រាជធានីភ្នំពេញ ៖ កញ្ញាទឹម រដ្ឋា បន្ទោសខ្លួនឯងដែលធ្វើជាគ្រូមិនបានល្អ ព្រោះសិស្សបង្ហាញម៉ូដរបស់ខ្លួនធ្វើមិនបានល្អពេលបញ្ចេញទេពកោសល្យក្នុងកម្មវិធីប្រឡង ។ រឿងនេះទឹម រដ្ឋា យល់ថាវាជាការបាក់មុខមួយសម្រាប់នាង ដែលជាតារាម៉ូដែលលេចធ្លោលំដាប់ប្រទេស ។
តារាម៉ូដែលរាងខ្ពស់ស្រឡះកញ្ញាទឹម រដ្ឋា បង្ហាញអារម្មណ៍មិនល្អទើសចិត្តបន្តិចក្នុងពេលបេក្ខជនបេក្ខនារីដែលជាប់ឈ្មោះឡើងប្រឡងបង្ហាញម៉ូដធ្វើមិនបានល្អ ក្រោយពេលនាង និងលោកអ៊ុន សុទ្ធា ជួយបង្ហាត់ដោយផ្ទាល់ ។ ការប្រកួតនេះក្នុងកម្មវិធី«ប្រឡងតំណែងស្រីស្អាតប្រុសសង្ហា»រៀបចំឡើងដោយក្លឹបកម្សាន្ត«GL Lounge»អតីតក្លឹប«ក្លាសុីកណាយ» ។
កាលពីរាត្រីថ្ងៃទី៧ ខែកក្កដា ឆ្នាំ២០១៧ វគ្គបង្ហាញវត្តមានបេក្ខជនទាំងអស់ជាលើកដំបូងក្រោមការវាយតម្លៃចំណុចល្អ និងមិនល្អរបស់កញ្ញាទឹម រដ្ឋា និងលោកអ៊ុន សុទ្ធា ដែលមានបទពិសោធន៍យូរឆ្នាំលើវិថីបង្ហាញម៉ូដ ។
ទឹម រដ្ឋា រីករាយដែលក្លឹបជីអិលមើលឃើញសមត្ថភាពរបស់នាង និងលោកសុទ្ធា ឱ្យធ្វើជាអ្នកបណ្តុះបណ្តាលតារាម៉ូដែលថ្មី ។ «ជាលទ្ធផលមិនដឹងជា ប្អូនៗភ័យពេក ឬយ៉ាងណាទេ បានជាសប្តាហ៍ដំបូងឡើងប្រកួតស្រាប់តែរំលេចមិនបានល្អតែម្តង ។ ខុសពីការហ្វឹកហាត់គ្មានភ័យដើរត្រូវក្រឡាគ្នាល្អ ប្រហែលជាមានមនុស្សច្រើនមកចូលរួមទើបបុកពោះកើតជាទប់ជំហរមិនបាន ។
យ៉ាងណានាងខ្ញុំនឹងប្រឹងបង្ហាត់ឲ្យតទៅទៀតដើម្បីឱ្យល្អជាងនេះ ព្រោះនាងខ្ញុំចង់ឱ្យសិស្សដែលចេញពីទឹម រដ្ឋា ទៅមានសមត្ថភាព ទេពកោសល្យល្អ ទៅដល់ណាគេសួររកគ្រូបង្ហាត់» ។ ចំណែកលោកអ៊ុន សុទ្ធា និយាយថា «ខ្ញុំនឹងព្យាយាមបង្វឹក ប្អូនៗឲបានប្រសើរជាងនេះ ក្នុងពេលដែលដំណើរដើរ និងទឹកមុខ ហើយនិងអារម្មណ៍នៅលើឆាកធ្វើមិនទាន់សមទាំងស្រុងទេ» ។
កញ្ញាទឹម រដ្ឋា ចំណាយពេលប្រមាណ៣សប្ដាហ៍ដើម្បីកែដំណើរ និងក្រឡាដើររបស់បេក្ខនារី ដោយរំពឹងថា សកម្មភាពដើរម៉ូដប្រកួតប្រជែងមួយនេះសម្រាប់បេក្ខនារី១០នាក់ដែលនឹងសល់នៅវគ្គចុងក្រោយនឹងគ្មានការរិះគន់ ។
វេទិកាបង្ហាញម៉ូដប្រចាំឆ្នាំ២០១៧នេះ ធ្វើឡើងនៅក្លឹបកម្សាន្តGL ស្ថិតនៅតាមបណ្ដោយវិថីត្រសក់ផ្អែមរៀងរាល់យប់ថ្ងៃសុក្រ ដើម្បីជម្រុះយកលេខ១ ដល់លេខ៣នៅយប់ថ្ងៃទី២៩ កក្កដា ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]