លេងសើចម៉េចបាន! បាល់ទាត់ ព័រទុយហ្គាល់ ខាប់ អ្នកយកបាល់ឲ្យជិះសុទ្ធតែ ដ្រូន (មានវីដេអូ)

ព័រទុយហ្គាល់៖ ការប្រកួតបាល់ទាត់ ព័រទុយហ្គាល់ ខាប់ (Portuguese Cup) វគ្គផ្តាច់ព្រ័តបានប្រព្រឹត្តទៅកាលពីថ្ងៃអាទិត្យ។

ការប្រកួតធ្វើឡើងនៅពហុកីឡដ្ឋាន Estadio Nacional   និងមានបុរសម្នាក់បានឡើងជិះដ្រូន ហើយហោះចេញពីគន្លងផ្លូវ  ឆ្ពោះទៅរកអាជ្ញាកណ្តាល ដែលកំពុងឈរនៅក្នុងតារាង ដើម្បីប្រគល់បាល់ឲ្យ សម្រាប់ការប្រកួតពានរង្វាន់ព័រទុយហ្គាល់ ចាស់ជាងគេបំផុតនេះ។  

បុរសដែលជាមន្រ្តីនៅក្នុងការប្រកួតម្នាក់នោះ បានបង្ហាញសមត្ថភាពជិះដ្រូន និងទប់លំនឹងយ៉ាងអស្ចារ្យ ដោយធ្វើការហោះរយៈពេលប្រហែល ២០វិនាទី  រយៈកម្ពស់ជាង១០ម៉ែត្រ មុនពេលដែលធ្វើការចុះចត ហើយប្រគល់បាល់ទៅដល់ដៃអាជ្ញាកណ្តាល ដែលកំពុងឈររង់ចាំទាំងមានអារម្មណ៍ប្លែកមិនធ្លាប់បានឃើញ។

គួរបញ្ជាក់ថា នៅក្នុងការប្រកួតនេះ ជាជំនួបរវាងក្រុម Benfica និងក្រុម Vitoria Guimaraes ដោយ Benfica បានយកឈ្នះក្នុងលទ្ធផល ២ ទល់នឹង ១ ក្លាយជាម្ចាស់ជើងឯក ពានរង្វាន់ព័រទុយហ្គាល់ លើកទី២៦៕

ប្រភព៖ Dailymail