ខេត្តកំពង់ចាម ៖ មានហេតុការណ៍ដ៏ភ្ញាក់ផ្អើលមួយក្នុងសណ្ឋាគារភ្នំប្រុស ស្ថិតនៅភូមិទី១៥ សង្កាត់កំពង់ចាម ក្រុងកំពង់ចាម កាលពីវេលាម៉ោង១២ថ្ងៃត្រង់ថ្ងៃទី៤ មីនា ២០១២ ដោយស្ត្រីពុំស្គាល់អត្តសញ្ញាណម្នាក់អាយុចន្លោះពី២០ទៅ២២ឆ្នាំ សម្បុរស សក់ស្លូត កម្ពស់១,៤៤ម៉ែត្រ ដេកស្លាប់នៅជាន់ទី២ ក្នុងបន្ទប់លេខ៣១៨ ទាំងអាក្រាតកាយ ដោយមានស្នាមជាំរឹត.ក និងបែកចិញ្ចើមហូរឈាម។
ភ្លាមៗនោះសមត្ថកិច្ចបានដាក់ការសង្ស័យថា អំពើឃាតកម្មដ៏សាហាវនេះ អាចកើតឡើងពីប្រុសស្នេហ៍ជាអ្នកសមា្លប់ហើយរត់គេចខ្លួន ។ សមត្ថកិច្ចឱ្យដឹងថា ស្ត្រីដែលស្លាប់នោះជាស្ត្រីរកស៊ីផ្លូវភេទស្នាក់នៅផ្ទះមួយកន្លែង ភូមិចុងថ្នល់ សង្កាត់បឹងកុក ក្រុងកំពង់ចាម ។ តាមលោកវរសេនីយ៍ត្រី សំ ផាត អធិការនគរបាលក្រុងកំពង់ចាម បានឱ្យកោះសន្តិភាពដឹងថា កាលពីវេលាម៉ោង១០យប់ថ្ងៃទី៣ មីនា គេឃើញគូស្នេហ៍១គូបានមករកជួលបន្ទប់សណ្ឋាគារខាងលើ ។ លោកបានប្រាប់បន្តថា រហូតមកដល់ម៉ោង១២ថ្ងៃត្រង់ថ្ងៃទី៤ មីនា ក្រុមអ្នកបោសសម្អាតតាមបន្ទប់សណ្ឋាគារបានទៅគោះទ្វារបន្ទប់ តែមិនមាននរណាម្នាក់ចេញមកបើកទ្វារឱ្យនោះ ទេ ។ ដោយមានការសង្ស័យក៏ចុះទៅជាន់ខាងក្រោមយកសោទ្វារបន្ទប់មកចាក់មើលមិនឃើញមានមនុស្សនៅលើគ្រែ តែទ្វារបន្ទប់ទឹកបិទជិត ពេលដែលយកដៃរុញទ្វារនោះ ស្រាប់តែឃើញមនុស្សស្រីម្នាក់ដេកស្លាប់ស្រាតននលគកតែម្តង ។ អ្នកសម្អាតបន្ទប់បានប្រញាប់ចុះមកប្រាប់ដល់ម្ចាស់សណ្ឋាគារ ព្រមទាំងបានរាយការណ៍ប្រាប់សមត្ថកិច្ច។ លោកសំ ផាត បន្តថា ក្រោយពីទទួលព័ត៌មាន លោកក៏បានដឹកនាំកម្លាំងជំនាញយុត្តិធម៌នៃ អធិការដ្ឋាននគរបាលក្រុងកំពង់ចាម នគរបាលបច្ចេកទេសខេត្ត ព្រមទាំងស្ថាប័នពាក់ព័ន្ធមួយចំនួនទៀត ចុះដល់កន្លែងកើតហេតុដើម្បីត្រួតពិនិត្យ តែពុំឃើញមានអត្តសញ្ញាណប័ណ្ណសម្គាល់ខ្លួនអ្នកស្លាប់នោះទេ ។ នៅលើឥដ្ឋមានស្នាមឈាម និងស្រោមអនាម័យ១ហែកតែមិនទាន់បានប្រើនៅឡើយ ។ ករណីនេះក្នុងជំហានដំបូងត្រូវបានសន្និដ្ឋានថា ស្ត្រីរងគ្រោះត្រូវសង្សារនាំមកដេកនៅក្នុងបន្ទប់សណ្ឋាគារនេះ ហើយអាចមានបញ្ហាណាមួយដែលមិនទាន់បានរួមភេទក៏មានការខឹងយ៉ាងសម្បា រហូតមានការប្រវាយប្រតប់អូសទម្លាក់ពីលើគ្រែដោយអុកក្បាលនឹងឥដ្ឋ និងរឹត.កសម្លាប់រួចអូសយកទៅដាក់នៅក្នុងបន្ទប់ទឹកតែម្តង ។
នៅក្រោយហេតុការណ៍ខាងលើនេះត្រូវបានលោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្ត និងលោកវរសេនីយ៍ឯក ជឹម សេងហុង ស្នងការរងនគរបាលខេត្តទទួលផែនយុត្តិធម៌បានបញ្ជាដោយចាត់ឱ្យលោកសំ ផាត បន្តស្រាវជ្រាវដោយយកចិត្តទុកដាក់ដើម្បីស្វែងរកឃាតក តែរហូតមកដល់ពេលនេះនៅមិនទាន់មានតម្រុយទេ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
