មូលហេតុមួយ ដែលម្ចាស់បទទូរស័ព្ទប្រាប់ផង លោកសាន ផានិត រវល់ប៉ុណ្ណាក៏មិនភ្លេចគ្រួសារ

ភ្នំពេញ៖ តារាចម្រៀងជើងចាស់វស្សា លោក សាន ផានិត ដែលជាម្ចាស់បទចម្រៀងដ៏ល្បី «ទូរស័ព្ទប្រាប់ផង» បានឲ្យដឹងកាលពីពេលថ្មីៗនេះថា របស់ដែលសំខាន់ និងជម្រុញទឹកចិត្ដរបស់លោកឲ្យទៅដល់គោលដៅនោះ គឺគ្រួសារដ៏សាមញ្ញរបស់លោក។

នេះបើតាមបណ្ដាញសង្គមហ្វេសប៊ុករបស់លោក សាន ផានិត បានបង្ហោះរូបភាពប៉ុន្មានសន្លឹក ជាមួយនឹងសារដ៏មានអត្ថន័យថា «រវល់ជារឿង១ល្អបំផុត ប៉ុន្តែសំខាន់ជាងនេះគឺពេលវេលាសំរាប់គ្រួសារដ៍សាមញរបស់ខ្ញុំស្មាមញញឹមរបស់ពួកគាត់ជាមេសោរសំងាត់ជំរុញគោលដៅរបស់ខ្ញុំ។ »។ សម្រាប់សារមួយនេះពិតជាបង្កប់ អត្ថន័យ និងសុភមង្គលមួយ ដែលទោះជាលោករវល់ និងមមាញឹកបែបណា ជាមួយនឹងកិច្ចការងារ ក៏លោកត្រូវតែចំណាយពេលជាមួយនឹងគ្រួសារ ក៏ព្រោះតែគ្រួសាររបស់លោកជារបស់ដ៏សំខាន់ ដែលអាចឲ្យលោកឈានទៅដល់គោលដៅមួយបានយ៉ាងជោគជ័យ។

គួរបញ្ជាក់ថា លោកសាន ផានិត បានរៀបការកាលពីថ្ងៃទី ១៨ ខែឧសភា ឆ្នាំ២០១៤ ជាមួយនារីម្នាក់ ដែលមានវ័យប្រមាណ២៧ឆ្នាំ ជាអ្នកធ្វើការនៅសណ្ឋាគារមួយ ក្នុងរាជធានីភ្នំពេញ និងពិធីមង្គលការរបស់ តារាចម្រៀងរូបនេះ ធ្វើឡើងដោយមានការ អញ្ជើញភ្ញៀវកិត្តិយសចូលរួម ប្រមាណ៧០តុ ក្នុងនោះក៏មានអ្នកសិល្បៈចាស់ ថ្មីមួយចំនួនចូលរួមផងដែរ៕

• សាន ផានិត
• គ្រួសារ