រាជធានីភ្នំពេញ ៖ តារាចម្រៀង សុភ័ក្រ កុសុម៉ា បានធ្វើឲ្យមហាជនចាប់អារម្មណ៍មួយរយៈចុងក្រោយនេះ តាមរយៈតួនាទីជាពិធីការិនីទូរទស្សន៍ ល្បីៗមួយចំនួន ។ កុសុម៉ា តែងតែបង្ហាញភាពក្រមិចក្រមើម កំប្លែងសើចចុកពោះក្នុងកម្មវិធីទាំងនោះ ។
កញ្ញាសុភ័ក្រ កុសុម៉ា មួយរយៈចុងក្រោយនេះការងារសិល្បៈមមាញឹកខ្លាំងដោយលេចមុខ នៅតាមកម្មវិធីរបស់ស្ថានីយទូរទស្សន៍មួយចំនួន។ មានការសួរនាំច្រើនពីបងប្អូន និងមិត្តភក្តិក្រោយពេលនាងធ្វើជាពិធីការិនីក្នុងកម្មវិធី«ពេញចិត្តឬអត់»របស់ទូរទស្សន៍ម៉ាយធីវី ។ នាងលេចធ្លោព្រោះផ្តោះផ្តងវោហារកំប្លែងនាំឲ្យទស្សនិកជនសើចសប្បាយ ។
សុភ័ក្រ កុសុម៉ា និយាយថា «ភាពក្រមិចក្រមើមចូលចិត្តលេងសើចនេះ នាងខ្ញុំនិយមតាំងពីនៅក្មេង តែដល់ពេលមកកាន់កាប់តួនាទីជាពិធីការិនីមក នាងខ្ញុំចេះតែខំរិះរកស្ទីល ថ្មីៗមកបង្ហាញនៅពេលថតកម្មវិធីគ្រាដែលនឹកគិតថាកម្មវិធី«ពេញចិត្តឬអត់» ជាកម្មវិធីល្បីឈ្មោះយូរមកហើយបែបកម្សាន្តសប្បាយ ប្លែកៗ ។
ក្រៅពីនេះនាងខ្ញុំក៏មិននឹកស្មានថាខាងក្រុមការងារម៉ាយធីវី ពិសេសលោកតាប៊ុយជ្រើសរើសយករូបនាងខ្ញុំជាពិធីការិនី ហើយចាប់ដៃគូជាមួយគាត់នោះទេ ។ ដល់ពេលចូលមកកម្មវិធីដែលល្បី នាងខ្ញុំក៏មិនដឹងថាបញ្ចប់ពេលណានោះទេ ក្រោយពេលអ្នករៀបចំនៅតែប្រាប់ថាធ្វើជាបន្តទៀតគ្រាដែលនាងខ្ញុំអត់ដឹងថាបងស្រីខៀវ សានសាណាគាត់ងាកមកកាន់កាប់ជាមួយតាប៊ុយវិញពេលណាដែរ » ។
កញ្ញាសុភ័ក្រ កុសុម៉ា ក្រៅពីបង្ហាញវត្តមានក្នុងកម្មវិធី«ពេញចិត្តឬអត់» ជាពិធីការិនីក្នុងកម្មវិធី«សំនៀងឯក»ជាកម្មវិធីប្រឡងចម្រៀងកំពុងមានការចាប់អារម្មណ៍របស់ស្ថានីយរទស្សន៍បាយ័នផងដែរ ។
កុមារីសម្បុរខ្មៅស្រអែមជាអ្នកចម្រៀងដ៏លេចធ្លោកាលពីច្រើនឆ្នាំមុន បច្ចុប្បន្នគឺកញ្ញាសុភ័ក្រ កុសុម៉ា ដ៏ស្រស់ស្អាត ។
កុមារីអ្នកចម្រៀងលេចធ្លោស្រករគ្នា គឺងួន ស្រីស តែបច្ចុប្បន្នបាត់មុខពីពិភពសិល្បៈទៅហើយ ។
លើសពីជំនាញសិល្បៈចម្រៀង កញ្ញាសុភ័ក្រ កុសុម៉ា ធ្វើជាពិធីការិនីទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
