រាជធានីភ្នំពេញ ៖ តារាសម្តែង ល្បីៗជាច្រើនដួងរួមជាមួយស្ថានីយទូរទស្សន៍ប៉ុស្តិ៍លេខ៥ នាព្រឹកថ្ងៃទី១១ កក្កដា ឆ្នាំ២០១៧ នៅសណ្ឋាគារសូហ្វីតែលភ្នំពេញបានចូលរួមពិធីក្រុងពលីថតរឿងភាគ «នេះឬជីវិត» ។
ក្នុងខ្សែរឿងនេះកញ្ញាយ៉ែម ស្រីពេជ្រ សម្តែងជាតួម៉ាឡា ,លោកណាខុន សម្តែងតួអង្គឈ្មោះនរៈ ,កញ្ញានីតា វររង្ស សម្តែងតួឈ្មោះ ម៉ាឡាត់, ញឹម ច័ន្ទថន តួយាយលាន់, លោកជា សំណាង តួតាហ៊ាត និងឆៃលី ដាឡែន តួយាយរិន ។
មួយរយៈនេះស្ថានីយទូរទស្សន៍ប៉ុស្តិ៍លេខ៥បានរួមចំណែកសាងស្នាដៃភាពយន្តភាគបញ្ចាំងជាបន្តបន្ទាប់គ្នាក្នុងន័យលើកកម្ពស់វិស័យភាពយន្តខ្មែរឱ្យកាន់តែផុសផុលឡើង ។
ចំពោះកញ្ញាយ៉ែម ស្រីពេជ្រ នេះជាលើកទី៣ហើយបានគ្រងតំណែងតួឯកសម្រាប់រឿងភាគទូរទស្សន៍ប៉ុស្តិ៍លេខ៥ ។ នាងរួមសម្តែងលើកទី១ជាមួយលោកណា ខុន ។ ស្រីពេជ្រ និយាយថា «នាងខ្ញុំសប្បាយរីករាយដែលស្ថានីយទូរទស្សន៍ប៉ុស្តិ៍លេខ៥ចាប់អារម្មណ៍ឲ្យនាងខ្ញុំបានសម្តែងជាតួឯកម្តងទៀតប្រចាំរឿងថ្មី«នេះឬជីវិត» ដែលខ្ញុំមិនធ្លាប់សម្តែងជាមួយលោកណា ខុនម្តងណាឡើយ នេះក៏ជាលើកទី១បានសាកល្បងជាមួយគ្នា ។ យ៉ាងណាមិញនាងខ្ញុំសប្បាយចិត្តដែលបានសម្តែងជាមួយលោកណា ខុន គ្រាដែលតួសម្តែងប្រុសម្នាក់នេះកំពុងតែចាប់អារម្មណ៍យ៉ាងច្រើន ក្នុងវិស័យភាពយន្តនាពេលបច្ចុប្បន្ន នេះគិតថាសំណាងដែរដោយបានយោងឲ្យលេចធ្លោទាំងអស់គ្នា» ។
ចំណែកលោកណា ខុន សរសើរកញ្ញាយ៉ែម ស្រីពេជ្រ ថា មានទេពកោសល្យល្អ ឯរូបសម្បត្តិស្រស់សោភាបែបធម្មជាតិ ។
រឿងភាគ«នេះឬជីវិត»ចាប់ផ្តើមថតនៅថ្ងៃទី១៣ កក្កដា ឆ្នាំ២០១៧ ហើយគ្រោងដាក់បញ្ចាំងនៅពេលថតចប់រួចរាល់ជាស្ថាពរ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]