ឪពុក ចាន់ វឌ្ឍនាកា ទទួលបានការកោតសរសើរពីមហាជន ដែលតែងតែយកចិត្តទុកដាក់លើវិស័យកីឡាបាល់ទាត់

ភ្នំពេញ៖ កាលពីម្សិលមិញនេះ នៅលើទំព័រហ្វេសប៊ុកមួយ បានបង្ហោះរូបភាពជាច្រើនសន្លឹក ដែលបង្ហាញពី ឯកឧត្តម ចាន់ ចេស្តា អភិបាលខេត្តកំពត កំពុងប្រើម៉ាស៊ីនកាត់ស្មៅ នៅលើទីលានបាល់ទាត់ នៅខេត្តកំពត ហើយទទួលបានការចាប់អារម្មណ៍ជាខ្លាំងពីមហាជន ដោយបានសរសើរថា លោក ពិតជាយកចិត្តទុកដាក់ទៅលើវិស័យកីឡាមួយនេះ។

នៅក្នុងការបញ្ចេញមតិរបស់ទំព័រ Footballer of Kampot Province បានលើកឡើងថា «តើមានថ្នាក់ដឹកនាំខេត្តណាដែលបានជួយសាងសង់ទីលានកីឡាសម្រាប់បំរើផលប្រយោជន៏រួមហើយថែមទាំងជួយថែទាំទីលានទៀត នេះជាភាពដ៏សាមញ្ញរបស់ ឯកឧត្តម ចាន់ ចេស្តា អភិបាល នៃគណៈអភិបាល ខេត្តកំពត» ។

អ្វីដែលគួរឲ្យចាប់អារម្មណ៍ជាងនេះទៀតនោះ តាមរយៈរូបភាពជាច្រើនសន្លឹកនេះ ត្រូវបាន ឯកឧត្តម ចាន់ ចេស្តា ដែលជាឪពុកបង្កើតរបស់ កីឡាករ ចាន់ វឌ្ឍនាកា បានបញ្ចេញមតិឆ្លើយតបថា «មានឱកាសធ្វើអោយពហុកីឡាដ្ឋានបានល្អ ដោយសារប្រទេសយើងមានសន្តិភាពនិងការអភិវឌ្ឍន៍ក្រោមការដឹកនាំដ៏ល្អបំផុតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ សម្ដេចតេជោ តែងតែឧបត្ថមជាបន្តបន្ទាប់ដល់ការអភិវឌ្ឍន៍ពហុកីឡាដ្ឋាននេះ ។ សូមគោរពថ្លែងអំណរគុណ និងសូមគោរពជូនពរសម្តេចតេជោ សម្តេចកិត្តិព្រឹទ្ធបណ្ឌិត បុត្រាបុត្រីនិងចៅៗជាទីស្រឡាញ់មេត្តាទទួលបាននូវសុខភាពល្អនិងជយ័ជម្នះគ្រប់ភារកិច្ចនៃការដឹកនាំប្រទេសជាតិអោយសម្បូររុងរឿងតទៅមុខទៀត» ៕ 

រូបភាព៖ Footballer of Kampot Province