ពាក់មី សរុបថវិកា បានមកពីការធ្វើបុណ្យ៧ថ្ងៃ និងកាលពីលើកមុនផង ប្រគល់ឱ្យម្តាយ អ៊ិត សេដ្ឋា បានជាង៧ម៉ឺនដុល្លារ!

 ភ្នំពេញ៖ មុននេះបន្តិចនៅលើបណ្តាញទំនាក់ទំនង សង្គមហ្វេសប៊ុករបស់តារាកំប្លែងលោក ពាក់មី បានប្រកាសប្រាប់ពីចំនួនទឹកប្រាក់សរុប ដែលបានមកពីការធ្វើបុណ្យ៧ថ្ងៃរបស់ លោក អ៊ិត សេដ្ឋា គឺមានសរុបទាំងអស់ចំនួនជាង១ម៉ឺនដុល្លារ។

គិតសរុបថវិកាទាំងអស់ដែលប្រមូលបានទាំងកាលលើកមុន និងគិតមកដល់ត្រឹមពិធីបុណ្យ៧ថ្ងៃនេះលោក ពាក់មី បានប្រាប់ថាគឺមានទាំងអស់ បានជាង៧ម៉ឺនដុល្លារឯណោះ ដោយបានប្រគល់ជូនម្តាយរបស់លោក អ៊ិត សេដ្ឋាផងដែរ។

យោងតាមហ្វេសប៊ុកលោក ពាក់មី នៅថ្ងៃនេះបានឱ្យដឹងទាំងស្រុងដូច្នេះថា៖

«សរុបថវិកាបុណ្យ៧ថ្ងៃបង អ៊ិត សេដ្ឋា ទាំងទទួលក្នុងរោងបុណ្យ និងតាមរយៈលេខទូរស័ព្ទ ខ្ញុំផ្ទាល់ចំនួន 17350$ បូកទាំងថវិកាប្រគល់ជូនលើកមុនចំនួន 62420$ គឺមានចំនួនសរុបទាំងពីរលើកស្មើនឹង 79770$ សូមជូនបុណ្យកុសលដល់បងប្អូនទាំងអស់គ្នាផង សូមអរគុណ»។

គួរឱ្យដឹងដែរថា ពិធីករមានឈ្មោះល្បីល្បាញរបស់ស្ថានីយទូរទស្សន៍ស៊ីធីអិន លោក អ៊ិត សេដ្ឋា បានទទួលមរណភាព កាលពីថ្ងៃអាទិត្យទី៤មិថុនាកន្លងទៅ ដោយសារជំងឺមហារីក។ 

ទន្ទឹមនឹងនេះគេឃើញមានសប្បុរសជនជាច្រើន បាននាំគ្នាជួយឧបត្ថម្ភដល់គ្រួសារលោកសេដ្ឋាជាបន្តបន្ទាប់។ យ៉ាងណាក៏សូមឱ្យវិញ្ញាណក្ខន្ធលោក អ៊ិត សេដ្ឋា បានទៅកាន់ក្នុងទីឋានបរមសុខតរៀងទៅ៕ 

• ពាក់មី
• អុិត សេដ្ឋា