ឃាត់ខ្លួនស្ត្រីជាម្តាយចិញ្ចឹមម្នាក់ ចាប់កូនស្រីអាយុ៥ឆ្នាំ ចងដៃព្យួរជាមួយធ្នឹមផ្ទះ... (មានវីដេអូ)

វៀតណាម៖  ស្រ្តីជាម្តាយចិញ្ចឹមចិត្តឃោរឃៅម្នាក់ ត្រូវសមត្ថកិច្ចឃាត់ខ្លួន ក្រោយពេលវីដេអូឃ្លីបនៃការប្រើទារុណកម្មលើកូនស្រីចុងរបស់ខ្លួន ដោយការចាប់ចងដៃព្យួរឡើងទៅលើជាមួយធ្នឹមផ្ទះ ត្រូវបានបង្ហោះចែកចាយនៅលើអ៊ីនធើណេតរួចមក។

ហេតុការណ៍នេះបានកើតឡើង នៅក្នុងស្រុក Vinh Tuong ភាគខាងជើងខេត្ត Vinh Phuc នៃប្រទេសវៀតណាម។ នេះបើយោងតាមការចុះផ្សាយ ពីសារព័ត៌មានដេលីម៉ែល។

តាមរយៈខ្សែវីដេអូឃ្លីប គេឃើញកុមារីរងគ្រោះស្រែកយំយ៉ាងខ្លាំង និងខំប្រឹងរើបម្រះ ដោយសារត្រូវម្តាយចិញ្ចឹមចាប់ចងដៃនឹងខ្សែបះឡើងទៅលើជាប់ជាមួយនឹងធ្នឹមផ្ទះ ដែលមានកម្ពស់ប្រហែលជិត ១ម៉ែត្រផុតពីដី។

ប្រភពព័ត៌មានបានឲ្យដឹងថា ស្រ្តីជាម្តាយចិញ្ចឹមឈ្មោះ Nguyen Thi Phuong គឺជាអាជីវករលក់ចាបហួយម្នាក់។ ចំណែកកុមារីរងគ្រោះឈ្មោះ N.P.N.A (ឈ្មោះកាត់) មានអាយុ៥ឆ្នាំ។  នៅថ្ងៃកើតហេតុ កុមារីរងគ្រោះបានលួចយកទឹកដោះគោក្រដាសរបស់ម្តាយនាងយកមកផឹក  ជាហេតុធ្វើឲ្យស្រ្តីជាម្តាយតាមទាន់ មានការខឹងយ៉ាងខ្លាំង ហើយក៏ចាប់នាងចងព្យួរបែបនេះទុកជាការព្រមានតែម្តង។

ក្រោយការចុះឃាត់ខ្លួន  នៅចំពោះមុខសមត្ថកិច្ចស្រ្តីជាម្តាយចិញ្ចឹមរូបនេះ បានឲ្យដឹងថា កូនស្រីចិញ្ចឹមរបស់គាត់តែងតែលួចយក របស់របរជាច្រើនផ្សេងទៀត ដែលគាត់បានដាក់លក់យកទៅផឹកស៊ី និងលក់យកលុយចាយខ្លួនឯងជារឿយៗ  ទើបធ្វើឲ្យគាត់ជាម្តាយអត់ទ្រាំមិនបាន។

ក្រោយកើតហេតុ កុមារីរងគ្រោះត្រូវបានបញ្ជូនទៅមន្ទីរពេទ្យ ដើម្បីធ្វើការពិនិត្យសុខភាព ប៉ុន្តែមិនបានរកឃើញថា នាងបានទទួលរងរបួសធ្ងន់ធ្ងរ គួរឲ្យព្រួយបារម្ភឡើយ។ ចំណែកស្រ្តីជាម្តាយចិញ្ចឹមវិញ ប្រភពព័ត៌មានមិនបានឲ្យដឹងថា នឹងត្រូវទទួលទោសបែបណា ចំពោះទង្វើរំលោភលើសិទ្ធិ និងរាងកាយកុមារនេះទេ៕

ទស្សនាវីដេអូខាងក្រោម៖ 

ប្រភព៖ បរទេស

• វីដេអូ