ភ្នំពេញ៖ កញ្ញា សោម ស្រីនាថ តារាសម្តែងស្រី និងជាពិធីការិនី វ័យក្មេងរូបស្រស់ ពេលនេះ កំពុងតែជួបទុក្ខលំបាក ព្រមទាំងបាក់កម្លាំងទឹកចិត្តយ៉ាងខ្លាំង ព្រោះតែអ្នកម្តាយជាទីស្រឡាញ់របស់ខ្លួនបានធ្លាក់ខ្លួនឈឺធ្ងន់ធ្ងរ ដោយសារជំងឺមហារីកយ៉ាងសាហាវ ហើយកំពុងតែរីករាលដល់ចូលដល់ខួរក្បាលផងដែរ។
ស្ថានភាពនេះបានធ្វើឱ្យកញ្ញា សោម ស្រីនាថ ពិតជាក្តីបារម្ភខ្លាំងណាស់ ប៉ុន្តែក៏មិនភ្លេចធ្វើខួបកំណើតជូនអ្នកម្តាយខ្លួនដែរ។
ដោយមុននេះបន្តិចកញ្ញា សោម ស្រីនាថ បានយកនំខេកដ៏ស្រស់ស្អាតមួយ ដើម្បីទៅអបអរថ្ងៃកំណើតរបស់ម្តាយនៅក្នុងបន្ទប់សង្រ្គោះបន្ទាន់ក្នុងមន្ទីរពេទ្យ។
ទន្ទឹមនឹងនេះកញ្ញា សោម ស្រីនាថ ក៏បានរៀបរាប់ឱ្យដឹងនៅលើហ្វេសប៊ុករបស់នាងទាំងស្រុងដូច្នេះថា៖
«រីករាយថ្ងៃបុណ្យខួបកំណើត អ្នកម៉ែកម្សត់របស់កូនអើយ ឆ្នាំនេះពិតជាកម្សត់ខ្លាំងណាស់កូនសែនអាណិតម៉ែជាពន់ពេក ថ្ងៃនេះជាថ្ងៃខួបកំណើតអ្នកម៉ែកម្សត់របស់កូន រាល់ឆ្នាំកូនតែងតែនាំម៉ែទៅញ៉ាំអី Supried ម៉ែ ប៉ុន្តែឆ្នាំនេះម៉ែមិនអាចក្រោករួចទៅញ៉ាំអីជាមួយកូនបានទេ ព្រោះម៉ែនៅបន្ទប់សង្រ្គោះបន្ទាន់។
ទោះកូនដឹងថា ពេលវេលាដែលកូនបាននៅក្បែរម៉ែវាសល់តិច ប៉ុន្តែកូនមិនចុះចាញ់ កូននឹងប្រឹងអោយអស់ពីសមត្ថភាពដើម្បីជួយម៉ែ កូនពិតជាខ្លាចថ្ងៃនោះមកដល់ណាស់ម៉ែ។ ខ្លោចចិត្តអាណិតប្អូន គេមកប្រាប់ខ្ញុំ បងហា៎ ពេលម៉ាក់ជាយើងនាំម៉ាក់ទៅលេងបូកគោទៀតណា៎បង ភ្នែកស្លក់ ស្គមអស់ហើយមិនដែលបានគេងទេមើលម៉ែទល់ភ្លឺរហូត អត់បានទៅរៀនទៀត។
ម៉ែហា៎ ម៉ែត្រូវខំប្រឹងណា៎ម៉ែ កូនជឿថាម៉ែអាចធ្វើវាបាន។ ថ្ងៃនេះកូនសូមជូនពរ និងបន់ស្រន់ដល់ទេវតាគ្រប់ទិសទីតាមថែរក្សាម៉ែអោយឆាប់ជា យើងត្រលប់ទៅផ្ទះយើងវិញឱ្យម៉ែមានកម្លាំងតតាំងនឹងជំងឺកាចសាហាវនេះ។ យើងនឹងតតាំងពុះពារឧបសគ្គ ក្នុងជីវិតទាំងអស់គ្នាណា៎ម៉ែ កូនស្រលាញ់ម៉ែខ្លាំងណាស់ ម៉ែជាកម្លាំងចិត្តរបស់កូន»។
ពិតជាគួរឱ្យអាណិតខ្លាំងណាស់ ជូនពរអ្នកម្តាយរបស់កញ្ញា សោម ស្រីនាថ ឱ្យមានសុខភាពល្អប្រសើរ និងឆាប់ជាពីជំងឺដ៏កាចសាហាវក្នុងពេលឆាប់នេះផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
