ពិតជាអស្ចារ្យ! ចំណាយពេល៣៤ថ្ងៃ បើករថយន្តឡើងដល់ភ្នំឱរ៉ាល់ កំពុងទទួលការចាប់អារម្មណ៍ពីមហាជន (មានវីដេអូ)

កំពង់ស្ពឺ៖ ជារឿងដ៏អស្ចារ្យ និងមិនធ្លាប់មានពីមុនមកនៅប្រទេសកម្ពុជា ដែលប្រភេទរថយន្តម៉ាកហ្ស៊ីប ២គ្រឿង បានចំណាយពេលរហូត៣៤ថ្ងៃ ឡើងទៅដល់កំពូលភ្នំឱរ៉ាល់ ដែលជាភ្នំខ្ពស់ជាងគេបង្អស់នៅកម្ពុជា មានកម្ពស់ប្រវែង ១៨១៣ម៉ែត្រ។

ដោយយោងតាមគណនីហ្វេសប៊ុក Pol Rider បានបង្ហោះរូបភាព ភ្ជាប់ជាមួយវីដេអូឲ្យដឹងថា «កំពស់ 1813 m ពួកគាត់អាចឡើងដល់ក្នុងរយៈពេល 34ថ្ងៃ ពិតជាអស្ចារ្យមែន។ យើងសាកស្រមៃមើលថា យើងអាចរស់នៅបានទេក្នុងព្រៃជ្រៅរយៈពេលជាងមួយខែស៊ូទ្រាំនឹងការលំបាកគ្រប់បែបយ៉ាង ខ្វះទឹក ខ្វះស្បៀង ឡានខូច អាកាសធាតុជាងដប់អង្សា ផ្លូវធ្វើដំណើរឡើងចំងាយ៨គីឡូ និងកំពស់1813 m ដូចពួកគាត់បានទេ។ ហើយឡានបៃតងនេះបានដាច់កាបពេលសណ្តោងឡើងភ្នំ រួចក្រឡាប់ធ្លាក់មកក្រោមក្នុងចំងាយជាង៥០m ហើយបណ្តាលឲ្យ Driver និង Co-Driver បានរងរបួសស្រាល។ តែយ៉ាងណាក៏ដោយពួកគាត់បានបំបែបកំណត់ត្រាជិះឡាន off-road ឡើងកំពូលភ្នំដែលខ្ពស់ជាងគេនៅកម្ពុជាមុនគេ។ សូមបញ្ជាក់ថា ភ្នំឱរ៉ាល់គ្មានផ្លូវសំរាប់ឡាន ឬម៉ូតូឡើងដូចនៅភ្នំបូកគោនោះទេ»..។

គួរបញ្ជាក់ថា នេះគឺជាដំណើរផ្សងព្រេងមួយដ៏អស្ចារ្យ ហើយនៅក្នុងនោះ ក៏មានបងប្អូន មហាជនជាច្រើនដែលនិយមលេងបណ្តាញសង្គមហ្វេសប៊ុក ធ្វើការអបអរសាទរ និងកោតសរសើរផងដែរ ដែលពួកគាត់បានព្យាយាម អត់ធ្មត់សម្រេចបានគោលដៅជោគជ័យបែបនេះ៕ 

រូបភាព និងវីដេអូ៖ Pol Rider