រាជធានីភ្នំពេញ ៖ ជនសង្ស័យម្នាក់ត្រូវបានប្រជាពលរដ្ឋនាំគ្នាចាប់បាន វាយទ្រមខ្លួន បែកមុខមាត់ ខណៈពេលដែលធ្វើសកម្មភាព ដោយហៅម៉ូតូជិះទៅកន្លែងស្ងាត់ វាយប្លន់យកម៉ូតូមួយទាំងព្រឹក តែមិនបានសម្រេច ដោយម្ចាស់ចុកតេឡេពន្លត់ម៉ាស៊ីន ។
ហេតុការណ៍ឃាត់ជនសង្ស័យនេះ បង្កឲ្យមានការភ្ញាក់ផ្អើលកាលពីវេលាម៉ោង០៨ព្រឹក ថ្ងៃទី២៦ ខែមិថុនា ឆ្នាំ២០១៧ នៅចំណុចផ្លូវលោកឧកញ៉ាឌួងងៀប ក្នុងភូមិទ្រុងមាន់ សង្កាត់ទឹកថ្លា ខណ្ឌសែនសុខ ។ ជនសង្ស័យដែលត្រូវឃាត់ខ្លួនឈ្មោះ សី គីហុង ភេទប្រុស អាយុ២៥ឆ្នាំ ស្នាក់នៅមិនពិតប្រាកដ និងមានស្រុកកំណើតភូមិផ្សារលើ ឃុំផ្សារឆ្នាំង ស្រុកកំពង់ឆ្នាំង ខេត្តកំពង់ឆ្នាំ ។ ចំណែកម្ចាស់ម៉ូតូឈ្មោះ គឹម សុផល ភេទប្រុស អាយុ៦៥ឆ្នាំ ជាអ្នករត់ម៉ូតូឌុប ស្នាក់នៅភូមិទឹកថ្លា សង្កាត់ទឹកថ្លា ខណ្ឌសែនសុខ ។ តាមម្ចាស់ម៉ូតូបានឲ្យដឹងថា នៅមុនកើតហេតុ គាត់បានជិះម៉ូតូម៉ាក HONDA DREAM ពណ៌ខ្មៅ ស៊េរី២០១៦ ពាក់ស្លាកលេខ ភ្នំពេញ ១FX-៥២៨២ ។
នៅពេលដល់ស្តុប DN តាមផ្លូវកម្ពុជាក្រោម ត្រូវជនសង្ស័យខាងលើហៅឲ្យឌុបទៅផ្លូវលេខ១៩៨៦ ក្បែរមន្ទីរពេទ្យសែនសុខ ។ នៅពេលទៅដល់ ជនសង្ស័យបានបង្វែរទិសដៅឲ្យឌុបបន្តទៅផ្លូវឌួងងៀប ហើយជនសង្ស័យឲ្យឈប់ ស្រាប់តែវាយរូបគាត់ ហើយដណ្ដើមយកម៉ូតូជិះចេញទៅ ។ តាមម្ចាស់ម៉ូតូឲ្យដឹងទៀតថា នៅពេលជនសង្ស័យជិះបានប្រមាណ៥០ម៉ែត្រ ក៏បានចុកតេឡេពន្លត់ម៉ាស៊ីនហើយស្រែកចោរៗ ត្រូវប្រជាពលរដ្ឋនាំគ្នាដេញចាប់បាន និងវាយមួយដៃមួយជើងពោរមុខ រួចប្រគល់ឲ្យនគរបាលខណ្ឌសែនសុខ ចាត់ការតាមច្បាប់ ។
តាមព័ត៌មានឲ្យដឹងថា កាលពីព្រឹកថ្ងៃទី២២ ខែមិថុនា ឆ្នាំ២០១៧ ជនសង្ស័យបានធ្វើសកម្មភាពវាយប្លន់យកម៉ូតូម៉ាក HONDA DREAM ពណ៌ខ្មៅ ស៊េរី២០១៤ មួយគ្រឿង នៅចំណុចខាងលើម្តងមកហើយ ដោយវាយទៅលើម្ចាស់ម៉ូតូឈ្មោះ សេក ប្រឹង អាយុ៥៦ឆ្នាំ មុខរបររត់ឌុប បណ្តាលឲ្យបែកក្បាលផ្នែកខាងមុខ ដួលសន្លប់ប្លន់យកម៉ូតូគេចខ្លួនបាត់ និងលើនេះជួបសំណាង់អាក្រក់ត្រូវបានចាប់ខ្លួន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
