ម្យ៉ាងដែរ! ក្រុមហ៊ុនមួយនៅជប៉ុន អនុញ្ញាតឲ្យបុគ្គលិកយកសត្វឆ្មាមកកន្លែងធ្វើការ ដើម្បីជួយ...

ជប៉ុន៖  អាចចាត់ទុកថាជារឿងចម្លែក និងគួរភ្ញាក់ផ្អើលមួយ ដែលក្រុមហ៊ុនអនុញ្ញាតឲ្យបុគ្គលិករបស់ខ្លួន នាំយកសត្វឆ្មាចិញ្ចឹមរបស់ពួកគេ ចូលក្នុងការិយាល័យធ្វើការបាន។

បើតាមប្រភពព័ត៌មានបានឲ្យដឹងថា ក្រុមហ៊ុនបច្ចេកវិទ្យា (IT) Ferray មានមូលដ្ឋាន នៅទីក្រុងតូក្យូ ប្រទេសជប៉ុន បានអនុញ្ញាតឲ្យបុគ្គលិករបស់ខ្លួន យកសត្វឆ្មាចិញ្ចឹមរបស់ពួកគេមកកន្លែងធ្វើការបាន។  ជាពិសេសក្រុមហ៊ុនមួយនេះថែមទាំង ផ្តល់ប្រាក់លើកទឹកចិត្តដល់បុគ្គលិកបន្ថែម  សម្រាប់ការមើលថែទាំឆ្មារបស់ពួកគេទៀតផង។ ព្រោះនេះក៏ជាផ្នែកមួយ ក្នុងការជួយលើកកម្ពស់ជួយសង្រ្គោះសត្វផងដែរ។ ចំពោះមូលហេតុវិញគឺដើម្បីជួយបន្ថូរបន្ថយភាពតានតឹងអារម្មណ៍របស់បុគ្គលិក  កុំឲ្យស្ត្រេស និងមានភាពឯកោ។

លោក Hidenobu Fukuda ប្រធាននៃក្រុមហ៊ុន Ferray បានថ្លែងប្រាប់សារព័ត៌មានឲ្យដឹងថា ខាងក្រុមហ៊ុនផ្តល់ប្រាក់លើកទឹកចិត្តបន្ថែមចំនួន ៥,០០០យេន (ប្រហែល ៤៥ដុល្លារអាមេរិក) ដល់បុគ្គលិកជារៀងរាល់ខែ សម្រាប់ចូលរួមចំណែកជួយ និងមើលថែទាំសត្វឆ្មាចិញ្ចឹមរបស់បុគ្គលិក។

ប្រភពដដែលបន្តថា ការរៀបចំឲ្យមានលក្ខខណ្ឌពិសេសបែបនេះឡើង គឺបន្ទាប់ពីមានបុគ្គលិកម្នាក់ បានស្នើសុំក្រុមហ៊ុន ដើម្បីយកសត្វឆ្មាចិញ្ចឹមរបស់ខ្លួនមកកាន់កន្លែងធ្វើការជាមួយ។

យោងតាមការសិក្សាមួយចំនួនបានបង្ហាញថា ទំនាក់ទំនងរវាងសត្វចិញ្ចឹមនិងម្ចាស់ គឺជារឿងមួយដែលប្រសើរបំផុត ដែលអាចជួយកាត់បន្ថយសម្ពាធឈាម និងកូឡេស្តេរ៉ុល ផងដែរ។ នេះបើយោងតាមកាសែត Huffington Post បានចុះផ្សាយ។

ប៉ុន្តែទោះបីជាយ៉ាងណា  វាក៏អាចបង្កនូវបញ្ហាមួយចំនួន ក្នុងការរិយាល័យដែលជាកន្លែងធ្វើការផងដែរ។ ព្រោះពេលខ្លះសត្វឆ្មាទាំងអស់នោះ អាចបង្កបញ្ហារំខាន តាមរយៈការប៉ះខ្សែភ្លើង  ឬកុងតាក់ផ្សេងៗ  ដែលអាចបណ្តាលឲ្យរលត់កំព្យូរទ័រ ឬបង្កជាហានិភ័យផ្សេងទៀតជាដើម៕

តើសម្រាប់ប្រិយមិត្តវិញយល់យ៉ាងណាដែរ?  

ប្រភព៖ បរទេស

• ការងារ