បរទេស៖ អតីតខែ្សការពាររបស់ក្រុមបិសាចក្រហម Manchester United កីឡាករ Partice Evra បានបង្ហើបរឿងដែលថា រូបគេនៅតែប្រកបអាជីពជាកីឡាករបាល់ទាត់ស្របពេលដែលខ្លួនមានវ័យ៣៦ឆ្នាំហើយ គឺដោយសារតែ កីឡាកររូបនេះមានបងប្អូនប្រុសស្រីចំនួនដល់ទៅ២៤នាក់ ដែលគេត្រូវចិញ្ចឹមតទៅទៀត។
Evra បានចំណាយពេល៨ឆ្នាំ នៅ Manchester United ចន្លោះពីឆ្នាំ២០០៦ ដល់២០១៤ ហើយបុរសសញ្ជាតិបារាំងរូបនេះ បានវិលត្រលប់មកកាន់ទឹកដី Old Trafford កាលពីយប់មិញ ក្នុងការប្រកួតថែ្លងអំណរគុណដល់ Michael Carrick។
បុរសវ័យ៣៦ឆ្នាំ ដែលសព្វថៃ្ងកំពុងប្រកបអាជីពនៅក្លិបបារាំង Marseille បានចាប់ដៃគ្នាឡើងវិញជាមួយកីឡាករ Man Utd ឈុតឆ្នាំ២០០៨ ដើម្បីលេងទល់នឹងក្រុម All Stars ក្នុងការប្រកួតមិត្ដភាពមួយដើម្បីថែ្លងអំណរគុណដល់កីឡាករ Carrick ដែលបានចំណាយពេលនៅជាមួយក្លិបម្ចាស់ពានលីកអង់គ្លេស២០សម័យ អស់រយៈពេល១១ឆ្នាំកន្លងមកនេះ។
Carrick បានចុះកុងត្រាបន្ដនៅក្លិបបិសាចក្រហម Manchester United រយៈពេល១រដូវកាលទៀត ហើយ Evra ជឿថា អតីតខែ្សការពាររបស់ក្រុមជម្រើសជាតិអង់គ្លេស នឹងដើរតាមគន្លងរបស់គេ ក្នុងការប្រកបអាជីពបាល់ទាត់ក្នុងរយៈពេលវែងតទៅមុខទៀត។
Evra និយាយថា «ខ្ញុំសង្ឃឹមថារូបគេនឹងអាចលេងបានជាច្រើនឆ្នាំទៀត គេត្រូវតែដើរតាមគន្លងរបស់ខ្ញុំ។ ខ្ញុំនៅតែលេង ដោយសារតែខ្ញុំមានបងប្អូនប្រុសស្រី២៤នាក់ ដែលត្រូវចិញ្ចឹម ដូច្នេះហើយខ្ញុំមិនអាចឈប់បានទេ ខ្ញុំត្រូវតែរត់» ៕
ប្រភព៖ Dailymail
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]