ភ្នំពេញៈ បន្ទាប់ពីសាងភាពល្បីល្បាញ ក្នុងពិភពសិល្បៈ អស់ជាច្រើនទស្សវត្សរ៍ តារាចម្រៀង ព្រាប សុវត្ថិ គ្រោងដឹកដៃ កូនប្រុសសំណព្វចិត្តទាំងបីរបស់លោកចូលច្រៀងក្នុងផលិតកម្មហង្សមាស ថែមទៀត។
តាមការទម្លាយឲ្យដឹងពីគម្រោងដឹកដៃកូនប្រុសពីរនាក់ ចូលច្រៀងនៅផលិតកម្មហង្សមាសនេះ គឺបន្ទាប់ពី ព្រាប សុវត្ថិ បាននាំកូនប្រុសចេញទៅច្រៀងរាំ នៅលើទឹកដីនៃប្រទេសជប៉ុន កាលពីពេលកន្លងទៅ។
យោងតាមប្រភពពីអ្នកដឹកនាំសម្តែង នៅផលិតកម្មហង្សមាស បានឱ្យដឹងថា ព្រាប សុវត្ថិ បានត្រៀមរួចជាស្រេច ក្នុងការរុញកូនប្រុស២នាក់ ឱ្យចូលច្រៀងនៅផលិតកម្មហង្សមាស នោះ គឺប្រុសសង្ហា សុវត្ថិ មុនីវណ្ណ សុវត្ថិ សិរីវុធ និងសុវត្ថិ មុនីនាគ។
ប្រភពបន្តថា កន្លងមកកូនប្រុសសង្ហាទាំងបីរបស់លោក បានអមដំណើរឪពុក និងឡើងរាំយ៉ាងស្ទាត់ជំនាញផងដែរ។ មានការលើកឡើងដែរថា ក្នុងចំណោមកូនប្រុសទាំងបី គឺពួកគេបានធ្វើតេស្តសំឡេងហើយ គឺពួកគេសុទ្ធតែមានសមត្ថភាព មិនចាញ់ឪពុករបស់គេឡើយ ហើយផលិតកម្មធំនេះ បានយល់ព្រមយកកូនព្រាប សុវត្ថិ ជាផ្លូវការទៅហើយ។
ទោះយ៉ាងណា មជ្ឍមណ្ឌលព័ត៌មានដើមអម្ពិល នៅមិនទាន់ស្វែងរក ការបញ្ជាក់បន្ថែមពីតារាចម្រៀង ព្រាប សុវត្ថិបាននៅឡើយទេ ខណៈដែលភាគីផលិតកម្ម ក៏មិនទាន់មានការបំភ្លឺនៅឡើយដែរ។
ប៉ុន្តែកន្លងមក លោកព្រាប សុវត្ថិ ធ្លាប់លើកឡើងដែរថា លោក បើកផ្លូវឲ្យកូនៗទាំងអស់ មានសិទ្ធិជ្រើសរើសជំនាញ និងអាជីព ដែលពួកគេចូលចិត្ត បូករួមទាំងការងារសិល្បៈនេះ។ ទោះជាយ៉ាងណា លោកក៏ជំរុញឲ្យកូនៗទាំងអស់របស់លោក ឲ្យបញ្ចប់ការសិក្សាលើកជំនាញណាមួយ នៅមហាវិទ្យាល័យផងដែរ មុនពេលប្រឡូកក្នុងការងារសិល្បៈ។
ប្រសិនបើគម្រោងចូលច្រៀងរបស់កូនប្រុស លោក ព្រាប សុវត្ថិ ចេញរូបរាងមែននោះ ព្រាប សុវត្តិ និងក្លាយជាតារាចម្រៀងជើងចាស់ទីពីរ ដែលអាចរុញកូនឲ្យចូលច្រៀង ក្នុងផលិតកម្ម ហង្សមាសបានបន្ទាប់ពី លោក ហួរ ឡាវី ដែលបានរុញច្រាន កូនស្រីវី ឌីណែត ចូលច្រៀងលើទ្រនំល្បីល្បាញមួយនេះ។ រូបរាងសង្ហារបស់កូនប្រុស លោក ព្រាប សុវត្ថិ ក៏នឹងទាក់ទាញការចាប់អារម្មណ៍ខ្លាំង ពីមហាជនផងដែរ ដូចនេះពួកគេក៏មិនពិបាក ក្នុងការទាញបានការគាំទ្រ បានយ៉ាងងាយ៕
ប្រភព៖ ដើមអម្ពិល
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
