ខេត្តបាត់ដំបង ៖ រថយន្តមែរសឺដេស S320 មួយគ្រឿងបានហោះចេញពីផ្លូវដោយសារតែបើកលឿនពេកជ្រុលទៅបុកគល់ដើមស្វាយ រួចធ្លាក់ចូលបឹងកំប្លោក បណ្ដាលឲ្យអ្នកជិះក្នុងរថយន្ត២នាក់ប្ដីប្រពន្ធរងរបួសធ្ងន់។ ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩យប់ថ្ងៃទី៣ មីនា លើកំណាត់ផ្លូវជាតិលេខ៥ ត្រង់ចំណុចភូមិអូសទូក ឃុំកំពង់ព្រៀង ស្រុកសង្កែ។
មន្រ្តីនគរបាលស្រុកសង្កែបានឱ្យដឹងថា រថយន្តមែរសឺដេស S320 ពណ៌ខ្មៅ បើកបរដោយឈ្មោះទន់ យីង អាយុ៦០ឆ្នាំ និងប្រពន្ធឈ្មោះសុខ ខុម អាយុ៥០ឆ្នាំ រស់នៅរាជធានីភ្នំពេញ ទាំង២នាក់ប្ដីប្រពន្ធរងរបួសធ្ងន់ដូចគ្នា ដោយប្រពន្ធបាក់ដៃឆ្វេង ឯប្ដីបាក់ដៃនិងជើង ព្រោះកៀបជាប់ក្នុងរថយន្ត។ នៅមុនពេលកើតហេតុរថយន្តនេះបើកបរក្នុងទិសដៅពីកើតទៅលិចក្នុងល្បឿនដូចហោះ ខណៈមកដល់ចំណុចកើតហេតុមិនដឹងជាយ៉ាងម៉េច ស្រាប់តែហោះចេញពីផ្លូវទៅបុកគល់ដើមស្វាយទាំងកំរោល បណ្ដាលឲ្យរថយន្តមានរាងដូចទូកង រួចធ្លាក់ក្នុងបឹងកំប្លោក។
ប្រភពពីស្ត្រីជាប្រពន្ធបានប្រាប់ឱ្យដឹងថា ក្នុងគ្រាដែលប្ដីគាត់កំពុងបើកលឿន លុះមកដល់ចំណុចកើតហេតុស្រាប់តែឃើញត្រាក់ទ័រមួយគ្រឿងបើកមកពីមុខ ហើយបានព្យាយាមគេចត្រាក់ទ័រនោះ ដោយចាំងភ្លើងរថយន្តមកពីមុខផង ក៏បណ្ដាលឲ្យខុសផ្លូវទៅបុកគល់ដើមស្វាយពេញទំហឹងធ្លាក់បឹងកំប្លោកតែម្ដង ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]