រាជធានីភ្នំពេញ ៖ រហូតមកទល់ពេលនេះ នាងឃ្មឹបនៅតែមានទឹកចិត្តអាណិតកូនប្រុសដែលជ្រុលគិតខុស ក្លាយជាជនដៃដល់រហូតមានទោសធ្ងន់ ។ យ៉ាងណា តាមការគិតនាងឃ្មឹប ពិតជាចង់ឱ្យនាយហុងដា សម្រាលទោសដល់កូនប្រុសឱ្យធូរបន្តិច ។
តារាកំប្លែងនាងឃ្មឹប តាំងពីងាកមកស្រវាការងារសិល្បៈវិញ អាចរកចំណូលបានខ្លះដើម្បីជាទុនរស់នៅ ។ ក្នុងនាមជាម្តាយ ដែលមិនចង់ឃើញលំបាកសុខចិត្តចំណាយប្រាក់ទៅមើលកូនជាប់ទោសមានទាំងរបស់ជូនផងដែរ។
នាងរ៉េន សុធារី ហៅឃ្មឹប បាននិយាយសារជាថ្មីថា បើអាចនាងចង់ឱ្យលោកហុងដា ជាឪពុកជួយសម្រួលទោសឱ្យកូនរបស់ជាប់ឃុំឃាំងបានធូរជាងនេះ ។ ប៉ុន្តែនេះ គ្រាន់តែជាសំណូមពរប៉ុណ្ណោះ គ្រាដែលនាងក៏ដឹងថា ទោសកូនប្រុសច្បងរបស់នាងគឺធ្ងន់ ។ អ្វីដែលអ្នកនាងធូរចិត្ត គឺកូនគេប្រែចិត្តគំនិតច្រើនគេតែងតែសួររកឪពុកផ្តាំតាមនាងឱ្យសួរសុខទុក្ខប៉ាគេផង ។
ក្រៅពីនេះ កូនបានរៀនជាភាសាអង់គ្លេស នៅក្នុងពន្ធនាគារ ហាក់ធ្វើឱ្យនាងជាម្តាយកក់ក្តៅ និងក្តុកក្តួលពេលឃើញកូនចេះប្រែគំនិតដឹងខុសត្រូវវិញ ។ ឃ្មឹបបន្តលើកឡើងថា រហូតមកទល់ពេលនេះ ងបានទៅមើលកូនបានបីបួនដងដែរ ក្នុងពេល២ខែនេះ ដោយកន្លះខែទៅម្តង ។ ក្នុងពេលទៅជួបកូនម្តងៗ ឆ្លៀតទិញសាច់គោប្រឡាក់ឱ្យអង្កររបស់ប្រើប្រាស់ និងលុយទុកចាយដោយទៅម្តងៗចំណាយជិត២០០ដុល្លារឯណោះ។
រហូតមកទល់ពេលនេះ ឃ្មឹបបានទិញម៉ូតូមួយគ្រឿងជិះផ្ទាល់ខ្លួន ដើម្បីសម្តែងដោយប្រាក់ទាំងនោះ បានមកពីសប្បុរសជនជួយកាលពីជួបការលំបាកគ្រាមុន ។ ឃ្មឹបប្រាប់ថានាងអរគុណដែលបងប្អូនបានជួយសម្រួលការលំបាកកន្លងមកទាំងអ្នកសិល្បៈនិងមិនមែនសិល្បៈទឹកចិត្តខ្មែរស្រឡាញ់ខ្មែរ ។ គុណបន់ទាំងអស់នោះហើយ បានឱ្យនាងសល់ម៉ូតូមួយទុកជិះផុត ពីការជិះម៉ូតូឌុបចំណាយច្រើនអាចធ្វើឲធូរបន្តិចដែលនាងតែងតែអរគុណអ្នកជួយជានិច្ច។
យ៉ាងណាមិញ គេនៅមិនទាន់ដឹងថា ចិត្តលោកហុងដា បានប្រែក្លាយទៅជាការសន្តោសប្រណីជាបន្តទៀត ឬបែបណា ដែលអ្នកនាងឃ្មឹបសុំការយោគយល់ ។ នាយហុងដា ធ្លាប់លើកឡើងថា ខាងណាក៏សាច់ចឹង ក្នុងចិត្តពិបាកកាត់ណាស់ទុកច្បាប់ជាអ្នកសម្រេច។
រហូតមកទល់ពេលនេះហុងដានិងនាងឃ្មឹបអតីតភរិយាបានវិលមករកការសម្តែងជាមួយគ្នាវិញក្រោយមានការសម្រួលបើកផ្លូវពីនាយកុយ។ម្ល៉ោះហើយទើបពេលនេះឃ្មឹបមានសម្រស់សិល្បៈឡើងវិញស្របពេលនាងមានតម្រុយថតកុននិងច្រៀងនៅអូស្ត្រាលីទៀតផង។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
