អូស្ដា្រលី៖ ការប្រកួតដណ្តើមខ្សែក្រវ៉ាត់ពិភពលោក WBO Welterweight បានបញ្ចប់ ដោយម្ចាស់ខ្សែក្រវ៉ាត់ Manny Pacuqiao មិនអាចកាពារខ្សែក្រវ៉ាត់បាន បន្ទាប់ពីចាញ់អ្នកប្រដាល់សញ្ជាតិអូស្រ្តាលី Jeff Horn ដោយការកាត់សេចក្ដីជាឯកច្ឆន្ទ បានធើ្វឲ្យមតិមួយចំនួនក្នុងបណ្ដាញសង្គមមិនពេញចិត្ដ ក៏ដូចជាបាននិយាយថា ការប្រកួតនេះមិនមានភាពយុត្ដិធម៌។
Pacquiao ដែលគ្រោងសងសឹក Floyd Mayweather បើសិនជារូបគេអាចការពារខែ្សក្រវ៉ាត់របស់ខ្លួន បានទទួលបរាជ័យក្រោមថ្វីដៃកីឡាករប្រដាល់សញ្ជាតិអូស្រា្ដលី Jeff Horn ធើ្វឲ្យរូបគេបាត់បង់ខែ្សក្រវ៉ាត់ WBO Welterweight។
បើក្រឡេកទៅមើលការប្រកួតនៅដើមទឹក Horn ហាក់មានប្រៀបជាង Pacquiao ដោយអាចវ៉ៃចូលច្រើនជាង ក៏ដូចជាធើ្វការសម្រុកច្រើនជាងផងដែរ ប៉ុន្ដែចាប់ពីទឹក៨ Horn ហាក់បីដួចជាអន់ថយកម្លាំង ជាពិសេសត្រូវ Pacquiao វ៉ៃចូលជាច្រើនដៃ រហូតទាល់តែបែកជាច្រើនកន្លែងលើផ្ទៃមុខរបស់គេ។
ក្រោយប្រកួតចប់ទាំង១២ទឹករួចមក អ្នកទស្សនាជាច្រើនយល់ឃើញថា Pacquiao អាចនឹងការពារខែ្សក្រវ៉ាត់របស់ខ្លួនហើយ ប៉ុន្ដែចុងក្រោយចៅក្រម បានកាត់ក្ដីឲ្យ Horn ជាអ្នកទទួលបានជ័យជម្នះដែលធើ្វឲ្យមានភាពភ្ញាក់ផ្អើលតែម្ដង។
បើមើលទៅលើស្ថិតិការប្រកួតវិញ គឺបានបង្ហាញថា Pacquiao វ៉ៃចេញច្រើនជាង Horn ជាពិសេសគឺពេលចប់ទឹកទី៩ អាជ្ញាកណ្ដាលបានទៅសួរ Horn តែ Horn ថា រូបគេអាចបន្ដការប្រកួតបាន។
ជាចុងក្រោយការប្រកួតនេះ ត្រូវបានមតិភាគច្រើនប្រៀបប្រដូចទៅនឹងការប្រកួតពេលដែល Pacquiao ចាញ់ Timothy Bradley កាលពីឆ្នាំ២០១២៕
ប្រភព៖ Business Insider
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]