ភ្នំពេញ៖ ចាន់ វឌ្ឍនាកា បានបង្ហាញចំណាប់អារម្មណ៍រីករាយយ៉ាងខ្លាំង ក្រោយពីបានមកដល់ទឹកដីព្រះរាជាណាចក្រកម្ពុជាវិញ ដែលជាការកោះហៅចូលរួមក្រុមជម្រើសជាតិត្រៀមប្រកួតមិត្តភាពអន្តរជាតិជាមួយក្រុមឥណ្ឌូនេស៊ី នៅថ្ងៃទី០៨ ខែមិថុនា ឆ្នាំ២០១៧ ខាងមុខនេះ។
អ្វីដែលធ្វើឲ្យ ចាន់ វឌ្ឍនាកា កាន់តែត្រេកអរទៀតនោះ គឺរូបគេបានជួបជុំគ្រួសារវិញ ក្រោយពីមិនបានជួបគ្នាមួយរយៈធំ ដោយសារតែមានភារកិច្ចប្រកបអាជីពជាកីឡាករបាល់ទាត់នៅប្រទេសជប៉ុន ដែលខ្សែប្រយុទ្ធវ័យក្មេងរូបនេះ លេងនៅក្នុងក្លិប Fujieda MYFC។
ខ្សែប្រយុទ្ធវ័យ២៣ឆ្នាំរូបនេះ បានថ្លែងពីអារម្មណ៍របស់ខ្លួននៅក្នុងបណ្តាញសង្គមហ្វេសប៊ុកឲ្យដឹងថា «គ្មានអ្វីសប្បាយរីករាយជាងជួបជុំក្រុមគ្រួសារ និងញុាំអាហារពេលល្ងាចជាមួយគ្នានោះទេ អារម្មណ៍សប្បាយរីករាយក៏កើតឡើងភ្លាមៗ» ។
គួរឲ្យដឹងថាផងដែរថា កាលពីល្ងាចមិញនេះ ចាន់ វឌ្ឍនាកា ក៏បានចូលរួមហ្វឹកហាត់ជាមួយក្រុមជម្រើសជាតិជាលើកដំបូងផងដែរ ហើយការហ្វឹកហាត់បានប្រព្រឹត្តទៅយ៉ាងរលូន ដើម្បីត្រៀមប្រកួត លក្ខណៈមិត្តភាពអន្តរជាតិជាមួយក្រុមឥណ្ឌូនេស៊ី។
ក្រុមគោព្រៃកម្ពុជាមិនដែលឈ្នះ ក្រុមជម្រើសជាតិឥណ្ឌូនេស៊ី អស់រយៈពេល២០ឆ្នាំមកហើយ ដូច្នេះចាំមើលថា តើលើកនេះ លទ្ធផលនឹងទៅជាយ៉ាងណា ខណៈដៃគូប្រកួត បានធ្វើដំណើរមកដល់ប្រទេសកម្ពុជាហើយ ដើម្បីត្រៀមខ្លួនប៉ះគ្នា នៅថ្ងៃទី០៨ ខាងមុខនេះ ដែលការប្រកួតនឹងចាប់ផ្តើមវេលាម៉ោង ៦:៣០នាទីល្ងាច នៅពហុកីឡដ្ឋានជាតិអូឡាំពិក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]