo ។
គួរបញ្ជាក់ថា សម្រាប់ប្រកួតបន្ទាប់របស់ U-23 កម្ពុជា នឹងត្រូវប៉ះជាមួយក្រុមខ្លាំង U-23 របស់ជប៉ុន ស្របពេល U-23 ចិន នឹងត្រូវជួបជាមួយ U-23 ហ្វីលីពីន ដែលការប្រកួតទាំងពីរគូនេះ នឹងធ្វើឡើងនៅថ្ងៃទី២១ ខែកក្កដា ស្អែកនេះ នៅពហុកីឡដ្ឋានជាតិអូឡាំពិក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
