ព្រឺឆ្អឹងខ្នង! នរណាមិនល្បីផ្លូវមួយនេះ បើលងស្តែងៗយ៉ាងនេះ

អូស្ត្រាលី៖ ទីកន្លែងមួយចំនួនត្រូវបានគេជឿថាមានព្រលឹង ឬវិញ្ញាណវិលវល់ ខណៈមនុស្សមួយចំនួននៅមិនទាន់អាចជឿបានទេ ព្រោះពួកគេមិនធ្លាប់បានជួបដោយផ្ទាល់ភ្នែក។ ក្រឡេកមកមើលផ្លូវ Wakehurst Parkway នៃទីក្រុងស៊ីដនី មានភាពល្បីល្បាញយ៉ាងខ្លាំង ថាមានហេតុការណ៍ចម្លែកៗជាច្រើនបានកើតឡើង ពាក់ព័ន្ធទៅនឹងវិញ្ញាណលងបន្លាចអ្នកដំណើរ យ៉ាងគួរឲ្យភ័យរន្ធត់បំផុត។ ទីកន្លែងមួយនេះត្រូវបានសារព័ត៌មានដេលីម៉េល ប្រចាំនៅអូស្ត្រាលីចុះផ្សាយ នៅថ្ងៃទី ១៧ ខែមិថុនា ឆ្នាំ២០១៧។

ផ្លូវ Wakehurst Parkway ស្ថិតនៅក្នុងភូមិសាស្ត្រនៃតំបន់ Deep Creek Reserve មានខ្យល់បក់ល្ហិចៗ និងមានសភាពស្ងប់ស្ងាត់ ព្រោះមិនសូវមានអ្នកដំណើរឆ្លងកាត់ច្រើននោះទេ។ ជានិច្ចកាល គេតែងទទួលបានសេចក្តីរាយការណ៍ថាមានហេតុការណ៍ចម្លែកកើតឡើងនៅម្តុំនោះ ដែលជាទីតាំងធ្លាប់កើតមានឧក្រិដ្ឋកម្ម និងគ្រោះថ្នាក់ចរាចរណ៍ បណ្តាលឲ្យមនុស្សស្លាប់។

សេចក្តីរាយការណ៍ពីកាសែត Manly Daily ឲ្យដឹងថា អ្នកដំណើរខ្លះធ្លាប់ប្រទះឃើញអ្នកថ្មើរជើងនៅម៉ោង ៣ទៀបភ្លឺ។ អ្នកខ្លះថាផ្លិតជូតកញ្ចក់មុខរបស់រថយន្តពួកគេស្រាប់តែឈប់ដំណើរការ និងទ្វាររថយន្តបើកសោរដោយខ្លួនឯងទៀតផង។ អ្វីដែល គួរឲ្យស្រៀវសាច់ជាងគេបំផុតនោះ គឺធ្លាប់មានពាក្យចចាមអារ៉ាមមួយចំនួនថា មានអ្នកដំណើរខ្លះឃើញ មនុស្សស្រីស្លៀកពាក់ពណ៌ស បង្ហាញខ្លួននៅកៅអីខាងក្រោយរបស់ពួកគេ។ មនុស្សស្រីនោះត្រូវមនុស្សជាច្រើនស្គាល់ឈ្មោះថា Kelly ជាដូនជីម្នាក់។

បើយោងតាមការអះអាងរបស់អ្នកស្រី Mary Loughland ភ្នាក់ងារសិក្សាអំពីវិញ្ញាណឲ្យដឹងថា អ្នកស្រីធ្លាប់ប្រទះ Kelly ប៉ុន្មានដងរួចមកហើយ រាល់ពេលដែលអ្នកស្រីជិះឆ្លងកាត់ព្រះវិហារមួយកន្លែងនៅលើដងផ្លូវ ដែលគេល្បីថាមានហេតុការណ៍ចម្លែកកើតឡើងនោះ។

អ្នកស្រី Mary Loughland បានរំឮកឡើងវិញប្រាប់ដល់កាសែត Manly Daily ថា៖ «ខ្ញុំធ្លាប់ជិះកាត់ផ្លូវនោះលើកដំបូងបំផុតកាលពី៦ឆ្នាំមុន។ ពេលនោះគឺម៉ោង២ទៀបភ្លឺ ហើយខ្ញុំមានអារម្មណ៍ថាដូចមានមនុស្សកំពុងស្ទាប ក ខាងក្រោយរបស់ខ្ញុំអ៊ីចឹង។ វាមានអារម្មណ៍ដូចជាដៃដ៏ត្រជាក់មួយ»។ អ្នកស្រីបន្ថែមថា៖ «ខ្ញុំមានអារម្មណ៍ថា Kelly នាងអាចនឹងវង្វេងផ្លូវ ឬចង់ប្រាប់សារអ្វីមួយ។ នាងអាចមិនមែនជាសភាវអាក្រក់ទេ គ្រាន់តែវត្តមានរបស់នាងធ្វើឲ្យយើងមានការភ្ញាក់ផ្អើល។ នាងប្រហែលជាចង់ឲ្យគេជូននាងចាកចេញពីទីនោះក៏ថាបាន»។

អតីតអ្នកបើកតាក់ស៊ីម្នាក់ លោក Hla Oo បានរៀបរាប់ពីបទពិសោធន៍របស់ខ្លួននៅក្នុងរថយន្តផងដែរ។ លោកបានឲ្យដឹងថា លោកធ្លាប់បានឃើញស្ត្រីវ័យក្មេងម្នាក់សំបុរប្រផេះស្លៀកស អង្គុយចំកណ្តាលនៃកៅអីរថយន្តខាងក្រោយ សម្លឹងមើលមកលោក។ លោក Hla និយាយថា៖ «នាងស្លៀករ៉ូបម្យ៉ាងពណ៌ស មើលទៅដូចសំលៀកបំពាក់ដូនជីសាសនាគ្រឹស្ត។ ខ្ញុំមើលមុខនាងមិនច្បាស់ទេ គ្រាន់តែចាំទម្រង់មុខ និងមានកែវភ្នែកពណ៌បៃតងក្រម៉ៅ។ ខ្ញុំច្បាស់ណាស់ឃើញតាមកញ្ចក់រថយន្ត នាងអង្គុយស្តែងៗខាងក្រោយសម្លឹងមើលមកខ្ញុំ»។

លោកបន្ថែមទៀតថា លោកធ្លាប់ឮអ្នកដំណើរម្នាក់ប្រាប់ថា ដូនជីនោះជាជនជាតិស្កុតឡែន បានស្លាប់តាមផ្លូវនោះ កាលពី៤០ឆ្នាំមុន ហើយក៏កើតមានការលងតាំងពីពេលនោះមក។

គួរបញ្ជាក់ដែរថា មានការថតវីដេអូឯកសារស្តីអំពីទីតាំងនេះផងដែរ ដែលមានចំណងជើងថា Haunted Shores ៕

ប្រភព៖ DailyMail

• ទីកន្លែង
• អបិយជំនឿ