យ៉ាងហោចណាស់ មនុស្ស៨នាក់ស្លាប់ និងច្រើននាក់របួស ក្នុងករណីរលំបាក់ជញ្ជាំង និងផ្អើលរត់ជាន់គ្នា នៅកីឡដ្ឋានមួយក្នុងប្រទេសសេណេហ្គាល់

សេណេហ្គាល់៖ យ៉ាងហោចណាស់មានមនុស្ស៨នាក់បានស្លាប់ ក្នុងការប្រកួត League Cup វគ្គផ្ដាច់ព្រ័តមួយក្នុងប្រទេសសេណេហ្គាល់ កាលពីថៃ្ងសោរ៍ម្សិលមិញនេះ ដែលមូលហេតុគឺបណ្ដាលមកពី ជញ្ជាំងនៅកីឡដ្ឋាននោះ បានបាក់ស្រុតមកលើអ្នកទស្សនាដែលបង្កឲ្យមានការភ្ញាក់ផ្អើល និងមានការរត់ជាន់គ្នាតែម្ដង។

រដ្ឋមន្រ្ដីក្រសួងកីឡា ក្នុងប្រទេសសេណេហ្គាល់ លោក Matar Ba បាននិយាយថា ក្នុងចំណោមអ្នកស្លាប់ទាំង៨នោះ គឺមានក្មេងស្រីម្នាក់ផងដែរ ខណៈដែលមនុស្ស៦០នាក់ផ្សេងទៀត រងរបួសក្នុងករណីខាងលើនេះ។ 

លោក Matar Bar បាននិយាយថា លោកប្ដេជ្ញាថា នឹងមានវិធានការរឹងមាំដើម្បីកុំឲ្យមានករណីបែបនេះ កើតឡើងក្នុងប្រទេសសេណេហ្គាល់ម្តងទៀត។

មូលហេតុនៃការរត់ជាន់គ្នានេះកើតឡើងដោយសារ មានអំពើហិង្សារវាងអ្នកគាំទ្រក្រុមទាំង២ ហើយប៉ូលិសក៏បានប្រើឧស្ម័នបង្ហូរទឹកភ្នែកដើម្បីបាញ់បំបែកក្រុមទាំងនោះ។ 

បន្ថែមពីនេះទៀតអំឡុងពេលដែលកំពុងជ្រួលច្របល់ កើតហិង្សាដាក់គ្នានេះ ជញ្ជាំងក្នុងកីឡដ្ឋានក៏បានរលំបាក់ស្រុតមកចំអ្នកគាំទ្រតែម្តង ដែលធើ្វឲ្យអ្នកគាំទ្រខ្លះមានការភ័យស្លន់ស្លោ រហូតដល់រត់ជាន់គ្នា។

ការរត់ជាន់គ្នារហូតបាត់បង់ជីវិតបែបនេះបានកើតឡើងជារឿយៗនៅតំបន់អាហ្វ្រិកខាងត្បូង ដោយសារប្រព័ន្ធរក្សាសុវត្ថិភាពនៅទីនោះនៅមានកម្រិត។ ដោយឡែកកាលពីខែកុម្ភៈកន្លងទៅ ក៏មានមនុស្សយ៉ាងតិច១៧នាក់ផងដែរ ដែលបានស្លាប់ដោយសារហេតុការណ៍ស្រដៀងគ្នានេះនៅប្រទេសអង់ហ្គោឡា៕